Avatu pea le faamalo i le mamalu o le tatou au faitau mo lenei foi vaiaso. Malo le galulue, aemaise foi o le tapuaiga i tamā ma tina matutua o le tatou atunuu, o loo fai pea ma a latou paaga lenei itulau o le Samoa Times i vaiaso taitasi. E ui lava ina tuufaitia lo outou soifua ma lo matou ola i faafitauli o le olaga nei, ae faapea foi le malaga lē faatuaoia a le maliu ma le oti, peitai e maualuga pea le viiga o le Atua ona o le sasaa mai pea o lona alofa sautualasi ia te i tatou lana fanau.
O le faaopoopoga o le vaiaso nei, ua manatu o le a sei toe liliu ma toe asia si o tatou atunuu i Samoa, talu ai o avanoa e lē aumaua i le malaga mai ma le autovaa mai o nisi o tamalii iloga o le atunuu i totonu o galuega ma matagaluega a le malo, i le taumafaiga ma le atinaeina o le atunuu.
O se avanoa tāua tele ma se faamanuiaga le mafai ona feiloai atu i tamalii ma sui mai lo tatou atunuu pe a malaga mai, ma afifio mai i Niu Sila, auā e faasoasoa ai la tatou galuega, ma saga faamatagofie ai pea la tatou itulau mo lau faitau.
O se tasi lenei o tamalii ua loa ma ua leva ona galue mo le taumafaiga o le atunuu i Samoa.
E lē gata i le matata faapitoa ma le matagaluega sa galue ai mo le malo, ae sa matuā iloga foi lona tulai mai i le tulaga o le atinaeina o taaloga, aemaise lava le taumafaiga o le taaloga soka i le atunuu.
E silia ma le 30 tausaga sa galue ma tautua ai i le Matagaluega o Tupe a le atunuu (Treasury).
O ia foi tausaga uma sa lei taga tasi ai lona silafia, peitai sa matuā faaaogāina lelei ma le tatau ia taimi e lē gata mo lana matagaluega sa auauna ai, ae faapea foi isi matata eseese e iai ona fesootaiga mautu ma le ofisa o tupe a le atunuu, sa avea ma galuega autū mo ia.
E lē gata foi i galuega ma taaloga i totonu o Samoa lava latou ia, ae sa ia tauaveina foi nisi o tulaga maualuluga i le fesagaiga ma le tele o atunuu, ma sa agiagia ai le fua o Samoa i le lalolagi atoa.
E iai fo se isi gaioiga matautia semanū a faamauina ai le igoa pele o Samoa i talafaasolopito i le lalolagi, peitai o le ava i taitai o le atunuu, faatasi ai ma le loto maualalo sa toe liuliu ai ala o le lupe, ma suia ai le finagalo o lenei tamalii, na lē mafai ai ona faaauau le manaoga sa ia te ia.
Toleafoa Tautulu Robeck
Aso Soifua: 15 Mati 1951
Afioaga: Fausaga, Lotopa, Moamoa
Tuaa: Thomas Robeck ma Fiailoa Toleafoa
Na soifua a‘e le afioga ia Toleafoa Tautulu mai ona mātua e pei ona ta‘ua i luga, i totonu lava o le afioaga o Fausaga i Safata.
O lona tamā o Thomas Robeck mai Lotopa, a o lona tina o Fiailoa Toleafoa mai le afioaga o Fausaga i Safata.
O Moamoa i Apia o loo faaaiga lua i ai le afioga ia Toleafoa i le taimi nei, o sona fanua faatau sa faamautu i ai i le taimi o galuega ma lona soifua galue.
Ua avea ai foi Moamoa o se isi o ona nuu ma afioaga i le faitauina o alalafaga i lona soifua.
