Talofa lava, O le vaega lona lua ma o le vaega faaiu foi lenei o le talaaga o le soifuaga o le afioga ia Toleafoa Tautulu Roebeck mai Fausaga i Safata, Lotopa ma Moamoa i Apia.
Toleafoa Tautulu Roebeck
O le uluai galuega a le afioga ia Toleafoa ina ua mae‘a a‘oa‘oga, sa muai galue i le Ofisa o Tupe a le atunuu (Treasury). O le tausaga e 1970 sa amata galue ai seia oo mai i le tausaga 2001. O totonu lava ia o tausaga e tele sa tautua ai i totonu lava foi o lea Matagaluega, e fai lava si tele o suiga sa auauna ai lea tamalii mai matata ma tiute tauave.
Position: Clerk, Supervisor,
Associated CEO Administrator
: Manager Special Project; TAP, Energy
: Matagaluega o Tupe (Treasury Samoa)
O tulaga ma tofiga e pei ona silasila i ai, sa faataunuuina i totonu o le 30 tausaga sa auauna ma galue ai i le Matagaluega o Tupe. Ae o totonu lava foi o ia tausaga sa faapea foi ona toe tofia ai e avea ma faauluuluga o galuega tetele ma fesootaiga ma isi matagaluega a le malo, i fuafuaga alualu mamao a le Treasury.
E pei ona silasila i ai, sa avea ma Project Manger, o lona vaaia lea ma faauluulu i ai faiga ma galuega sosoofaatasi ma Matagaluega e pei o le Malosi Faaeletise. O le TAP poo galuega saili tupe e ala i taaloga ma petipetiga, o isi foi ia o auaunaga sa faamoemoe i le silafia ma sa pulea foi e Toleafoa.
Sa toe filifilia foi e avea ma sui failautusi o tupe mo le komiti faatonu a le Iunivesite a le Pasefika i Saute, le USP (Financial Secretary USP Committee). Mulimuli ane sa toe tofia e avea ma sui o le Ofisa o Tupe mo le Matagaluega a le EPC, Ofisa o Pisikoa, o le ACP atoa ai ma le kamupani Vaa a le atunuu.
O le 1981 na faamalolo lē tumau ai le afioga ia Toleafoa mai ona tiute uma sa tauaveina mai le Ofisa o Tupe a le malo.
Na mafua lea tulaga talu ai ona o lona lagolagoina o le solotetee a tagata faigaluega sa faataunuuina i lena vaitaimi.
E tusa ai ma le aiaiga sa faataoto i lena vaitaimi e taofia ai aiā tatau aemaise lava tagata faigaluega a le malo e lē tatau ai ona auai ma lagolago le solotetee.
Peitai i le finagalo tutoatasi lava ia o le auauna i lena foi vaitau ma le tulai mai o le faamoemoe a le PSA, sa ia lē mafai ai ona taofia le aiaiga ma le taofiga a le PSC, ae sa faatino pea lana aiā tatau e auai i le solotetee. O le mafuaaga lea sa faia ai le faaiuga ma faamalolo le tumau ai o ia mai ona tiute ma galuega a le Ofisa o Tupe.
O le iai i malologa ma le faataunuuina o le faaiuga a le PSC, sa lē avea ma auala e nofonofo ai, peitai sa vave ona piki ma faafesootai ane e le Ofisa o Pisikoa, ma ofo ane i ai se galuega.
O se konekarate e 12 masina sa tuuina ane e galue ai mo le vaega o a‘oa‘oga faafaufautua i totonu lava o le Ofisa o Pisikoa, sa sainia ai se maliliega.
E lei faaiuina le 12 masina e pei ona sa malilie i ai ma sainilima ai ma le Ofisa o Pisikoa, talu ai sa toe maua ane se valaau faapitoa mai le Ofisa o Tupe, ina ia toe taliu ane mo le faaauauina o ana galuega ma ona tiute sa iai muamua.
E na o le 3 masina talu ona amata i le Ofisa o Pisikoa, ae toe faia le faaiuga e talia ai le valaau ane a le galuega sa iai muamua.
