Ua faagasolo i le motu o Upolu faapea ai Savaii le sulu a le tupu tamaitai – Kuini Elisapeta le lua lea o loo feaveai ai lana feau tāua o le a tolaulauina i le tatala aloaia o Taaloga a le Taupulega.
O Samoa o le tasi o Malo e 71 o le taupulega o loo faagasolo ai lenei sulu ma le faamoemoe ia toe foi tonu i Initia i le taimi e tatala aloaia ai taaloga tetele nei a Malo o le Taupulega.
O le taeao o le Aso Faraile talu ai na faapea ona taunuu ai i fanua lea sulu ma na tauave mai e le afioga a Vaeolenofoafia le faauluuluga o le Komiti o Taaloga a le Olimipeka ma asosi taalo i Samoa, ma o le sui foi o le faalapotopotoga o le itulagi o le Pasefika poo le Oceania o loo lotolotoi ai i le pulega o taaloga a le Olimipeka ma Malo o le Taupulega.
O se ‘ava o le feiloaiga na faapea ona faafeiloai ai le taunuu mai o le sulu ma sui o Taaloga o le Taupulega mai Initia, ma o le afioaga o Satapuala lea na feagai ma le ‘ava o le feiloaiga auā le taunuu mai ai o le faigamalaga lenei.
Na mae‘a ona agai mai lea i le Maota o le Malo i le eleele fou lea na faatali ai e le Malo e ala i le Alii Palemia ma le Kapeneta le taunuu mai o le sulu ma faagasolo ai loa i afioaga o Upolu.
O le sauniga na faafeiloai ai le taunuu mai o le sulu i Samoa na saunoa ai foi le taitai o le malo, le susuga Tuilaepa Lupesoliai Sailele Malielegaoi i le tāua o se ‘ai o Samoa e tatau ona maua mai i nei taaloga faavaomalo.
E oo mai i le taimi nei e lei iai lava se pine auro a Samoa ua maua mai i taaloga a Malo o le Taupulega seia vagana ai pine siliva ma pine apamemea i taaloga o le Siisii Uamea Mamafa ma le Faipele.
O le tausaga lenei o le tamaitai siisii uamea mamafa Numera tasi a Samoa, le tamaitai o Ele Opeloge. Ma ua iai le faamoemoe o Samoa e ono ausia se pine auro muamua a le atunuu mai i ia faagatama.
O sui o Matagaluega ma Ofisa o le Malo na faapea ona filifilia faatasi ma alii ma tamaitai taaalo o Samoa ina ia faatamo‘e le sulu a le Tupu Tamaitai e pei ona faaigoaina ai i Upolu ma Savaii atoa.
