O lana tatalo i le Atua, afai lava o le tulaga lea ua oo i ai lona olaga, ua ia talia e ui ina faigata tele, ae afai na te silafia e iai se isi vaega e toe maua ai se avanoa e faaauau ai ona manaoga o loo iai, faamolemole ia faailoa mai ma fesoasoani mai. Na ta‘ua e le auauna e le mafai ona galo lana tatalo lea sa fai i le fogafale pito i luga o lo latou fale sa nonofo ai.
O le aso sa ia molimau ai e ese ni lagona ma ni manatu sa faamalosia ai lona mafaufau, ma sa talitonu o le tali lea o lana tatalo sa faailoa i le Atua.
O le tausaga e 1994, na tautino ai i lona aiga, o le a alu ese ona e alofa i lona tina ma ona tuāfafine ma lona uso, e le manao e faatigaina i latou ona o ia. Sa iai lava lona talitonuga o se auala lelei lea e mafai ai ona faatino ona manaoga sa iai pea, o le fia fesoasoani i lona aiga. O le tausaga lava lea na alu ese mai ai ae faatasi atu i se tasi o nofoaga i le aai o North Shore.
O lea nofoaga e faapitoa lava mo i latou ua po le vaai, po ua tauaso foi.
O totonu o lea nofoaga sa amata mai ai ona aoaoina ma ua iloa ai foi, e tele ma anoanoai isi avanoa e mafai ai ona lē toe faalagolago i se isi, ae mafai lava e lona tagata ona faia ma faatino.
Ua faagasolo pea aoaoga mo ia e faatatau i le savali i luga o le auala, aemaise o le taofiina o le pasi poo le nofoaafi foi e malaga ma toe agai ai i lona aiga.
O le faaaogāina o le tasi o polokalame o le touching type e faaaogā ai le computer, o nisi ia o vaega sa mafai ona aoaoina ai, ma ua faasolo ai ina galo le mafatia sa iai, a ua fotuai mai lagona ua lē ese lava ma tagata o loo pupula lelei o latou fofoga.
O le tausaga lava e 1994 na tauaaoina ai le tusipasi i le tulaga lava o pisinisi i le AUT.
O le 1995 na ulufale ai i le AIT i lena vaitaimi, ona o le faamoemoe e tauave le tulaga tau pisinisi ma lona talitonuga o le galuega e maua i le agavaa faapitoa pe a mae‘a, o le a fesoasoani e saili ai se galuega.
