O meatotino uma lava a faalapotopotoga e lafo tupe i ai tagata o le faalapotopotoga, e tatau ona fai se TRUST e ave i ai meatotino. O le TRUST o se auala lea i lalo o le tulafono e mafai ai ona puipui meatotino, ma mafai ai ona faaaogā meatotino i se auala e manino, faigofie, ma puipui ai i le tulafono (Trust Law) aiā a tagata i meatotino nei a lea faalapotopotoga; ma faatapulaa ai tiute o i latou o loo tofia e vaaia meatotino a le TRUST.
O tiute of trustees uma lava i Niu Sila e faatulafonoina i lalo o le Trustees Act a Niu Sila.
Afai o meatotino a Ekalesia, e tatau i Ekalesia uma lava ona fai ni Trust Deed e tusi auiliili ai tulafono, auā le puipuia o meatotino a le Ekalesia. E tatau foi ona tofia ni tagata e vaaia meatotino a Ekalesia (Trustees). O trustees tofia, e lē mafai ona latou faaaogāina meatotino a le Trust, a o lei uia tulafono tusitusia i totonu o le Trust Deed.
O meatotino a Ekalesia e umia i lalo o ‘Trust’, e iai falesa, fale o le faifeau, tupe a le Ekalesia, tupe a le faalapotopotoga a tina, aufaipese, autalavou, ma vaega eseese o le Ekalesia. E oo lava i mea fai faaili, Ipu ma nisi meafale sa faatau auā le galuega a le Ekalesia, e tusia uma nei meatotino i totonu o le Trust Deed. E tusia foi i le Trust Deed auala faaletulafono e tofia ai Trustees, ma toe aveesea ai. Tusa lava pe leai se falesa o se Ekalesia, ae a iai ni tupe lafo, e tatau ona fai se TRUST a le lotu e u‘u ai tupe.
E oo i se faailoga (LOGO) na galulue ai le Ekalesia e fai ma faailoga o le Ekalesia, e mafai ona lesitala ma puipui lenei faailoga, e na o le Ekalesia e ona le faailoga lea ua lesitala e mafai ona latou faaaogāina. O le LOGO o le isi meatotino lea a le Ekalesia, e faaaogā ma puipuiina i totonu o le Trust.
O le tele o faafitauli e tutupu mai i totonu o Ekalesia ia e oo i le fale faamasino faamasinoga, o le pulea lea e le faifeau o le faaaogāina o tupe a Ekalesia, ae mulimuli logo le Ekalesia, poo le lē logoina foi o le Ekalesia. E matuā faasā i le tulafono ona faia e se faifeau lenei tulaga. Poo le iai o se Trust ua faavae poo le leai foi, e faasā i le tulafono a Niu Sila ona faaaogāina se tupe poo se meatotino a le Ekalesia e se tagata e toatasi.
Afai foi ae malolo le faifeau, o fale na lafo tupe i ai le Ekalesia auā le galuega a le Atua, e lē o se fale e fai meaalofa ai se toatasi pe toalua o le Ekalesia mo se faifeau.
O le tiute o tagata ua ave i ai le tofi faamoemoeina (trustees) e pei ona ta‘ua i luga, e lē muta mai i faifeau.
O le vaiaso nei o loo sauni ai mo ni faamasinoga i luma o le Faamasinoga Maualuga a Samoa – Court of Apeal. O se mataupu o loo tulai mai ma faailoga fesili i se tasi o faamasinoga lea ua ou apiliina i le fale faamasino sili o Samoa, e fesiligia ai le tulaga o le pule faamatai i aso ua mavae.
O le fesili, e iai se pule toatasi a se matai e na te lisiina ai, pe faatau foi se eleele Samoa (customary lands) i aso ia ua tuanai? O fanua i lalo o le pule a lea matai, o le fanua o le puiaiga e i lalo o le suafa lea e umia e le matai. E iai se pule faamatai e pule toatasi ai e le matai se tulaga faapea, ae lei soalaupuleina ma le aiga potopoto, ma le fono faalenuu, lea tulaga?
I le faamasinoga a Palauli lea na faiaina ai Palauli i o latou eleele, na saunoa ai se faamasino Samoa, e pule lava le matai o le aiga pe lisi le fanua; e lē tau fesili se matai i se pulega a Alii ma faipule i aso ia ua tuanai.
E pei e foliga mai i le saunoaga tusia i totonu o le faaiuga o le faamasinoga a Palauli, a matai loa le tagata e pule lava lena tagata pe na te aveina eleele uma o lena puiaiga mo lana ia fanau; e lē mafai e se isi o le puiaiga poo le nuu, ona fesiligia pe talafeagai le pule a lea matai, ua ia faia toatasi ai le faasoa o fanua.
I le tulafono a Niu Sila, o le matai o le tagata ua ave i ai le tofia e le aiga ona ua faamoemoe i ai le aiga na te faia le mea sa‘o ma tatau mo le aiga potopoto (trustee). O le matai o le aiga, o ia o le trustee mo lona puiaiga.
O le umia o fanua e u‘u lea mo lona puiaiga (beneficiaries). E tatau i le matai ona soalaupule ma lona puiaiga le faaaogāina o eleele Samoa (customary lands) o le aiga, ona fai lea o se tonu e malilie i ai le puiaiga, ma lelei mo le atina‘e o le aiga. E leai se pule toatasi a se matai i ni eleele o le aiga lautele.
E leai la se eseesega i le tulafono, o le umia o le tofi faamatai ma titue faamatai i le puipui o meatotino a le aiga potopoto, ma tiute o faifeau i Ekalesia. O le tiute o le faifeau e vaai e le faifeau meatotino a le Ekalesia. Poo le matai, faifeau, loia, poo soo se isi o umia se tofi faamoemoeina, (trustee) e tatau lava ona uia auala faaletulafono pe a tu i le tulaga o le (trustee).
I lo‘u talitonuga ma lo‘u malamalama i le Trustees Law, e leai se pule faamatai e pulea ai e se matai e toatasi eleele Samoa e i totonu o se nuu. Se‘i vaganā ua soalaupule le matai ma lona puiaiga ma ua tasi ai se manatu o le a lisi se fanua o le aiga, ona faato‘ā mafai lea. O tupe maua mai foi i sea lisi, e lē pule ai na o le matai. O le tupe maua e tatau ona manuia uma ai le puiaiga.
Ina ia manino le mataupu, o meatotino ia e ta‘ua, o meatotino mo le lautele o se Ekalesia poo se aiga lautele i totonu o se nuu. O meatotino e alu ai afu o tagata e toatele o se Ekalesia poo se auaiga.
A o meatotino na alu ai le afu o le faifeau poo le matai lava ia, ma lana fanau ma ua faatau motu (freehold property) mo ia ma lona aiga, o meatotino ia e pule ai lava le faifeau ia poo le matai foi.
A iai ni finagalo faaalia mo tatou mataupu o loo talanoaina, ona tusi mai lea i le tuatusi lea:
Woodroffe Law Partnership, P.O. Box 6505, Wellesley Street, Auckland 1010. Tusi mai lou suafa ma lou tuatusi.
