O le toe ofo ane e le Matagluega o Tupe o tiute a le afioga ia Toleafoa, sa iai foi ma se aiaiga e faapea, o le a toe totogi uma ane lava masina e tolu sa faamalolo ai mai le Ofisa o Tupe, pe afai ae toe foi ane ma faaauau le galuega.
O le saunoaga a Toleafoa sa ia mautinoa lava lona fia galue pea mo lana galuega sa iai, atoa ai ma le faaaogāina tatau o lona tomai, sa faigofie ai ona talia ma faia lana faaiuga e toe foi ma faaaogā agavaa sa faapitoa i ai.
Tupulaga Talavou ma Taaloga (Youth and Sports, Treasury)
O le toe taliu ai mo le Ofisa o Tupe, sa toe tofia ai foi e le malo e fesoasoani lona lua i lē sa faauluulu i ai le vaega o taaloga a le atunuu i lena lava vaitaimi (Assistant CEO for Youth and Sports).
O le tofiga a le malo mo le faatonusili fesoasoani mo Tupulaga Talavou ma Taaloga o se valaau tāua tele e pei ona saunoa i ai Toleafoa, ona o le faaopoopoina o nisi foi agavaa fou mo lona tagata.
E ui ina foliga ua faateleina ana galuega ma tiute tauave, peitai o se luitau lelei tele mo ia, e faailoa ai meaalofa a le Atua ma lona faaaogāina a o maua le malosi.
Vaitaimi o Afā malolosi o Ofa ma Valelia (Galuega ma tiute faaopopo – Ofisa o Tupe)
O le tausaga e 1990 ma le 1991, e manatua pea e Samoa, tasi ia o taimi leaga i le atunuu ona o afā tetele e lua sa aafia ai le atunuu.
O le mae‘a ai o le afā muamua, Cyclone Ofa, ma amata ai ona agai atu le mau fesoasoani o taumafa mai atunuu i fafo, sa tofia ai le afioga ia Toleafoa Tautulu, e avea ma faauluuluga o le komiti mo le vaaia ma le faasoasoaina o ia fesoasoani.
E lē gata i fesoasoani o taumafa, ae faapea foi fesoasoani tau tupe ma isi lava vaega sa foai faameaalofa atu i fafo e atunuu eseese.
Na ta‘ua e Toleafoa, o se tasi foi lea o vaitaimi e lē faagaloina ona o le faigata tele aemaise ai e tau faamae‘a atu tapenaga o Ofa, ae toe afātia foi i le isi afā malosi o Valelia i le 1991.
Sa pei o se galuega faaauau lea foi tulaga talu ai, e sosoo lava tausaga o ia tauaveina pea lea foi tofiga faaopoopo, o le vaaia o fesoasoani mai fafo.
1993 – 1997 (PSA)
O tausaga e pei ona ta‘ua i luga sa toe tofia ai foi e avea ma Failautusi o le PSA, mulimuli ane i totonu lava o lea piliota sa toe tofia ai ma soloa‘i ane ai loa mo le tofi Peresitene o le faalapotopotoga o tagata faigaluega a le malo le PSA.
O le tausaga e 1998 na faamavae aloaia mai ai i tofiga a le PSA sa ia tauaveina, talu ai ua fai lava si tele o le mau galuega ma isi tiute faaopoopo.
Sa manatu ai ua tatau ona faamaamulu ese nisi vaega o le tautua, ae se‘i agai ma faatonutonu le mafaufau ina ia galueaina lelei isi foi tofiga sa tauaveina.
Manatua foi o le tele o tiute sa faaopoopo ane, ae o le taimi lava lea o loo ia galue ai pea i totonu o le Ofisa o Tupe a le atunuu.
O le tele o galuega sa tauave, o isi lava matata o lana galuega sa tofia ai, ma e tatau ai lava ona faataunuuina pea, ona o aiaiga ma maliliega o tiute o le pule lagolago.
O le 1992 na uluai tofia ai e fai ma Peresitene o le taaloga soka a Samoa. E oo mai lava i le 2008 ina ua tulai mai nisi o faafitauli ma feteenaiga ma le faatina o le soka i le lalolagi, e lei toe palotaina lava lea tofiga sa ia Toleafoa Tautulu Roebeck.
O le lagolagoina tele o lona tagata, ma le faamoemoeina i galuega sa tauaveina, sa mafua ai ona tuu pea i ai le faatuatuaga o le Asosi Soka a Samoa.
