E fiafia lava e faafeiloai ma toe faatalofa atu i le mamalu o le tatou atunuu, aemise lava o paaga masani ma le au faitau a le Samoa Times. E faamalo atu le folau, malo foi le soifua manuia. Ua tuanai atu se mau luitau sa maua mai le soifua aoaoina ma le soifua galue, o le afioga ia Tuifaasisina Tofilau Karl. E ui ina o se tamalii e le atoatoa lona malosi o le tino e pei ona e silasila ma faitau i ai, peitai ua atagia ma faamaonia mai ai le telē o le Atua o loo tatou auauna i ai, ua mafai ona faailoa mai i ana meaalofa mo lenei auauna. O se faamalosi ma se luitau mo i tatou uma ina ia aua le faavaivai ma faatuutuu i taimi e oo mai ai faigata faapea, ae ia silasila ma taulai pea i le Atua, o ia na ia faia i tatou, na te faaaogāina foi i tatou i galuega ma tiute e finagalo ai.
Ua maua ai foi ma se isi manatu o le tatou polokalame, o le a faaauau pea le galu o le itupa lava lea o i latou e le atoatoa le malosi o le tino, peitai o loo iai le poto ma le agavaa, e faatino ai galuega masani, e ui ina faatumauina gasegase ua aafia ai. O le a fai se soa o le afioga ia Tuifaasisina e pei ona sa faato‘ā mavae atu.
O le a se‘i tatou silasila ma faitau, i se tasi o le atunuu e po lana vaai, ae matautia lava foi le soifua saili ma le lē solomuli, mai le finauina o a‘oa‘oga ma galuega ua agavaa faapitoa ai. E le gata i lea, o le matua o lona soifua o loo ua iai nei, ae maeu lava le saili malo ma le agaga finau.
O le tofa ia Tunumafono Ava Faamoe, o se tulafale o le atunuu e moni ai le upu a le atunuu, E laititi ae maini. Na soifua mai Tunumafono i le aso 25 Setema o le tausaga e 1972, i lona afioaga o Sataoa i Safata.
O lona tamā o Toavalu Faamoe Tauiumi, ma lona tina o Aterina Lemafa o Sataoa lava. O le aiga Sā Sataoā ma le aiga Sa Afematā tupuaga o mātua o le tofa ia Tunumafono.
Na malaga mai i Niu Sila i le tausaga e 1982 a o faato‘ā iva tausaga o lona soifua. O le naunautaiga o le tuaa o lona tamā sa faafaileleina lona soifua i le atunuu, ina ia malaga mai i Niu Sila, e saili manuia ai mo le tausia o le aiga mo le lumanai.
E le gata ia maua le tulaga o aoaoga e pei ona tausinio i ai le toatele o tagatanuu o Samoa e autovaa mai ai i Niu Sila, ae o le tulaga foi o galuega, e pei ona siitia ai le mamalu o le atunuu e malaga mai i atunuu i fafo.
