O le valaaulia o le alii pese lauiloa o Samoa, le susuga Tolumaanave Misiluki Su‘a e faafiafia i le faaaliga tele o siva ma pese faa-Pasefika e faia i Siamani i le masina fou, o se laasaga maualuga lea ua ausia e lea tamafanau a le atunuu talu ona lauiloa i le taleni o le pese ma le faafiafia.
“Ou te faafetai i nai o‘u matua aemaise o lo‘u aiga ma tagata uma i le lagolagoina o lenei taleni ua manuia ai lo‘u olaga ma ua tua lelei foi i ai nai au taumafaiga mo le atinae o le aiga”, o le finagalo lea o Tolumaanave i se faatalatalanoaga ma le tusitala na faia i lona fanua fou e tusa ma le tasi le eka lona tele o loo i Tafaigata ua tolu nei tausaga talu ona faato‘a.
“O lo‘u valaaulia na sau sa‘o lava mai Siamani i se tasi foi o alo o si o matou nuu o Lepea o loo aumau ma lona aiga i lea atunuu, ma o loo taulamua foi ma isi tagata Samoa o nonofo i Siamani i le tapenaina o le faaaliga”, o le tala lea a le alii pese. O lea alo o le afioaga o Lepea o le susuga ia Tony Faleafaga e pei ona faailoa mai e Tolumaanave.
O le a faafiafia o ia i le faaaliga ma o le a avea foi ma avanoa e pu‘e ai ma sana MTV i Siamani. O le taleni pese a lea alo o le atunuu ua leva tausaga o faaiila pea ma tulei ina ia faatumauina ai le lelei ma le manaomia e tagata faafofoga. Fai mai Tolumaanave i le talanoaga ma le tusitala, o ana pese uma e fatu e fiafia i ai tagata.
“Poo se pese faitio e faaalia ma tuusa‘o ai ni lagona i ni faaletonu, e fiafia lava i ai tagata, a fatu foi ni a’u pese i evaga mālie a tupulaga e faapena foi, ae sili ona fiafia tagata i a‘u fatuga ou te pese ai i se faigauo a se alii ma se tamaitai, poo sa‘u pese aualofa i se tamaitai”, o le tali lea a le alii pese ina ua fesiligia i sona silafia i le tulaga alumia ma le fiafia o tagata i ana fatuga. Sa tuusa‘o foi le fesili ia Tolumaanave pe faamata ua fia ni tamaitai e tosina atu ia te ia ona o lana taleni.
“Ioe e toatele ae e le mafai ona manumalo ia te au faaosoosoga auā e tausisi lava i le tautoga ua uma ona osi feagaiga, ae e manaia pe a tau o sina lua pe tolu”. Na soisoi le alii pese auā ua na silafia lelei e faapea uiga o le taleni o le musika pe a faatusatusa i alii ma tamaitai pepese lauiloa o le lalolagi.
O le Aso Faraile e tuuvaa atu ai Tolumaanave Misiluki Su‘a mo Siamani lea e ui mai i Aukilani ma faaauau atu ai i Sini Ausetalia ma pue ai lana vaalele e faamaepaepa atu ai i Siamani. O le aai o Perelini poo Berlin o le a faia ai le faaaliga.
