Soifua aoaoina
Sa amata mai aoaoga i totonu lava o le afioaga i Sataoa i le latou aoga tulagalua. O le standard two na mae‘a ai le aoga i le afioaga, ona malaga mai ai lea i Niu Sila. Sa toe faaauau aoaoga i le aoga maulalo lava i Redoubt North i Otara, sosoo ai ma le Intermediate i Clover Park, ae faaiu i le aoga a le kolisi o Tangaroa i Otara lava.
Na faaiuina le aoga i Tangaroa ina ua aliae se faafitauli i le soifuaga o Tunumafono, ma ua amata ona faaletonu ai ma le vaai.
E tasi le tausaga na mālōlō ai e lei toe agai i se aoga, a o taumafai pea e nanā mai lona tina atoa ai ma lona aiga le faafitauli sa faafeagai ma le auauna.
O le faifai tetele ma ua agai ina mafatia tele i le faaletonu sa oo i ai lana silasila e mafua mai i ona fofoga. Sa oo ai ina ua iloa ma faamaonia e si ona aiga le mafatiaga ua leva ona faafeagai ma ia, ina ua lē mafai lava ona toe natia.
O le mae‘a ai o le tausaga atoa o nofo ai pea i le fale ma le onosai ona o le tulaga sa lē mafaufauina, ma na sii ai le gasegase i le falemai ma amata ai loa togafitiga.
O le tausaga e 1993 na atoa i ai le lusefulutasi tausaga, a o le tausaga tonu foi lea na feagai ai ma le taotoga o ona fofoga mo se togafiti.
E lei manuia le taotoga sa feagai ma Tunumafono, ma na faailoa ane ai ua lē mafai lava ona toe faia i ai se isi togafiti i le faafitauli, ma o le mafuaga lea na pō ai lana silasila poo lana vaai.
Sa ia ta‘ua o se tulaga e matuā faigata tele ona ia talia le laasaga o le soifuaga ua oo i ai. Ona e tele lava vaega sa mafaufau ma mafatia ai lona loto i le faaiuga ua oo i ai lona soifua i lea taimi.
O se tasi o tulaga sa mamafa i lona mafaufau, ona sa iai lona manatu o ia e matua i totonu o le aiga i le fanau a si ona tina. Sa iai foi la lona faamoemoe, o ia lava o le a fesoasoani malosi i lona tina ma lona aiga, e ala i se galuega na te maua mo le totogiina o le mokesi ma isi manaoga o le aiga i le tulaga tau seleni ma tupe maua.
