Fesili – Aisea e lē toe mafai ai ona tāpā le Redundancy tax credit pe a mae‘a Setema?
Tali – Na pasia le redundancy tax credit i le tausaga 2006 a o 39% le lafoga pito i maualuga. O le agaga o lenei tulafono ina ia aveese le mamafa o le lafoga a le tagata lea sa maualalo lava lana pasene lafoga, ae ona o le telē o lona totogi maua mai i le peimeni o le redundancy, ua mafua ai ona tulei i luga i le pasene maualuga. Ae ona o lea o le a sau i lalo le pasene lafoga pito i maualuga, mai le 38 i le 33 e amata i le masina fou, o lea foi la ua toe sui le tulafono e lē toe mafai ona apalai se tupe faafoi mai.
Fesili – O le ā le mafuaaga e ala ai ona toe totogi lau lafoga, a o lea ua uma ona suesue le ofisa fai totogi o le matou fale faigaluega, e sa‘o lelei le tax code le la e fua i ai le tipiina o la‘u lafoga?
Tali – Afai e totogi oe tai vaiaso, e ono uma ifo le tausaga e atoa le 53 o ou totogi na fai. E fuafua lava i le aso na fai ai le totogi. O isi fale faigaluega e tai lua vaiaso ma fai totogi, a faitau le aofai o totogi na fai e ono atoa le 27. Ae manatua o fua faataatia o totogi ma le aofai o lafoga e tipi, o loo faaaogā le 52 vaiaso i le tausaga, poo le 26 tai lua vaiaso i le tausaga.
Fesili – O ā ituaiga pisinisi e mafai ona faila tai ono masina le GST? O ā foi ni itu lelei ma itu leaga o le tai ono masina ma faila le GST?
Tali – Na o pisinisi laiti e i lalo o le $500,000 i le tausaga le tupe maua e mafai ona tai ono masina ma faila le GST. O itu lelei nei:
- faamaualalo le tau o le failaina o le GST auā na o le faalua i le tausaga ona faila.
- mafai ona faaaogā le tupe lea e tuu ese mo le GST, e totogi ai isi pili lata mai.
A o ona itu leaga:
- E oo atu i le taimi e totogi ai le GST ua lē mafai ona totogi ona faasala lea.
- Umi le taimi o faatali mo se refund.
- Faigata ona iloa aluga o le pisinisi i taimi uma pe afai e faatali mo le ono masina mo se lipoti.
Fesili – Se fautuaga mo le vaitaimi pito i sili ona fetaui mo lau pisinisi e i le va o le $200 ma le $280 afe le tupe maua.
Tali – A fuafua atu i Iau tupe maua, e iai taimi e maua lau refund e iai foi taimi e totogi le GST. Talafeagai le tai lua masina ma faila, ona e tele atu ona itu lelei i lo itu leaga. Se‘i vaganā ua e mautinoa e maua sau refund i taimi uma, ona apalai lea e faila tai masina.
Fesili – O a‘u o le palama, ou te selau pasene i fesootaiga o paipa o umukuka ma fale taele, ae fai sina vaivai o la‘u numera. Se‘i e faamalamalama mai pe fia le GST i lalo o le siitaga fou, pe a faapea o le aofai atoa o le galuega lea ou te manao e totogi mai e $450?
Tali – GST $58.69. E maua pe a faatele le 450 i le 3, ona vaevae lea i le 23 (450 x 3 / 23).
Fesili – Ae a faapea o le aofai o la‘u galuega aofia ai le leipa, ma le tau o parts e $620, e fia le GST ma le aofai atoa o le pili?
Tali – GST $93 (620 x 0.15), aofai atoa o le pili $713 (620 x 1.15).
