O le alu tele o le mafaufau o Pula ia Luama, na iu ai ina galo ia te ia, sa iai lana fuafuaga e oso agai i uta lana taavale e ui atu i Aleisa e lelei e vave ma gaogao le auala, ae o lea ua toe manatua ane ua toeititi oo le taavale i Nofoalii.
Na iu lava ina tau le mafaufau o Pula, ‘sei vaai atu lava aluga o le tausaga poo fea e fai i ai. A fai atu lava e le mafai ona toe lelei se mea e aunoa ma lenei tamaitai, e iu loa ina ou taumafai e mei i Niu Sila.’ Ua alu pea le taavale a Pula ma faasolosolo ona mafaufauga, ona ki lea o lana leitio sei faalogo le taimi. E fetaui lava le ki atu o le laau, ae faapea mai loa le alii faasalalau ‘sei vavae foe o le tatou polokalame i se pese.
O lenei pese e aualofa atu ai mo i latou uma lava o iai ni mea o faaletonu ai foi le mafaufau ma faalogona i lenei taimi o le taeao, poo i latou foi o lofia i faanoanoaga o ni mafutaga ua valavala.’ Ona ta mai lea e le tama faasalalau o se tasi o pese o loo tele ina fiafia i ai le au faalogologo i lea foi vaitaimi, o le pese a Felise Mikaele, ‘o loimata i le tuugamau.’
Ua ta le pese, ua faalogo atu Pula, tafefe, ua le mafai ona toe tatali ona loimata i lea taimi. Na iu lava ina afe lelei lana taavale i lalo o se tamaligi tele lava i gatai ifo o Fasitoouta, ma tape lelei le taavale, ae matua saofai ma tagi lotulotu.
E faia pea
