E tatau i mātua uma lava ona fai se UILI i le taimi nei a o malosi ma iloa le mea e manao e fai pe a mama‘i pe oo mai le valaau a le Atua. O le UILI faaletulafono, o ou manaoga tusia lea i lalo e taofia e sau loia le original, ae logo e oe i lau fanau le loia la e uuina lau UILI.
E taugofie ma faigofie le fai o le UILI e tusi ai ou manaoga a o e soifua ma mafai ona e tautala, ma mafai ona saini lou lima pe a uma ona e faitau i sau UILI ua uma ona tapena e se loia. O lau saini e tatau ona saini i luma o se witness poo se molimau.
A uma ona fai lau UILI ona e logo lea o lau fanau e ta‘u i ai le loia la e uuina lau UILI.
Faafesootai vave se loia e lua te talanoa ma ta‘u i ai le mea o i lou loto pe a tupu se faalavelave ia te oe, pe e te ma‘i ua lē mafai ona e toe tautala mai i le fanau ma le aiga.
O tatou mātua matutua e tatau ona e faafesootai se loia ua malamalama i ni faafitauli e tutupu mai pe a lē manino le faaupuga o le UILI. E tatau foi ona faafesootai se loia e malamalama i le faasamoa, ma fautua atu ia te oe i nisi mataupu e tatau ona tusi i lau UILI, e te sainia a o e malamalama ma malosi, ma lelei lou mafaufau e fai ai au fuafuaga.
O faaupuga o UILI e i lalo o le tulafono. O le tulafono a Niu Sila i UILI e lē o tāea ai nisi mea e tatau ona tusia i lalo e tatou Samoa. E lei iai se tulafono e taofi ai oe, i le tusia uma i lalo o mea e tatau ona tusia.
O le ā le mea e te manao e fai i lou toe sauniga? O ai se faifeau e te manao e faia lou toe sauniga? E te manao e fai le faasamoa pe leai? O ni faataitaiga nei o mea e mafai ona e fai i le loia e tusi i lalo, i totonu o lau UILI, tusa lava pe lē o ta‘ua i lalo o le tulafono nei mea.
A leai sau UILI, e uma lou ola ae apalai lau fanau i le High Court mo se faatonuga a le High Court i ni mataupu e tau i au meatotino. E taugata lenei auala, ma o le tele lava o talosaga ia e fai i le High Court, e uma a‘e ua femisaa‘i ai fanau i meatotino.
O le isi tulaga tele e tāua ai le UILI ona o le tele o tatou mātua na omai i Niu Sila e leai ni fanau poo laiti fanau. E uma le ola o le matua, ae tu i le tulaga faaletonu fanau na fananau i Niu Sila, e lē malamalama i le aganuu faasamoa. A faafefea la pe a te‘i ua omai ni matai mai Samoa, poo matai o le aiga, e lei vāai i ai lau fanau, pulea lou aso, ae tulei ese lau fanau? O ai e pa‘ū i ai ni vevesi ma misaga i lou toe aso? O le Tāua o le Fai o le UILI i le Taimi Nei, e Faamamafa atu, ona ua Tele Faafitauli o loo Tulai i le Fale Faamasino (High Court).
1. Ua iai o tatou tagata ua mama‘i, sese ona togafiti i falemai, te‘i ua feoti faafuasei mai i le falemai, ae leai se tali e tuu mai e le falemai i le mafuaaga ua oti ai. O le taimi nei ua tele mea e tutupu mai faapea, ae lalafi falemai i tua o le upu “CULTURE” aganuu.
O le tele o mea ia e tutupu mai i le taimi nei fai mai le falemai ma fomai e lē mafai ona fai se taotoga o lē ua maliu e sue le mafuaaga o le mea ua maliu ai, ona e sā i le faasamoa ona fai se taotoga o le tagata ua maliu.
Ou te lē iloa poo fea e mafua mai ai lenei faaupuga ua lalafi ai tua ma nanā ai mea sese e fai e falemai ma fomai i o tatou tagata. Afai e te lē fia oo i lea tulaga, tusi i lau UILI, e te lē tetee e fai se “post mortem” pe a tupu se faalavelave ia te oe ae manaomia e lau fanau se post mortem poo suesuega i le mafuaaga ua e oti ai.
Afai e iai sou fale na faatau i aso o taugofie fale ma laiti lau fanau, ia tusi i lau UILI se faamaumauga o se tou talanoaga ma ou alo uma, pe faafefea ona vaevae se tupe e maua pe a faatau atu le fale.
Afai e nofo ai se isi o le fanau i le fale, e tatau i le tama poo le teine lena ona mokesi le fale e ave ai ni vaega tupe a nisi o le fanau latou te lē o faaaogāina le fale.
O mea nei e tatau ona talanoa e oe le matua ma lau fanau i le taimi a o e malosi, ia aua le uma atu lou ola ae femisa‘i lau fanau i tupe ma fale.
E pei ona ta‘ua i luga le tāua o le faatino i lau tusitusiga o le fai o le mea e te manao ai i lou toe aso. Aua le tuu saoloto e fai e matai ma faifeau lou toe aso, ae leai se leo o lau fanau. Ia talanoa ma lau fanau i le mea e te manao ai ma lau faatonuga o loo tusia i lau UILI.
Afai o iai ni Insurance o i lalo o lou igoa, ia tusia ia Insurance policies i lalo ma ave kopi o au Insurance e faapipii i lau UILI, ia iloa e tamaiti poo ā terms and conditions o le Insurance.
O le mea e sili ona tāua, o lou tofia o se isi o lau fanau, e finau i lou tulaga ma tautala e faia mea ua e manao e fai, ia sologa filemu ai le faiga o tonu o lou toe aso, ma le vaevaega o aseta (assets – tupe ma le fale) pe a e maliu.
E lautele atu i tua mea e tatau ona talanoaina i mea nei e tusia i le tatou column.
A fia iloa atili nisi tulaga e tatau ona fai, faafesootai se loia e fesoasoani i mea ia e ta‘ua i luga, e fesoasoani mo oe.
