Lipotia mai le aveesea mo se taimi e le Matagaluega o Aoga a Niu Sila, o le laisene mai se tasi o aoga amata i Newton i Ueligitone, talu ai lipoti e faapea, o se mea masani le sasa e faiaoga i lena aoga, o fanau o loo aooga ai.
O le EFKS Aoga Amata i Newtown, o se aoga e faaaogā ai le gagana Samoa i ana a‘oa‘oga, lea e aafia i lenei faaiuga mai le Matagaluega o Aoga.
O loo lipotia i le nusipepa o le The Dominion Post lenei mataupu, o loo ta‘ua ai faamatalaga a nisi o mātua, i le mautinoa o loo sasa e i latou o loo faatautaia lea aoga, fanauiti o loo latou vaavaaia.
O se suesuega na faatino i lea aoga ina ua oo i le Matagaluega nei tuua‘iga, lea la ua faia ai nei le faaiuga lea. O se tusi na auina atu e le taitaifono o le asosi a mātua ma faiaoga, le susuga Ken Tuuu, i mātua na ia ta‘ua ai, le faamaonia o nei lipoti, o loo fai ma sasa e faiaoga tamaiti o lenei aoga.
I se tasi o imeli na ta‘ua ai, o se mataupu ua faailoa soo atu i faiaoga, ae foliga mai o loo faatuputupulia pea lea gaioiga i totonu o lenei aoga.
Peitai o loo teena e se tasi o faiaoga sinia, Sadie Fiti lenei tuua‘iga faapea o loo sasaina le fanau i le aoga. O le molimau a Fiti e faapea, o le faiaoga lea e agai i ai suesuega, sa taumafai e vaovao fusuaga a ni tamaiti.
Peitai na tago atu le faiaoga e u‘u le lima o le isi tamaititi e toso ese ina ia tatala ai le fusuaga, ae atonu ua manatu ai lea tamaitiiti ua tulei o ia e le faiaoga.
Ua uma foi la ona faatoese le faiaoga i mātua o lea tamaitiiti pe afai o le manatu lea o le la alo i le mea sa ia faia. Molimau Sadie Fiti, ‘e leai ma se tasi o faiaoga fulltime e toaono, faapea isi faiaoga part-time e toatolu o sasaina se tamaitiiti.
Ta‘ua atili e Fiti, o se mea na tupu i le masina talu ai o Iuni, ma ua uma foi ona toe foia ina ua uma ona feiloai le vasega o faiaoga ma mātua o le tamaitiiti na tupu ai le faafitauli. O le itu lea e faateia ia i le toe tulai mai o nei tuua‘iga, ae lei iai foi ni faaseā na faaoo aloaia atu i le aoga.
Peitai o le susuga Solomon Toala, na ia aveese mai lona afafine o Isabella mai lea aoga, ona e tele lava ona atugaluga i le puleaina o lea aoga, seia oo foi ina tulai mai ai tuua‘iga nei i le sasaina o le fanau.
I se faamatalaga a Toala e pei ona lipotia i le The Dominion Post na ia ioeina ai e lelei le aoga e pei ona sa aoga ai lona afafine, ae o ona atugaluga ia e pei ona ta‘ua e lona alo, le sasa ai o ia e le faiaoga, faapea foi i se isi ona tei e aoga ai lea lava aoga. Ma ua oo i le tulaga ua lē toe manao lona afafine e alu i le aoga.
Na ta‘ua foi lea lipoti se finagalo o le susuga Tino Pereira, o ia o le taitaifono a le vaega faufautua a le Pasefika mo polokalame a le malo o loo galulue e tetee atu i faiga sauā i totonu o aiga (Government’s Family Violence Taskforce).
E tusa o le agaga o le saunoaga a Pereira, e lē avea le aganuu ma itu e ta‘utonuina pe taga ai ona sasa le fanau. Poo le ā lava le lanu, pe uliuli, moana pe paepae, e lē taliaina ni uiga poo ni faiga sauā.
