“O Toailetai David Tua fou lea o le a fetaui ma Monte Barrett,” o le saunoaga lea a le alii faatonu o loo feagai nei ma le galuega o toleniga a le susuga ia Toailetai David Tua. O se saunoaga e faavae i luga o lona talitonuga ma le vaai o se tagata Faatonu, o loo maitauina ma le toto‘a ma silafia le gasologa mo le atina‘eina o le malosi o le alii taalo.
O le aso 13 o le masina fou o Aukuso o le a toe fetaui faalua ai David Tua ma lana paga sa la taalo muamua, le susuga ia Monte Barrett. O se fusuaga o loo ua tulitulimatai pea e le toatele, ona talu mai le taaloga muamua lea sa matuā uigaese le taunuuga sa iai.
O le tele o manatu faaalia ma nisi o vaega sa faanenefu pea i le talitonuga o nisi, ua manatu ai masalo o le fetauiga lona lua lea o le a faia i tuamaota o Toailetai i Aukilani i Saute i Niu Sila, o le a iloilo ai le auro i le afi.
Ua mae‘a foi ona sainia se maliliega a Tavita ma le kamupani televise a le SKY, mo le faia o faasalalauga faalauiloa (promotions) o lea taaloga, atoa ai ma le faasalalauina tuusao i le po o le a faia ai.
Na maua le avanoa e auai atu ai le Samoa Times, i le faletaalo o Tavita i Onehunga i le vaiaso na tea nei, e maitauina ma molimauina le tulaga o tapenaga a le alo o le atunuu.
Chris Martin Faiaoga faatonu David Tua
Sa fesiligia le alii faiaoga, Pe o le ā sona silafia i le malosi o Tavita talu mai le taaloga ua mavae, ma lona sauni atu mo le isi taaloga o loo taulai i ai i le masina fou.
O le faaliliuina i le gagana Samoa o lana saunoaga e faapea, “E lagona lo‘u fiafia tele i le taimi nei ona o suiga i le malosi o David Tua ua iai. O le uluai taimi sa ma galulue faatasi ai e lei mamao atu, sa fai si eseese o auala ma talitonuga sa iai, ona o se taimi muamua.
Peitai sa taumafai malosi ina ia mafai ona fesootai ma tuufaatasi a‘u metotia ma a‘u auala, ma le tulaga sa faatautaia ai toleniga a Tua mai lana faatonu muamua.
O le taimi nei, ua iai suiga i le malosi o David, o loo ma galulue malosi i le atina‘eina o gaioiga (movement) i totonu o le maea. O le malosi ma le vave o lea ua toe foi lava iai David Tua.
E tele foi faamatalaga faapea ua leai se malosi i le tu‘i a David, ae o la‘u molimau talu ona ma galulue, o loo iai pea le malosi, ae o suiga mai lea taimi i lea taimi e mafua ai ona lē toe vaaia le tu‘i malosi ma le tu‘i oti, e pei ona manao i ai le toatele o tagata.
O lo‘u talitonuga ua lava tapena David Tua mo le taaloga ua sauni atu i ai. O le a faateia foi Monte Barrett i se isi David Tua fou, ae lē o Tua lea na la taalo muamua. Ae manaomia lava le auai ma le faatoateleina o tagata maimoa i le po o le taaloga ina ia faamalosiau ia David Tua.
Toailetai David Tua
E mālie saunoaga a le alo o le atunuu ina ua fefaasoaai ma le Samoa Times. Sa ia toe faamanatu le upu a lona tamā sa fai ane ia te ia e faapea, Fusu tagi pea, alu i ai, a ta‘e le mata fusu pea, a pa‘ū i lalo, toe tu i luga.
O le mea lena e ioa ai le tagata e fai le loto.
Sa tautino Toailetai, o le auala lava lea ua fai i le taimi nei, o lona tamā o se tagata faigata tele. Ae o le aogā foi lea o upu a toeaiina, o le luitau malosi mo ia ina ia tuu atoa i ai le malosi ma le fatu, i le faigata o le toleni atoa ai ma le faataunuuina o le taaloga.
Saunoa Toailetai, e lagona foi le agaga vivii i le Atua ona o le malosi o loo aumai i lea aso ma le aso. E faafetaia foi le nofo tatalo a le mamalu i lona atunuu, mo lona taumafai, ma o le isi lava lea avega mamafa ia te ia, o le manatu ia faamalieina le tapuaiga a Samoa.
Ae o le taimi nei e leai se isi mea o taulai i ai lona mafaufau, pei lava o lana masani e lē mafai ona oo lana faitau i nisi taaloga o lumanai, ae ave lava le faamuamua i le taaloga o loo sauni i ai ma latalata mai. A manuia poo le ā lava le tulaga e oo i ai le taaloga lata mai, ona faato‘ā tapena lea ma vaai i le isi taaloga o sosoo ai.
Sa teena foi e Toailetai David Tua se manatu sa faasalalauina e nisi o le au faasalalau ma le au tusitala e faapea, o le tau vaavaai mo se fusuaga mulimuli ma mālōlō litaea ai. Sa tautino Tavita e lē o iai se manatu faapena, o loo tumau pea lona faamoemoe ma le moemitiga sa faataatia mai talu le amataga. O loo lelei lava pea foi fesootaiga ma le alii o Cedric Krushner i Amerika, ma o loo sauni fiafia foi le alii e malaga mai mo le taaloga o le a faia i le aso 13 o Aukuso.
O se tasi o vaega tāua sa faalauiloa e David Tua i lea lava talanoaga, sa ia ta‘ua ai se isi vaega o lana tautua ma lona soifua taalo ua agai nei i ai. O lea fuafuaga, o se mea ua tuu e le Atua i lona loto, ma e lē o toe suia e oo mai lava i le taimi nei.
O le vaiaso fou o le a silasila ai i le vaega lea e pei ona saunoa i ai Toailetai, auā le agai i luma o lona soifua ma le faaaogāina o lana taleni, a o maua lona malosi. O le autū sa ia saunoa i ai, O le fusu o lana misiona, Boxinig is a mission.
E toe aaauau i le vaiaso fou.
