Ua toe amata a‘oa‘oga faaauau mo le faaiuga o le tausaga. O le tasi o faafitauli tele ua lagalagā pea, e amata mai lava i vasega laiti i Aoga i Samoa, seia oo i le maualuga o a‘oa‘oga faa-Iunivesite, o le tele o le faaletonu o iai fanau a le atunuu i le mataupu o le Numera poo le Matematika.
E oo i fanau i le Iunivesite Aoao o Samoa i le faaiuga o le vaega muamua o a‘oa‘oga ua vaaia ai le lē faamanuiaina i le mataupu lava lenei. E toatele ua lē mafai ona ausia tulaga maualuluga o a‘oa‘oga i ia mataupu. Ae o se tasi lenei o mataupu e matuā moomia lava i le tuufaatasiga o togi o soo se tama ma se teine aemaise lava i aoga maualuluga.
O le mafuaaga lea o le avea pea ma se tasi o mataupu e lua e matuā moomia lava le pasi i suega tetele a le atunuu ma e faamalosia lava foi le a‘oa‘oina seia oo i a‘oa‘oga maualuluga. O le isi mataupu o le Gagana Peretania.
O le faafitauli ua laga pea, ua toatele e lē o toe fiafia i lenei mataupu ma o se taumafaiga tele o loo nafa ma faiaoga o lenei mataupu ina ia faatosina fanau e faaauau a‘oa‘oga i le Numera.
Ua saili foi e le toatele e a‘oa‘oina lenei mataupu ni auala e faafaigofie ai le a‘oa‘oina o lenei mataupu i faleaoga.
O le faatalatalanoaga ma le toatele o faiaoga o le Numera i le vaiaso na tea nei sa fesiligia ai pe aisea lava ua vaaia ai le toatele o fanau ua faamaamulu mai i le faaauau ai o le a‘oa‘oina o le Matematika poo le numera. Ua manino lava o le tasi o faafitauli ua tele ai ina faamaamulu fanau mai i lea mataupu ona o loo tele ina a‘oa‘oina i le Gagana Peretania.
O le mau a nisi ua atamamai i lenei mataupu atonu ana faamalosia le a‘oa‘oina o lenei mataupu i le Gagana Samoa, ai ua toatele atu e pasi le numera i suega a le atunuu. O le manatu atonu o mataupu uma e ese mai i Gagana ma fesootaiga e tatau lava ona a‘oa‘oina i le Gagana Samoa. Ua tatou vaavaai ma ua outou silasila foi i le tele o atunuu o le Lalolagi, ua faaaogā lava a latou gagana e faatino ai a‘oa‘oga seia vaganā ai tomai e pei ona ta‘ua o fesootaiga ma gagana.
O le faafitauli lava lea ua vaaia nei ua toatele le fanau o loo ua faigofie foi le tautala i le Gagana Samoa ma le Gagana Peretania peitai o le tusitusi ua telē le faaletonu. O loo ua iai ni suega ua faatautaia i vasega laiti e unai ai le faitau ma le tusitusi a fanau.
A tatou tepa i atunuu ua maoa’e le atamamai i tomai faasaienisi ma tomai e faaaogāina ai le Numera e pei o Iapani ma Saina, o loo manino ai lava le ave o le faatāua i le a‘oa‘oina o lea mataupu i le latou lava gagana.
E lē o iai lava se Sapani poo se tagatānuu o Saina e vaaia le faamamafa i le Gagana Peretania se‘i vaganā lava ua malaga ese ma lea malo tele ae taumafai e nonofo ma faamautu pisinisi i isi atunuu ma o le fesootaiga lava ua mafua ai le manaoga lea e a‘oa‘o se isi gagana ese atu.
O le to’atele foi e lē agai i le Gagana Peretania ae ua a’o sa’o lava le gagana a le atunuu lea ua faamautu ma galulue ai.
Faato’ā mae’a nei le Fono faavaomalo a le Iunivesite Aoao a Samoa sa ave ai foi le faatāua i le Gagana ma le faamauina o measina a le atunuu auā tupulaga lalovaoa o le atunuu.
O isi atunuu ua ave foi le faamuamua i le latou lava gagana o Rusia, lea o loo faapea ona malosi tele i suesuega ma tomai tau i le va nimonimo. Faamata ua lē tatau foi la ona vaavaai Samoa e a’oa’o ona tagata i mataupu e ese mai i fesootaiga ma Gagana i le tatou lava gagana?
