“Ua faaaogā faagaoi la‘u pese o le “Tama a Samoa”…Felise Mikaele
O faasalalauga faapisinisi a se televise i Sini Ausetalia o loo faalauiloa ai le taamilosaga lakapi o le Ipu o le Lalolagi e talimalo ai Niu Sila i le tausaga nei, ua faaaogā ai i se tasi o faasalalauga faapisinisi le pese o le “Tama a Samoa” o le vii foi o le Manu Samoa na tusia ma fatiina e le afioga Lealaitagomoa Asuao Felise Mikaele, o se alii pese lauiloa o le atunuu.
O le kamupani e ta‘ua o le McCann World Group i Sini Ausetalia ua latou faaaogā faasolitulafono lea fatuga o pese e aunoa ma le sailia muamua o se faatagaga mai ē ana le meatotino. Ua lē gata ina faasalalau i luga o televise ma leitio, ae faapea foi i fesootaiga televavave o le Initaneti i le Upega o Fesootaiga o le You Tube. I le tusi a le loia a le alii pese o Samoa i lea kamupani, o loo tāpā ai se faamatalaga i lo latou faaaogāina o le fatuga e aunoa ma le fesootai i se ioega a Felise Mikaele.
O le pese o le “Tama a Samoa” e pei ona silafia ua pepese ai le toatele ona o le matagofie o lona taulagiga faapea upu ma ua fetaui lelei ma le aulakapi o le Manu Samoa, o loo autū i ai upu o le pese, aemaise o soo se faagatama tau taaloga e a‘e manuia ai faiva o alo ma fanau a le atunuu.
E ese mai le fatuga lea a Felise Mikaele i le vii o le Manu Samoa sa tusia ma usuina e le isi alo ta‘uta‘ua o Samoa i le musika. le susuga Fanana Jerome Grey.
Faaalia e le susuga Lealaitagomoa A Felise, o lana pese o le “Tama a Samoa” ua mae‘a ona lesitala i aiaiga ma tuutuuga faavaomalo, e mafai ai ona maua ni taui tupe pe a faaaogā i ni faiga faapisinisi. O soo se leitio ma se televise na te faaaogāina e avanoa ai lea faamanuiaga. O le taimi nei o loo faatali le alii pese ma lana loia o Karen Soich i se tali atu a le kamupani i Ausetalia.
E mamafa le faasalaga o le faaaogā faagaoi e se tasi o se meatotino tau fatuga o le mafaufau e pei o pese.
O le faanaunauga o Felise ia faia le mea amiotonu o le mulimulitai i aiaiga o tulafono i le faaaogāina o ana meatotino.
O faasalalauga faapisinisi o loo faalauiloa ai le taamilosaga lakapi o le Ipu o le Lalolagi, o loo maua ai tupe a kamupani faasalalau, ma o se itu sili lea ona matuia ma ogaoga i le faaaogāina o se pese i se tulaga faapea e aunoa ma le faanoi muamua i le tagata e ana lea meatotino.
E lē o se taimi muamua lenei ua maua ai ni gaioiga faagaoi i fatuga a lea tamalii o le atunuu.
O le tausaga na tea nei na maua ai foi e leoleo i Amerika Samoa ni tagata i Tutuila ua latou toe tapue faagaoi CD pese ma MTV pese a Lealaitagomoa Felise Mikaele ma toe faatau i se tau taugofie.
Ua lē toe tupu lea gaioiga ina ua maua ma molia i latou na faia.
