A silasila toto’a i le tele o tagata e agai i lotu i Aso Sa, faamata o ā ni mea e te maitauina? Atonu e te vaaia laei mananaia ma ni taavale taugata e o mai ai. Atonu foi e te vaaia le fiafia, e foliga mai o loo lelei mea uma.
Pe te vaaia tagata mafatia o fia maua le saolotoga, poo nisi o tiga, o loo fia maua se mapusaga? Poo ni gasegase o fia maua le faamalologa?
Toe silasila toto’a
Afai e te matuā silasila toto’a, e lē taumate tatou te iloa atu tagata o feagai ma faafitauli. Aiga o tau faasoasoa tupe o penefiti e totogi ai le mau pili, ae lē faitaulia faalavelave ma mea faalelotu.
O nai fanau sa misa mātua o mai ai, o loo tuufesili, poo le ā le uiga e lolotu ai, ae misa soo. Poo se tina foi sa faaoolima i ai lona toalua, a o lea ua sau ma taumafai e ‘ata’ata fiafia, e foliga mai o loo manuia le aiga. Poo se tamaitai talavou ua maua le tala, ua maua o ia i se ma’i faigata, leiloa pe tua ma ni ā.
Ta te malamalama, auā e faapea mea e tutupu i lo ta foi aiga. O nisi taimi e lē iloa mai e nisi, e iai faafitauli ma faigata o loo ui ai, ae a o loa i le lotu, ua pei o agelu. Ta te malamalama ai, auā e tele ina faasoa ma nai aiga o loo feagai ma faigata.
A o nisi foi, tainane lava o nai faafitauli laitiiti e lē ila ai se moo, ae a savali mai pei a oti. E tele naua tagata faapea, ae e atamamai tele e nanā mafatiaga pe a o mai i lotu.
O le Talalelei
E ui i mafatiaga, ae ua iai le talalelei. Fetalai Iesu, “Ia outou o mai ia te au, o outou uma o e tigaina ma mafatia i avega, o a’u foi e mālōlō ai outou…. Ia outou amoina la’u amo … ona maua lea e outou le malologa mo outou agaga. Aua e avegofie la’u amo, o la’u avega foi e māmā ia.” (Mataio 11:28-30).
E lē faapea la e fofo’e faavi le tele o faafitauli ma tatou. O loo tautino le Tusi Paia, e maua outou e puapuaga. Ae o le mea matagofie, e mafai e Iesu na fesoasoani i o tatou puapuaga pe a faatuatua ia te ia.
E iai nisi faafitauli e feliua’ina e Iesu i se taimi vave. O se vavega. Peitai, o nisi faafitauli, na te avatu le malosi e tumau ai, a o faatalitali mo se laveai. O le tagata na ma’i i tausaga e 38 (Ioane 5:1-15), sa alofa i ai Iesu ma faamalolo i le taimi lava lea.
Sa tele tausaga o mafatia, atonu foi ua oo ia te ia se manatu faapea, ua leai se faamoemoe. O se tasi lea o faamalologa sa fai, ae na amata i le fesili a Iesu; “e te fia mālōlō ea?”
O ni manatu tāua mo tatou
1.Ua faamautinoa e Iesu le mea o manao ai
O le fesili pe fia mālōlō, e foliga e lē fetaui. Sa silafia e Iesu e tatau na faamalolo auā ua loa o taoto e faatali le gaepu o le vai. Ae tāua le fesili, ona e iai tagata e lē fia mālōlō, e fia mama’i pea.
E lē mananao e galulue ma aoga i ni fe’au e fai, a ua faaaogā ma’i e faalafi ai le paiē.
Pe faaaogā le ma’i ina ia alofagia ai e tagata, ma soifua ai pea i se soifuaga fealoalofa’i. O se alii Amerika i le vaitaimi o le 1960, sa filifilia e alu i le taua. Ae alu lenei alii ua tase’i uma ona nifo, ina ia lē alu ai e koleni faafitafita. E fia ma’i. E lē fia tautua i lona atunuu.
O le fesili a Iesu, e iai se lesona o loo afīfī mai ai. Auā o le alii lea, na aumai e isi tagata i Petesa. Ua masani foi ma faauo i nisi i lea nofoaga, auā ua loa na iai. Ae afai e mālōlō, o le a matuā suia atoa le laasaga o lona olaga.
E tatau ona alu e faigaluega, pe fai sona maumaga. Pe fesoasoani atu i nisi tagata mafatia.
O le a lē toe taotooto ma ‘ai, ae o le a suia mea uma pei na masani ai mai i le 38 tausaga sa ma’i ai. I se isi faaupuga o le fesili a Iesu, e mafai ona faapea, “ua e sauni mo ni suiga tetele o lo’u olaga?”
O le fesili mo oe, o le ā se mea o e manao ai? E tatau na e iloaina le mea e te manao ai, ona fai lea i ai o se faatatau, ae lē na o le manaonao ma taotooto. E fia lusi lou mamafa? E te fia iloa nanu? E te fia iloa avetaavale? E te fia alu i le Iunivesite? O loo o’u taumafai e atia’e lou olaga tatalo. O loo iai se polokalame ou te faaaogāina, ia tatalo i taimi ua faatulagaina, tusa lava pe pisi. Auā e tatau na faamasani ma faapea, e mafaia.
Ae lē o le faapea, e lē mafaia. Ia matuā iloa lelei mea e manao ai, ona sui lea o polokalame, ina ia taunuu lou manaoga. E te manao moni lava ia e mālōlō? Na te mafai ona tali i soo se manaoga, ae fua faatatau i le telē o lou talitonuga. O le mau a Paulo i le tusi a Filipi: “Ou te mafaia mea uma lava i le faamalosi mai o Keriso ia te au.”
E finagalo le Atua ia e manuia ma ia e saoloto. Ae o le luitau, ua e sauni ea e te laa i se isi laasaga maualuga atu? E te naunau moni ea ia suia oe? Afai e te manao i ai, ua sauni foi le Atua e fesoasoani atu ia te oe. (Faaauau)
