O le tulaga tau aoaoga, sa faamaonia lava e Taavao le vaivai o le tulaga sa iai lona soifua aoaoina, e tele vaega sa faafaigata ai ona ulufale i aoaoga.
O le a lē fia ta‘ua foi lea tulaga peitai o le a tulitulimatai pea le itu lelei na tupuga mai i le vaivai o aoaoga.
Na o le Atua na te fesuiaia ma faafeagaiina mea o le olaga nei. Na tuufaafesagai e le Atua le tulaga vaivai o aoaoga, ma le taleni, poo se meaalofa na avea ma malosiaga, ma siitia ai le maualuga o le soifuaga o Petelo.
Sa ta‘ua e Petelo, o aso uma e agai ai i le aoga, e laitiiti taimi e aoga ai, nai lo taimi e faaalu e matamata ai i kopi o ata tifaga sa faapipii solo i pa ma tulimau o faleoloa i le taulaga i Apia.
O le fale tifaga o le Tivoli i Apia, sa fai ma ogatotonu o tafaoga ma evaevaga a Petelo. O le autū lava o le fia matamata pea ma maimoaina ata o alii ma tamaitai sa faaautu i ai ata tifaga tautaua i lena vaitaimi.
Na sosoo lava le matamata i kopi o ata, ma le faaosofia loa o manatu e fia ulufale mo le maimoaina o ata tifaga i totonu o le fale tifaga. O se luitau tele sa feagai ma Petelo, i faiga ma aga a nisi o alii faatino ata tifaga. Sa avea ma auala sa amata ai loa ona faataitai ma faatino amio ma aga, atoa ma gaioiga a tama autū.
O le faiga o gaioiga, o le faatinoina o foliga ma uiga, aemaise ai le faiga o tala, le faataitai o le faaleoina o tala, o agavaa uma ia sa aoaoina ma avea o se aoga tumaoti mo le soifua o Petelo lava ia. Mulimuli ane sa lē toe fia alu ese ai ma toe solomuli i lona fiafiaga ma ona moomooga sa totoina i lona finagalo, ma ua matamata tetele i lona loto.
O lea vaitaimi e pei ona molimauina e Taavao, sa leai sona manatu o uiga ma faiga ma gaioiga ua fiafia i ai, o se amataga fou lea mo lona olaga, aemaise ai o le valaau lea a le Atua mo lona soifua.
Ae sa ia faatinoina lava mea uma ma le faamaoni i ai o lona loto, ma le naunautaiga e fia faapei lava o alii ma tamaitai autū o ata tifaga.
O le ata sa logologoā i lena vaitaimi, sa faaigoaina o le ata o le au ulutatagi, o se ata faimeamalie, atoa ai ma le isi ata tautaua o le tagata mālie o Jerry Louis ma isi lava ata, o nisi ia o ata sa fai ma taiala na luitauina ai lona tagata. Sa ia mulimulitai pea i ia ata ma aoaoina ai pea lava aga ma tu ma faiga mālie seia oo lava ina amata ona ia mauaina ma faataitai i ai.
Ua suamalie le lē misi o ata tifaga, ma ua oo lava foi i totonu o le aiga ua tau lē maua ona uiga sa masani ai, peitai ua tele lava i aga ma faiga mālie. Sa oo lava ina fesiligia e ona mātua, pe aisea ua sui ai ona uiga faatino ma lona leo.
O le faateia o ona mātua i le tulai mai ma le vaaia o ona uiga fou faaalia, sa mafua ai ona fia malamalama ma fia silafiaina lea foi ituaiga agavaa ua ia aoaoina ma faatinoina.
O le faifai pea ma le fiafia e faaolaola uiga mālie, sa amata ai foi ona ia lagona ma mautinoa i lona loto, o lana lea taleni ma lona lea valaauina mo le lumanai.
O le ala foi lea sa lē toe foi ai ma lē faavaivai e ui ina fesiligia pea e ona mātua ma lē fiafia i ai. E ui lava i lea sa lē mafai ona toe taofiofi ma solomuli ai ae ua amata loa ona faaali ma aoaoina atili mo le lelei ma le saunia.
O le tofa ia Lavea Levi ma Fuiono Seiuli Faaiuaso o nisi o tamalii sa faia polokalame i le leitio faasalalau a le atunuu, le 2AP, o nisi ia sa fai ma faataitaiga na faataitai i ai Petelo.
