O le tasi o vaega ua mautinoa le unai i a‘oa‘oga a le Ekalesia ua Ogatotonu i ai Tapuaiga (Worship Center) o le talitonu lea i vavega.
E tele vavega ua faia e le Alii i le soifua o ona tagata tapuai ma o le mafai ai ona vaaia le sauniga lea na sua ai mo le uluai taimi le eleele auā le amataga o le fausia o le Malumalu o le Ekalesia lenei i Samoa, o se tasi lea o vavega ua mautinoa le faafetaia ai o le alofa o le Atua.
O viiga na alalaga i ai le Ekalesia lenei i le sauniga na faatautaia ai lenei laasaga tāua i le talafaasolopito o le lotu lenei i Samoa. O le alaga o le viiga mai i taitai ma tagata o le Ekalesia ma o le faafetai lava foi lea na saunoa i ai le Taitai o le atunuu, le Alii Palemia, Susuga Tuilaepa Lupesoliai Sailele Malielegaoi. Ae e mautinoa o le telē o le isi viiga na sau sa’o lava i le Samaria Agalelei lea ua faia le vavega o le foai o le miliona tala Samoa mo le fausiga o le malumalu a lenei aulotu.
O le alii fai vavega lenei e suafa ia David Broughton (itu taumatau o le Palemia i le ata). O se faauluuluga o se lala o le Ekalesia lenei i Ausetalia. O ia lea ua ofo mai lenei seleni tele mo lenei faamoemoe. O le fesootaiga lea ia Samoa ma o se alii ua vavalalata lona va nonofo ai ma le Taitai o le Ekalesia i Samoa le Susuga Pastor Viliamu Mafo’e, ma ua faaauala mai ai i le Ekalesia lea i Ausetalia lana lava fesoasoani.
O le tinoitupe lea e $500,000 tala Ausetalia e tusa o le sili atu ma le miliona tala Samoa pe a faaliliuina, ua tuu atoa mai ai le lagolago a lenei alii i le Ekalesia Ogatotonu o Tapuaiga i Samoa nei. Ua ia ofo mai e aumai uma meafaigaluega ia mai i Ausetalia. I le saunoaga a le Alii Palemia, Susuga Tuilaepa Lupesoliai Sailele Malielegaoi le Ekalesia ona o fuafuaga lelei mo le ola tautua ai mo le Alii.
“E tele ni luitau sa feagai ma outou, e pei o le faafitauli sa tulai mai, i le va ma se tasi o Faletalimalo o loo i le isi itu, ona o le leotele o le faiga o a outou viiga, ae faafetai o loo tumau pea le agaga o le tapuai i le Atua,” o se saunoaga lea a le Alii Palemia. O le Faamasinoga i le leotele o viiga e sau mai i le fale‘ie na faatautaia ai tapuaiga a lenei aulotu i Sogi, na faatonuina ai e tatau ona fausia se nofoaga e pei la o se Malumalu e mafai ona taofiofi i totonu le leo auā e faatulafonoina le maualuga e tatau ona iai le leo e faalogoina i nofoaga faitele e pei la o le talafatai o le taulaga.
O le tagi a le Faletalimalo o le Millenia, e matuā faitio a latou malo o nonofo ai i lenei nofoaga i taimi e faatino ai viiga a le aulotu lenei ona ua lē maua ai se latou foi malologa. Na fua le maualuga o le leo o loo sau mai i ia tapuaiga ma na faaalia ai e le Vaega o Fuafuaga o Galuega i le Taulaga le PUMA, o loo maualuga tele le leo o loo sau mai i ia tapuaiga pe a fuafua i le leo e faatagaina ona salalau i nofoaga faitele. O lea na sii ai loa tapuaiga i se tasi o fale taalo i Tuanaimato ae se‘i tālia se tali e mafai ai ona vave faatino se galuega o se malumalu.
O le tali a le Susuga Viliamu Mafoe ina ua tāpā sona finagalo i lea faaiuga “… e tuu atu le mataupu i le Atua ma o le a faia talosaga e aumai ai se tali”. O lea la e foliga mai o le a vave ona taunuu lenei miti a le Worship Center i Samoa. I se faatalatalanoaga ma le failautusi o le Ekalesia Worship Centre, Moala Siliva Moala, na ia ta‘ua ai, e lē o mautinoa ma mautu mai le taimi e amata ai le galuega.
“Ua filifilia lenei taimi o le tausaga mo le sauniga faapitoa o le amataina o le galuega, ona ua mafai ona auai uma faafeagaiga ma o latou faletua sa auai mai i le Fonotaga tele a le Ekalesia sa faatautaia mo le lua vaiaso,” o se saunoaga lea a Moala.
O le Fonotaga a le Ekalesia i le tausaga nei, o le lona fitu ai lea o a latou faatasiga ma na molimauina e le toatele o tagata o le Ekalesia e lē gata i Samoa nei ae o atunuu i fafo atu sa mafai ona auai mai.
O lea Fonotaga tele a le Ekalesia e ta’i lua tausaga ma faatautaia ma o le isi Fonotaga o le a usuia i le tausaga 2013. O loo galulue lava foi sui o lenei Ekalesia i le sailiga seleni a i latou lava ia ma ua faaputu mo le faatinoga o lenei galuega tele. O se atina‘e autū lea ua taulai i ai le silasila a lenei Ekalesia.
O le tausaga na tea nei lea na tatala aloaia ai le Kingdom TV o se tasi o ana atina’e ua vaaia le toatele ua o latou maimoaina. O loo vaaia pea le faatuputupulaia o sui o lenei Ekalesia i lea tausaga ma lea tausaga.
Na taua e Moala, ua 52 Matagaluega i totonu o le Ekalesia Worship Centre o loo auauna ai faifeau ua mae’a faauuina o latou tofi, ma e valu Matagaluega o le a tatala i se taimi o lumanai ma e talitonu e oo atu i le isi Fonotaga ua faaopoopo Matagaluega mo le Ekalesia.
O se fiafiaga tele foi i le Ekalesia ona ua mafai ona faatuina ni lala fou o le Ekalesia i Initia ma Pakistan, o nisi o atunuu o le Lalolagi e tele ina lē talia nisi faatuatuaga ona e iai lava o latou talitonuga faalotu sa ola a’e ai.
