Na tumutumu le faafiafiaga na faatautaia e Pagota o Tafaigata i le Laumua o le EFKS i Malua i le fonotele o loo faagasolo nei.
O se tasi lea o vaega na faatulaga le faatinoga o faafiafiaga faaleagaga mo le usugafono tele a le Ekalesia ae o le taimi muamua lea ua molimauina ai se polokalame a pagota ua mafai ona faatautaia i le Fono Tele.
O pese, siva, o tala faapea a‘oa‘oga faale-Tusi Paia na unai uma e pagota na auai i lenei faamoemoe ma na tele lava le loimata maligi aemaise o le pati a le toatele i polokalame a alii ma tamaitai o le Toese.
Na aofia ai ma ni pese faamatala o puapuaga o le faaola na molimauina ai se tasi o faafeagaiga ua taofia nei ona o le fasioti tagata paivalea na mafua mai i se feeseeseaiga i le po o le Kerisimasi i le fa tausaga talu ai i totonu o le aulotu na galue ai lea alii talavou.
O le iai o lea alii i le polokalame na vaaia ai le tumutumu o le malae a o faatino se tasi o a latou polokalame i le solo atu o faifeau, o aiga ma uo aemaise sui o le afioaga na tulai mai ai lea faalavelave ma feiloai i le faafeagaiga lea ua savali nei i le tausaga talu ona tuli lona faasalaga faafalepuipui.
O le auga o lenei faafiafiaga na faasilasila ane lava, o le sailiga seleni a pagota mo so latou malumalu e fia fausia i Tafaigata, ma o le tali ane a i latou na maimoaina lenei polokalame anapo, na manino ai le ootia o finagalo o le toatele sa i Malua.
O le tupe na aoina e tusa ma le 15 afe le fesoasoani na tusi mo le au faafiafia, silia i le 21 afe tala na aoina lava i le aao mafola ma le 10 afe tala a le mafutaga a Tina o le EFKS na foai sa‘o lava i le afiafi ananafi.
O le iuga o ia fiafia na faafetaia ai e le EFKS taumafaiga a lenei vaega o alii ma tamaitai, aemaise o upu faamalosi i le feagai ai ma nei sui o le atunuu ma faafitauli ua iu ai i le toese.
O le tatalo a le Ekalesia ia avea lenei polokalame ma auala e toe fotua‘i ai le soifua o i latou nei.