E moni ua iai le Iunivesite ua aloaia le a‘oa‘oina o ana mataupu i le Gagana Samoa, le Amosa o Sa Vavau, ae e lē o malosi lava le lagolago o ave i ai e le toatele ma e faigofie lava ona manatu le toatele a lē lelei le Gagana Peretania o lona uiga o se tulaga maulalo o loo iai a‘oa‘oga.
O se manatu na amata mai lava i taimi o pulea Samoa e isi atunuu i fafo. Le ituaiga manatu foi lea na faasā ai ona tautala le tama ma le teine Samoa i lana lava Gagana i nisi o aoga maualuluga a le Malo i tausaga ua mavae.
Ua leva ona mou atu taimi na vaai ai o le tagata e lelei le “nanu” o le tagata lena e matuā lelei lava le a‘oa‘oina.
O le vaitau lenei ua manino ai, a lē malamalama le toeaina ma le loomatua, le alii talavou ma le tamaitai talavou, le matai poo le faifeau o loo i afioaga i mataupu o loo aafia ai lona soifua maloloina, soifua tautua, soifua galue ma le a‘oa‘oina ona o le gagana, e leai se aogā o galuega faalauiloa o loo taumafai atu e unai.
O i tonu foi e sau ai ma faaiuga lē fetaui i le filifiliga o taitai o le atunuu
E fiu lava la e unai faiga palota lelei ma manino, e sipa lava auā e lē o malamalama ma mafai e le tagata palota ona malamalama i le tulaga o iai Samoa ma le faatinoga o ana auaunaga aemaise o le atina’e o le tamaoaiga.
Ona toe foi lava lea i le a‘oa‘oina o le Numera, o le togiga o pepa o le numera a se tasi o vasega 10 i se aoga maualuga i le talafatai o le taulaga na manino ai o loo tau panupanu mai lava nanu a nai tamaiti ma ua avea le sese o le kalama ma auala ua lē sa’o ai le numera o loo tau saili se tali ae e vaaia lava o loo iai le malamalama o le tamaititi i le fesili, atonu ana faamatala faa-Samoa mai, atonu e manino atu ana taumafaiga.
O se faataitaiga lelei lava o le iai o auala e faafaigofie ai ona a‘oa‘o lenei mataupu o le asiasi lea i le Fale Gaosi Uaea o le Yazaki EDS Ltd i Vaitele. O laupapa papae tetele o loo fetaia’i solo ai uaea nei e faapipii i Vaitele, o loo tutū ai le mamalu o le atunuu o loo maua avanoa i lea galuega ma ua faaigoaina o le ‘au sai uaea.
O le faapiipiiga o uaea nei ua matuā maioio lelei le ata i luma o le tagata lenei e faatino ai lea galuega. O lanu ma pine ua faaaogā auā le faapipiiga o uaea nei. Ae manatua foi o uaea eletise nei e fesootai ona ola lea ma ua sai faatasi ma faapine ona mafai ai lea ona sosolo le eletise o le afi o le taavale ma ola ai.
O le maualuga o le tomai lea i le numera lea ua ta’ua o le physics (fisiki i le gagana lata mai) o le maualuga o loo a‘oa‘oina i le Iunivesite.
O loo mafai ona fai e le tagata e lei oo le numera i lea maualuga auā ua matuā vaevae ma maioio lelei le vaevaeina o lenei galuega ma ua faafaigofie le auala e vave ai ona pue le faapipiiga o uaea nei.
O le tomai o inisinia mai i Iapani ua a‘oa‘o ai nei tagata Samoa ma o le toatele e mautinoa e lei maua galuega i le Yazaki ona o le lelei o le numera.
O le eletise lea ua mafai ona faagasolo i uaea felanulanuai nei ma pine (clips). Tuufaatasi atu e le alii poo le tamaitai Samoa ae faaaogā e faaola ai e inisinia atamamai i Ausetalia afi o taavale.
E uigaese ia ituaiga tomai ae e foi lava i le mafai ona faamatala lea ituaiga numera i se auala faigofie. E manatunatu ai lava pe faamata o ni auala e latalata i nei galuega e manaia foi ae faataitai ai fanau.
Manatua foi le faato‘ā a‘oa‘oina o le numera le faaopoopo ma le toese lea e faaaogā ai lava momono.
Ia e tele finauga, faapea e tele isi mau ituaiga numera e lē o lotea i lenei manatu faaalia, ae o le a‘oa‘oina o le numera i le Gagana Faigofie se isi manatu e manaia foi ae silasila i ai le Asosi o Faiaoga o le Numera, auā ua mautinoa lava le faigata tele o lenei mataupu ona o le faigata ona fesootai o fanau aoga i le gagana faigofie. Atonu o se mau e lē manaomia ni matematika faigata e taumate ma silafia ai e le atunuu.
