O le tele ma le anoanoai o tofiga ma auaunaga o loo faaaogāina ai lenei tamalii o le atunuu, e oo mai lava i le taimi nei, o loo ia taulimaina pea ia tofiga. O se matuā luitau tele lava lenei mo soo se tasi o maua le malosi atoatoa, ona o le afioga ia Tunumafono o se tasi e po le vaai ma le silasila. Ua mae‘a ona faataunuuina le vaega muamua o le miti a Tunumafono e pei ona sa ia naunau i ai mai le tele o tausaga ua tuanai, a o le‘i po lana vaai, e pei ona sa ia saunoa i ai. O le taimi nei o loo aga‘i pea mo le faataunuuina o isi vaega o lona soifua galue e pei ona faananau pea i ai. I le taimi na feiloai ai le Samoa Times ma le tamalii lenei, sa molimauina ai i le maitau ma le faalogologo i ana saunoaga, e atagia mai ai le tele o le meaalofa ma le faaaogāina e le Atua o lenei auauna.
O lana gaioi ma lana talanoa e oo lava i le faatinoina o isi galuega faigata, sa molimauina le faigofie ona faataunuu ona o le poto ma le atamai ua faameaalofaina ai e le Atua, ae manatu foi e lē mafai ona faaaogāina ma ausia le anoano o galuega e pei ona ta‘ua, pe ana le finafinau ma filigā e saili ma suesue.
E avea ai lenei avanoa e toe momoli atu ai le faamalo faapitoa ma le faafetai a le tatou itulau i lau afioga Tunumafono Avaula, ona o le taumafai aemaise o le soifua saili malo.
E lē gata i lea a o le faaavanoaina mai foi o lou taimi e faatalanoaina ai lenei lava tusitusiga, ma le agaga maualuga ina ia faatumauina ai pea le luitauina o soo se tasi lava e faitau i ai mo le lumanai. Ia manuia tele le lumanai mo lau afioga.
Soifua ma ia manuia
O le vaiaso fou o le a tatou silasila ai i se tasi o tamaitai Samoa muamua, a o se sui Pasefika foi ua ia laasia ma ausia le tulaga maualuga i totonu o le Matagaluega o Alaga‘oa ma Tupe Maua poo le WINZ i totonu o Niu Sila. O le afioga ia Falenaoti Losalina McAlpine, o loo avea ma faatonusili mo le WINZ i Aukilani atoa. O le a se‘i silasila i ai pe na faapefea ona aga‘i mai Samoa, sa a‘oga i Samoa, faigaluega foi mo Samoa i Samoa. Ae faaiu i se tofiga maualuga i totonu o Niu Sila.natua le vaiaso a sau.
