O le tausaga e 1999 na faamavae aloaia ai loa ma tuua le matagaluega o tupe, ae filifili ua tatau ona tuu atoa lona taimi ma ona manatu ina ia saga fausia ma atinaeina le taaloga soka.
E tele ni pine faamau e oo mai lava i le asō, e faamaonia ai le tele ma le aogā o le galuega atinae sa tauaveina ma amataina e Toleafoa mo tupulaga lalovaoa a le atunuu mo lea foi taaloga.
O nisi o tofiga a le Asosi Soka ma le FIFA
Peresitene o le asosi a Samoa mo le 16 tausaga
Oceania
Treasurer Oceania Football (Soccer)
Vice President Oceania Football (Soccer)
Chairman Finance Committee Oceania
Chairman Development Youth & Women Football
FIFA
Referee Inspector International (World Under 17 & Under 20)
Referee Inspector Olympics Australia 2001
Referee Inspector World Cup Korea 2002
Commissioner Olympics 2004 Greece
Commissioner Women World Cup Canada, 2001 – 2004
FIFA Representative Committee Women Football International
Pep Committee Internal Audit & International Association Committee.
Sofua tautua i faalapotopotoga o taaloga
Sa failautusi i le Iuni Lakapi a Apia i le taaloga lakapi, toe failautusi foi i le taaloga o piiga a Samoa lava. Sa avea ma sui peresitene i le faalapotopotoga o taaloga a le atunuu, Samoa Sports & Olympics Committee.
Sa avea foi ma failautusi o le taaloga soka a o lei filifilia e avea ma peresitene o le taaloga soka lava i Samoa. Sa fai foi ma sui auai o le komiti mo le taaloga Hockey a le atunuu.
O nisi ia o agavaa ma tomai o le afioga ia Toleafoa, sa lauiloa ai i Samoa faapea foi le lalolagi atoa.
E talu lava ona avea Toleafoa ma sui sinia o le taaloga soka i lenei itulagi atoa e aofia ai ma le pasefika, e lei iai lava se isi atunuu sa tau aliali a‘e i faiga tonu ma faiga upu o lea foi taaloga, sa na o le afioga lava ia Toleafoa.
O nisi o faiga polokiki palapalā sa taumafai ai isi atunuu ina ia tulei ese Toleafoa mai le tofiga sa iai, ae toe faatulai mai se isi tagata, talu ai e lei manumalo lava se isi sui e ala i faiga palota tetele sa faia muamua talu ona tulai Toleafoa i tofiga.
O le faaleleia o malae taalo ma fale matamata ma isi tulaga uma o loo i Samoa, mo le taaloga soka lava latou ia, o nisi ia o galuega iloga sa mafai ona faia ona o le galue punouai ma le tinou o lenei tamalii.
O le tulaga foi lea sa oo lava ina tuuaia ai i lana galuega, peitai sa lei faavaivai ai lona taumafai, ae sa faamalosi pea ina ia tino mai malae taalo mo le taaloga soka mo Samoa.
E toe tasi lana miti e lei faataunuuina, talu ai ua faamalosi ona aveeseina mai ona tofiga, ae sa iai lava le faamoemoe o le tausaga talu ai sa tatau ona faataunuuina ai.
Sa naunau lava le tamalii o le atunuu ina ia faia foi se malae lelei mo le motu i Salafai, e pei lava ona sa iai fuafuaga, peitai o le tasi lea o tulaga o loo faanoanoa ai, ona ua lē taulau lea foi manaoga ma le miti sa iai.
Ae ui i lea o loo iai pea lona faamoemoe, talosia ina ia afea e se finagalo o i latou ua tauaveina nei le taaloga i le atunuu. Ua avea nei ma matai tausi aiga ma le vaaia o le afioaga i Fausaga.
O ona agavaa ma ona tomai sa valaauina ai mo galuega e tele a le malo, o loo iai pea ma o loo faamoemoe e lei uma ai le tausinioga, ae tamoe pea ma silasila i se isi avanoa e toe tatala mai e le Atua, ina ia faaaogāina ai pea lona tagata, a o maua le malosi e auauna ai.
Malo le saili malo, ma le faaeaea atunuu, Ia viia le Atua, ma ia manuia laasaga o le lumanai.
