O loo tutupu mai pea faaletonu i totonu o Ekalesia e mafua mai i le fai lē malamalama o tiute o faifeau, ua faaseseina ai tagata lotu.
O tiute ia e talanoaina o tiute i fafo atu o tiute masani o faifeau; mo faiga lotu ma tiute faale-Tusi Paia.
Consulation – Soalaupuleina o Mataupu:
Soo se mataupu lava e aafia ai aiā a tagata lotu i totonu o se Ekalesia, e faasā i le tulafono ona omai faifeau poo tagata uu tofi o Ekalesia ma se faaiuga e ta‘u i le Ekalesia e faatino pe talia, ae lei talanoaina muamua e le Ekalesia ma faaali manatu o tagata o le Ekalesia.
O tagata uma o le Ekalesia, e amata mai i ē matutua e oo i sui o le autalavou, e tāua manatu faaalia, ma le talanoaina malamalama o mataupu, faato‘ā fai ai faaiuga. E fiafia foi tagata o se Ekalesia e faatino ni galuegafai, pe a fai ma le malamalama ma le loto malie.
Ae o fea ea e mafua mai ai nei mea e tutupu mai i totonu o Niu Sila i Ekalesia ia e filogia i papalagi ma isi atu Pasefika. O Ekalesia nei e iai a latou tusi tulafono. O tusi tulafono a nei Ekalesia, e i lalo o le faamalu o le tulafono a Niu Sila atoa. A iai se tulafono a se Ekalesia e soli ai aiā a tagata lotu, e mafai ona ave se tagi a tagata lotu e sui le tulafono a lea Ekalesia aoao, lea ua soli ai aiāa a tagata.
A o lei aveina se mataupu i le tulafono, e fautuaina lava le taumafai e muamua soalaupule i lotoifale se mataupu a o lei aveina i ni fale faamasino.
O lua mea ia e tutupu mai i le taimi nei i Ekalesia e pei ona ta‘ua i luga, o faifeau papalagi e iai lava le latou talitonuga e na o latou o loo iloa ma malamalama i tulafono tusia a le Ekalesia aoao. O le talitonuga sese lenei latou te faatonu ai tagata o Ekalesia, e fai mea o loo mananao ai faifeau, ae lē o mea ia o tusia i totonu o tusi tulafono.
I lo‘u talitonuga, o le tele o faifeau papalagi, e fai pogisa a latou saunoaga. E faapea foi a tatou faifeau Samoa. E lē malamalama i tusi tulafono a Ekalesia. O tofi faifeau, e lē a‘oa‘o ai galuega feagai ma loia, ma suetusi ma foma‘i. O galuega a faifeau o le Tusi Paia. O le galuega a le loia o le faitauina ma malamalama i uiga o upu eseese o le tulafono a Niu Sila, tulafono a lotu, ma tulafono a le lalolagi, ua saini ai Niu Sila (International Law) e aafia i se mataupu. E mataala foi le loia e faitau ma aiai faaiuga a faamasinoga e aogā i se mataupu o i luma o le loia.
O le isi mea lea ua tulai mai, a finau atu loa se Samoa e malamalma ma iloa, e sese mea ia e fai mai ai faifeau papalagi, tuu mai loa e faifeau papalagi faifeau Samoa e tau Samoa ma Samoa. O le isi laasaga lea ua fai nei. Ua lalafi faifeau papalagi ae tuu mai faifeau Samoa e feagai ma Samoa. O lea tulaga ua fai ona o le talitonuga o faifeau papalagi, o tagata o Ekalesia e lē tali upu i faifeau, ona o le faaaloalo faa-Samoa.
Aua ne‘i faaseseina i tatou o i totonu o Ekalesia filogia. O le tele o faifeau papalagi i totonu o Ekalesia ia, e lē malamalama latou i o latou tiute i luga o le tulafono.
O tiute o tatou faifeau Samoa o le faaali i o latou uso faifeau papaplagi, o le faa-Samoa, e soalaupule mataupu uma, ia maua se maliliega o latou e faia tonu o se Ekalesia.
Manatua e mafai i totonu o se nuu i Samoa ona faatulai se faifeau e na te faia se mea sese i totonu o se nuu.
E manaia le galulue faatasi o Ekalesia ma faifeau malamalama, ma faifeau e amanaia leo o le Ekalesia. E lē o le faatonu mai loa e papalagi, omai faifeau Samoa aumai faatonuga i o tatou tagata, ma taumafai e faamalosi le taliaina e o tatou tagata Samoa o ni faatonuga e aumai faamalosi, ae lei sailia le manatu o le Ekalesia.
E iai le leo o tagata o le Ekalesia, o leo o tagata o le Ekalesia e puipuia lea i le tulafono a Niu Sila. E iai le tiute o faifeau i tagata o Ekalesia. E matuā faasā i le tulafono ona soona pulepuletutū e le faifeau tagata lotu, ona o le faaaloalo e ave i faifeau i luga o le aganuu faa-Samoa.
A lē mananao se Ekalesia e ta‘ita‘i latou e se faifeau Samoa, e iai le aiā a le Ekalesia e tetee ai se faifeau Samoa, e ave atu i lena Ekalesia e papalagi.
Faaaogā tonu aiā a Ekalesia, e filifili lelei ai se faifeau e talitonu le Ekalesia e mafai ona latou galulue faatasi i le galuega a le Atua.
Ia manatua foi e Ekalesia, e gata le malamalama o le faifeau i lana matafaioi. O se faataitaiga, o mataupu tau tupe a Ekalesia, e tatau lava ona aami se tagata e agavaa i mea tautupe, e fautuaina le Ekalesia. E alu tupe e totogi ai se Accountant ma se Auditor, ae sili le puipuia i lo le togafitia. Manatua o Ekalesia uma e iai tiute e lipoti ai i vaega eseese o le malo, ia galuega e alu ai tupe a Ekalesia. O tupe o lafoga, o mea totino o le faaaogāina o tupe a le Ekalesia, e faatapulaa uma i luga o le tulafono nei vaega.
O tulafono, o aiā tatau a faifeau, aiā a tagata lotu, o matafaioi ia e mafai ona saili se loia e malamalama i galuega a Ekalesia, e fautuaina Ekalesia, ma tusitusia tulafono e tatau ona uia.
Manatua e leai se Ekalesia i Niu Sila e na ona fai e faifeau faaiuga ma ave i tagata lotu faatonuga fai. Tusa poo ni faatonuga e aumai e faifeau papalagi, ia fesili pea, ia malamalma. Aua le taliaina pogisa ni faaiuga e lē tatau ona uia e se Ekalesia, ona e faapea o le faifeau papalagi sa aveatuina le faatonuga. E tutusa lava le lē malamalama o le faifeau papalagi ma le faifeau Samoa, i le auiliiliina atili o tulafono e afaina ai aiā tatau a Ekalesia.
Tausisi e soalaupule mataupu, ma manino mea uma a o lei faia ni tonu e afaina ai le alu i luma a galuega a Ekalesia.
