Afai o faaosoosoga e faapogai mai i totonu o tatou mafaufau, o lona uiga o le suia o mea tatou te mafaufau ma manatunatu i ai e tāua tele. E lē o le fai o ni mafaufau fou (new brains), ae ia suia mea e manatunatu i ai. O le ki lea e manumalo ai, e lē o le taumafai e finau pe oono ia tuu ese mafaufauga leaga, ae ia suia mea e mafaufau i ai.
O se faataitaiga, afai ua e vaai i se tamaitai ma ua tutupu ai ni mafaufauga lē mamā, ia suia loa le mea e te mafaufau i ai. Sui agai i se isi mea, e pei o lou mafaufau i lau galuega, poo lou toalua.
Poo lou mafaufau i le alofa o Iesu ia te oe. Ia vave ona sui le kia o lou mafaufau, e pei o le muāgagana a le atunuu: fetuutuunai muniao. Alu ese ma le mea lea e mafua ai ona tutupu ou mafaufauga lē lelei.
Tilotilo ese pe savali ese.
Fai mai le Filipi 4:8, “Le au uso e, o le toe upu lenei; o mea uma ua moni, o mea uma ua tauleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foi o se isi amio lelei, po o se tasi mea e viia, ia outou manatunatu i ia lava mea.”
Ua tautino mai le aposetolo, o le faafouina o o tatou mafaufauga e lelei tele mo le soifuaga faaleagaga. O lou taumafai e poloka ni mafaufauga leaga i lou mafaufau e lē tua lelei.
Auā e lē mafai ona e faatautee i mafaufauga e tutupu pea. E atili ai ona saputu atu pea mafaufauga e sili ona leaga ia te oe.
A o lou faatuatuanai i ai, ma sui le mea e te mafaufau i ai, e faavaivaia ai ‘ave malolosi o mafaufauga leaga, ma faaitiitia ai lo latou malosi. E pei o se faaupuga faapea; a e lē manao e ‘ai oe e pi, sōsō ese ma le faamoega pi. I le ma le isi, e tatau ona e fanaufouina.
Fanaufouina Faapefea?
Ona pau lea o le auala e gausiaina le natura vaivai ma le agasala o le tagata. O le tuuina atu o o tatou ola i le Atua. Ua na o ia e mafai ona suia i tatou. O le fanaufouina, o se laasaga maualuga ua fuafua e le Atua mo le tagata, e maua ai se malosi e sili atu i le malosi faaletagata.
Auā foi e leai se mana o le tagata, ae na o le mana o le Atua na te aumai, pe a fanaufouina. Tatou te manaomia Iesu na te suia i tatou. E lē mafai e le tagata ona tetee le malosi faalenatura-tagata ua pa‘ū, seiloga tatou te talia Iesu i o tatou loto, ona faamoemoe lea i lona mana e manumalo ai i faaosoosoga.
O le fanaufouina, e lē o le avea lea ma tagata lotu. Poo le iai o se tofiga i le ekalesia, poo le taumafai foi i lou lava malosi ia avea ai ma tagata lelei. O le fanaufouina, o lou salamō lea mai au agasala, ma filifili ia faatuatua ia Keriso Iesu.
O Ai e mafai ona Fanaufouina?
Soo se tagata e salamō mai ana agasala e pei ona molimau le Efeso 2:1, “O outou foi na oti i amio leaga ma agasala.”
O le agasala, ua fai lea ma va pupuni o le Atua ma le tagata na ia faia. Ae o lona alofa tunoa, na ia foai mai ai lona Alo o Iesu, e togiola i tatou. 1 Korinito 15:3, “… na maliu Iesu Keriso ma sui o a tatou agasala …”
O i la o loo taoto ai se lē malamalamaga tele, ona tatou te manatu e otomeki le faamagaloina o agasala ona o le galuega faaola a Iesu, pe afai tatou te lolotu.
Ae o loo manino le talanoaga a Iesu ma Nikotemo, na fetalai ai Iesu “a lē toe fanau le tagata, e le mafai ona iloa e ia o le malo o le Atua.” Na tali Nikotemo, “e mafai ea faapefea ona fanau o le tagata ua toeaina?
E mafai ea ona ou toe ofi i le manava o lo‘u tina, e fanau mai ai?” Ae toe tali Iesu; “E moni, e moni, ou te fai atu ia te oe, afai e lē fanau se tasi i le vai ma le Agaga, e lē mafai ona sao o ia i le malo o le Atua. O lē fanau mai i la le tino, o le tino lea; o lē ua fanau mai i le Agaga, o le agaga lea.”
E iai le isi tala a Iesu na fai, ona ua ia silafia e Iesu, le nenefu o le mafaufau o Nikotemo i ana saunoaga. Fai mai Iesu, “aua e te ofo aua na ou fai atu ia te oe, E ao ona toe fanau mai outou.”
O se mataupu fou lea ia Nikotemo, e lei faalogo ai muamua. Ua lili‘a ona tino, ona e ese ia a‘oa‘oga ua fetalai ai Iesu. O le mea foi lea o loo faa‘amu‘amu ai le toatele, pe afai ae tau atu le faaolataga e fanaufouina ai. E ofo ma manatu o a‘oa‘oga fou, ae o lea e lolotu ma tautua le galuega a le Atua.
Samoa, afai e aunoa tatou ma le fanaufouina o tatou agaga, ma maua le faatuatua moni ia Keriso Iesu – i lona maliu, ma lona toe soifua mai, e lē mafai foi e tatou ona iloa le galuega lilo a le Agaga Paia lea sa fetalai Iesu e auina mai, o lo tatou fesoasoani.
O le fesoasoani lea e mafai ai ona tatou ola manumalo mai mailei a le tiapolo. O le Agaga Paia lea e tatou te maua ai le faamalosi, pe a fetaia‘i ma faafitauli. O le Agaga Paia lea e maua ai le ola manumalo mai faaosoosoga, ma viia ai le Atua ona o lo tatou gauai pea i le ola finafinau mo Ia.
Soifua.
