Poo le ā lava le leva ona lē toe vaaia Jonah Lomu i tausinioga o le Lakapi a Niu Sila, e lē mafai ona faagaloina lenei alii ta‘uta‘ua i le taaloga, ma o le auai mai i le aumalaga toatele lea na taitai mai e le Minisita o le Va i Fafo a Niu Sila, ua saga faamautu ai le tāua ua ave e lea foi Malo i le sao o lenei alii o se tagatānuu o Tonga i le sao o Lomu i lenei taaloga i Niu Sila.
O lona auai mai i Samoa na maua ai ma le avanoa e fesoasoani ai lenei alii i ni toleniga na faia i Samoa nei ma o inā na maua ai se avanoa e faatalatalanoa ai e tusitala lenei alii i lona foi finagalo i sauniuniga a le ‘au a le Manu Samoa poo ana ‘au e lua ia ua saili mai ai nei se aufili e tasi mo le Ipu o le Lalolagi.
Ta‘ua e Lomu e lē taumate lava le toatele e lē o fiafia i le tulaga e pei ona iai iuga o taaloga a alo o Samoa i le Ipu o le Pasefika. E toatele foi ua faalauiloa lava le lē fiafia tele i nei sauniuniga, ma e foliga o le ata lava lea o le a iai taumafaiga a le Manu Samoa i le Taamilosaga autū o le Ipu o le Lalolagi lea na malaga mai Lomu ma taitai o Niu Sila e unai i atumotu o le Pasefika i le faigamalaga lenei.
Faaalia e lenei alii, o le taimi aupito sili lenei ona tāua a o loma ai taaloga a le ‘au ona o loo matuā moomia e tama taaalo le lagolagosua a tagatānuu o Samoa. Faaalia e Lomu atonu o taaloga o le Ipu o le Pasefika, e tāua ae e lē o le taulai lea i le taimi lenei. O le tulaga tāua na ia faaalia o le lava sauni o le ‘au a Samoa mo taaloga tele o le Ipu o le Lalolagi. E lua taaloga ia na malolo ai Samoa i le Ipu o le Pasefika, o le la taaloga ma Fiti ma le la taaloga ma Tonga ae o le taaloga muamua ma Iapani lea na manumalo ai.
O lea foi na faamanino mai i se fono na tāloina e le Iuni Lakapi a Samoa ma tusitala i lenei vaiaso, ua lua ‘au a le Manu Samoa. “O le taimi muamua lea ua tulai mai ai sea tulaga,” o se faamatalaga lea a le Sui Taitaifono a le Iuni Lakapi a Samoa, le Afioga Lefau Harry Schuster. Na ia faaalia o le mafuaaga ona o le ave o le faatāua i taamilosaga o le Ipu o le Pasefika ma le faatāua i isi vaega o le sauniuniga a le Manu Samoa mo le Ipu o le Lalolagi i le taaloga ma le ‘au mai i Ausetalia.
O le filiga o le ‘au tele mo le Ipu o le Lalolagi, na ta‘ua e Lefau o le a fili mai lava i ‘au uma nei e lua ae o le tāua ia maua e Samoa se ‘au o le a sili atu ana taumafaiga mo le Ipu o le Lalolagi.
Faaalia e Lomu o lana ia vaai i le taumafaiga ma sauniuniga a le ‘au a Samoa e telē lava le avanoa e mafai ai ona ausia e le ‘au a le atunuu tulaga maualuga o lea Taamilosaga ae o le faatāua i le taimi lenei a o alo atu alo nei o Samoa mo sauniuniga, o le ave uma o le lagolago ma le tapuaiga a tagatānuu o Samoa ia latou taumafaiga.
O le Iuni Lakapi a Niu Sila na malaga mai ona sui faatasi ai ma Jonah Lomu ona o le manaoga ina ia unai le taligamalo a Niu Sila lea ua alo atu nei i ai i ona motu tuaoi. Ua lē o toe po Malae i le tulaga o iai lenei taaloga i Niu Sila ma le sao o fanau a le Pasefika amata atu lava i alii Samoa, Tonga ma Fiti o loo fai ma sui o le ‘au tele a Niu Sila i le taimi lenei, le All Blacks.
O le finagalo la o le Malo o Niu Sila e pei ona aumai i lenei faigamalaga na asia Samoa i le amataga o le vaiaso, ia aumai foi se sao o nei atumotu i le taligamalo lea ua alo atu i ai Niu Sila mo le Ipu o le Lalolagi i le Lakapi.
O se faamoemoe ua mautinoa le faitau afe ma afe o tagata o le a faapea ona asiasi atu ai i Niu Sila ma o le taumafaiga a Niu Sila ina ia ta‘u atu i nei mau tagata o le a tumutumu atu o le atina‘e o le Lakapi ua saga tuufaatasia ai tagatānuu eseese o Niu Sila ma o se taaloga ua telē le sao i le unaiga o le ola fealofani ma le femalamalamaai o soo se tagata ua avea nei Niu Sila ma o latou aiga, atunuu ma nofoaga ua faamautu ai ma aiga.
Ua tālia nei le filifiliga a le Iuni Lakapi a Samoa mo sana ‘au mautu mo le Manu Samoa, ae o le faamanatu lea a lenei alii lauiloa i le Lakapi, Jonah Lomu – ua oo i le taimi e malosi ai le faaali o le lagolago a Samoa i ana tamafanau, i le alo atu ai i lenei tausinioga faavaomalo i le Lakapi.
