O le 2007, na filifilia ai e avea ma sui tauva o le pitonuu o Otara i totonu o le pulega faaitumalo i Manukau. Na manumalo ai ma avea ai lava ma sui o le Fono poo le Manukau City Council Otara Community Board, mulimuli ane toe avea ai ma taitaifono i totonu o lea lava fono faatonu o le itumalo mo Otara lava. O le tausaga 2008 na taitaifono ai e oo mai lava i le asō.
O galuega ia o loo auauna ai Tunumafono auā le tausia o le soifuaga o loo iai nei, aemaise o le faataunuuina o lana miti ma manaoga sa iai, e fia fesoasoani pea i lona tina ma lona aiga, e lē afaina poo le ā lava le tulaga ua oo i ai le malosi o le tino.
O isi auaunaga o loo auai le afioga ia Tunumafono ma faaaogāina ai lona soifua atoa ai ma lona tomai
O le tausaga e 2001 aga‘i mai i le tausaga 2010, sa faavaeina ai se tasi o auaunaga e faapitoa lava mo le toe a‘oa‘oina o tagata Pasefika e lē atoatoa le malosi o le tino i soo se itu lava. O Tunumafono o se tasi o sui faavae sa amataina lea foi auaunaga ma e oo mai lava i le asō o loo faaauau pea lea tautua. O le tausaga lava foi lea na toe avea ai foi ma faatonu, a o se sui faavae foi o le Tikura Trust, ma o loo iai pea lava foi i lea galuega e oo mai i le taimi nei.
O le 2002 e oo mai i le 2004, sa tofia ai o se sui usufono i le fonotaga faapitoa mo tagata Pasefika i le itu tau soifua maloloina. O le 2003, o le tausaga lea e pei ona ta‘ua i luga sa faavae ai lana ia lava kamupani, ae sa ofi atu ai foi i totonu o le fono faatonu, o le Waipareira Trust i se galuega faakonekarate, seia oo mai lava i le 2007 ma faamuta ai foi lea tautua.
O le 2005 na amataina ai se poloketi a le malo mo faiga e fesoasoani ai i fanau, aiga ma talavou, ma sa avea ai foi Tunumafono o se tasi o sui galue mo lea auaunaga mo le uluai taimi. O le 2007, na filifilia ai e fai ma sui o le aai o Otara i totonu o fonotaga faaitumalo o Manukau. O le tausaga mulimuli ane, 2008 na tofia ai e avea ma taitaifono o le fono faatonu o le vaega lava lea i Manukau.
Ma o loo ia umia pea lava ia tofiga e oo mai i le taimi nei. O le tausaga foi e 2008 sa avea ai ma sui sinia o le Otara Youth Committee, toe filifila foi o se sui usufono mo le Pacific Leaders Forum Group.
O le tulai mai o se sui o le tautua a le Lu‘i Ola, o se isi foi o luitau tele i lona soifuaga ona o le tele ma le anoanoai o avanoa sa tauasa mai ai, ma faaaogāina ai lona soifua, seia oo lava foi ina faavae lea auaunaga e pei ona faafofoga mai i ai i luga o le Radio Samoa. O le tausaga lava foi lea 2008, na avea ai ma se sui sooupu mo le vaega a le Lu‘i Ola.
Sa auai faufautua mo le vaega e puipuia ma vaavaaia le tulaga o le ava malosi i totonu o Aukilani atoa, le Alcohol Advisory Council. E lē gata i lea sa toe filifilia foi e avea o se sui i totonu o le Otara Community Law Centre, ae o loo ia umia foi se tasi tofiga o se sui auai mo le vaega e vaaia le vai mo Aukilani atoa mai ona itumalo taitasi. Watercare Auckland Advisory Council.
