E lei vave o le faaeegavaa i a latou taavale, ae ua toe alu le solo agai i luga i le mea e tutu ai ma talotalo atu i fafo a o savavali atu tagata i le vaalele. O le mafaufau foi le tina o le teine, e peiseai ua le toe fia foi le faletua i lo la fale, ae ua na o le tutu lava ma tilotilo atu i le taimi o le a alu ane ai si ana tama i fafo. Ua faasolo ane nei tagata, ma o le taimi lava na vaaia ai e le fafine o Puna le savali ane a Luama i fafo, na toe faufauee ai le fafine ma valaau lana tama e toe foi mai, ae paga lea, ua le lagona mai e Luama, lea o loo savali lava ma talotalo mai foi lona lima. Ua laki lava e le o lagona mai e Luama lenei valaau a si ona tina, na semanu e leiloa pe toe foi mai lava le teine i fafo.
Ua amata lava ona ola le vaalele ma faasolosolo ai ina alu ese atu ma le malae, ae o loo tilotilo atu pea si ulugalii ma soona talotalo lava o la lima, e ui lava ailoga o iloa lelei mai e le la tama i totonu o lona tamai faamalama, ae o loo talotalo pea ma loimata nei matua.
Ana le masii lava le vaalele ma ua mou ese atu lava le tino mai le vaai, e le amata loa ona savalivali ane i lalo le faaeegavaa a Talimai ma lona aiga. Ua latou savalivali ane ai lava faatasi ma si alii aoao o Pula, lea ua tau leai lava ni ana tala o faia, ua na o le savalivali filemu lava e pei se tagata e le masani ia i latou o loo latou savavali faatasi.
Na taunuu i luga i le paka o loo iai taavale, ona toe talatalanoa laititi ai lea iina ma si alii aoao. Ua faafetai atu Talivai i le alii aoao ona o le tigaina lava e sau i le mea mamao e faaee le tamaitai ua alu nei lana aoga. Ua na o le ataata o si tama, ma faapea mai, ‘talosia ia tatou tatalo ma tuu i luma o le Atua le aoga a Luama ia iu manuia.’ O le fafine o Puna, o loo tutu lava ma maligi ona loimata, ma uu le ata o si ana tama, lea na sau lava ma ia mai le fale.
Ona faamavae loa lea o le ulugalii ia Pula, ma ua valaaulia foi e alu atu i se isi aso latou te tafafao ma momoe pe a maua sona avanoa mai lana faasologa pisi. Ua ioe atu i ai le aoao ona taufai o ese loa lea o taavale a le au faaeevaa, ma uma atu ai lea aso faanoanoa nai Faleolo.
Ua foi nei Pula i lona aiga, ae ua le alu i le aoga i lea aso. E alu lava lana taavale ae ua pogisa atoa lona mafaufau, poo fea a tua i ai ona faalogona faavalea ia Luama. Ua mafaufau si alii, maimau e, pe ana faapea e alu ese atu Luama, ae ua matua maoti lelei mai se fuafuaga mo laua. Peitai o lea mea lea e iai nei, o loo faailoga fesili mea uma, aua e foliga e fua lava i le tulaga o le a iai le mafaufau o le tamaitai pe mata e toe manatua mai o ia.
