Ua tutu faatasi nei le Matagaluega o Leoleo ma Falepuipui ma le Kamupani Telefoni Feaveai o le Digicel ina ia tau taofiofi amioga “lē migao” ua vaaia i fetusiaiga i luga o telefoni feaveai.
O polokalame faalauiloa o le vaiaso atoa a lea kamupani telefoni feaveai na faalauiloa mai ai ma le faagaulemalie o le pulega ona ua toatele ua faaseā atu i le maua ai o feau tusitusia faalētonuga i luga o a latou telefoni. Faaalia e To‘alepai Waikato To‘alepai, o le tasi o Pule o le Kamupani o le Digicel.
O i latou ua avatu faaseā o tagata ua se atu i ai tusitusiga leaga nei ma na ta‘ua o le matuā mamafa ma le leaga o upu masoā e lafo atu ae o le tele o taimi ua sese numera ua lafo i ai.O nisi faitioga o tagata ua manino lava o i latou ia ua faatutu atu iai ia fesootaiga le mafaufau. Ta‘ua e To‘alepaialii o le faanoanoaga lava ona o Samoa o le atunuu ua a‘oa‘oina ae foliga mai e leai ma se popole o tagata nei e faia nei fetusiaiga faaletonuga faapea.
“Ae o le tulaga e ofo ai, e tiga ona iloa e maua uma lava a latou telefoni poo numera i le tatou ofisa ae fai lava,” o se saunoaga lea a To‘alepai. “O lea la ua ave sa‘o lava i le ofisa o leoleo le tele o nei fetusiaiga ma o le a molia foi i le tulafono ma e fautuaina lava le mamalu o le atunuu o loo maua nei ituaiga fetusiaiga ina ia agai sa‘o lava i le Ofisa o Leoleo ma tusitusiga nei pe a o latou maua.”
Na muai lāgā foi lenei mataupu ina ua toatele ulugalii ua oo atu lava i leoleo feeseeseaiga ona o fetusiaiga e maua ai e le isi le ova a le isi. O le faamatalaga a To‘alepai, na fai telefoni mo le faaaogā tatau ona o fesootaiga manaomia ma ua faamaonia lava le tele o le aogā o ia ituaiga fesootaiga. “Ae ua toatele lava ua faaali ai uiga lē migao ma le lē a‘oa‘oina”.
Faaalia e To‘alepai o le a ave sa‘o lava i latou e faamaonia ua faia nei faiga i luga o telefoni feaveai i le Faamasinoga. “O le galuega lea ua matou faia ma Leoleo auā e maua uma lava numera nei o le agai sa‘o lava i nofoaga o loo iai ma molia loa.
Ona pau le faafitauli lea e vaaia o le toatele e faafiti lava foi pe a maua”. Ta‘ua e To‘alepai o le toatele a fesiligia ina ua maua e fai mai na faaaogā e isi tagata le telefoni ma ua faamalamalama nei la i tagata fai telefoni feaveai uma e vaai lelei a latou telefoni auā o i latou lava e molia.
O le vevesi na tulai mai i le va o tama aoga i le masina na tea nei na faaalia e To‘alepai ua mae‘a suesuega a le Ofisa o Leoleo ma maua ai o ni fetusiaiga faapea i le va o se tama aoga mai i le isi Kolisi i se isi talavou o se aoga ese na tulai mai ai loa vevesi ia foi na taumafai leoleo e taofiofi i le maketi i Savalalo ma le maketi i Fugalei.
Ua tutuli ai lava ma tama aoga na faatupuina ia vevesi mai i aoga na faapea ona a‘oa‘oina ai ona o le tulai soo mai ai o misa o le faaaogā sese o telefoni feaveai.
