Faaaliga 21
Talofa lava i le suafa paia o Keriso lo tatou Alii Faaola. O Ia o lo tatou Puluvaga, le Faaola ma le na suia o taua ola e ala i le foai mai o lona soifua ina ia mafai ona ta maua le ola e faavavau.
O Keriso lenei o loo faailoa mai e le Tusi Paia e faapea ‘E leai lava se tasi ua iai le ola, e leai lava se isi igoa i lalo o le lagi, ua foaina mai i tagata e mafaia ona faaolaina ai o i tatou’. Galuega 4:12.
E pei ona taua maitauina i mataupu ua tuanai o le Tusi o Faaaliga, o Keriso o Ia o le Alii o le Manumalo. E oo lava i le oti ma le tuugamau. E lei mafaia e au a Satani ma ona fili ona faatoilalo Keriso. Ua foaina atu ia te ia le pule e pei ona ia faailoa atu i lona au soo “Ua tuuina mai ia te au le pule uma lava o le lagi ma le lalolagi”. Mataio 28:18.
O le pule lea ua i mea uma na faia e pei o le mau a Ioane “E leai foi se mea e tasi na faia e lei faia e ia. Ioane 1:3. O le upu e saunoa atu ma fetalai atu ai ona tulai mai lea o mea ma usitai uma o mea na faia ia te ia.
O ia foi lea na saunoa, ona filemu ai lea o le matagi ma le sou o le sami ae talitonu ai le soo, e moni lava o Keriso o le Mesia, le Alo o le Atua liu tino tagata, ae le na o se Perofeta e pei o le mau a isi talitonuga.
Ua mavae atu le vevesi na iai ina ua faatoilaloina le fili ma lafoina i le lepa afi e faavavau e pei ona iai i mataupu ua tuanai.
Atonu o se taimi lea ua faatoa mapu le mafaufau o Ioane ma tau toa mai lona moa ina ua mavae le tele o mea faigata ma le matautia na ia vaaia.
Ae o lea ua iai le suiga matautia lenei ua vaai atu nei i ai, lea o le a ia taumafai e faamatala mai ia i taua ina ia avea o se mea e faatupu ai lo taua naunau ina ia maua le ola e faavavau.
Fai mai Ioane ‘Na ou iloa lea o le lagi fou ma le lalolagi fou’ aua ua mavae atu le uluai lagi, ma le uluai lalolagi ua leai foi se toe sami. (21:1)
O se mea ese i le vaai a Ioane, ua le toe iai se sami. E faigata i le mafaufau ona fuafua le lalolagi fou o le a tatou iai aua o le lalolagi lea tatou te iai nei e fitu sefulu lima pasene o le fogaeleele o le sami e pei ona faamauina e alii ma tamaitai saienitisi.
O le fesili tele lava e tulai mai pe aisea o le a le toe iai se sami. O nisi o faiaoga o le Tusi Paia e manatu e faapea o le sami tele o loo tumu ai le fogaeleele o loo faamanatu mai ai ia i tatou e le gata o galuega mamana a le Silisili Ese, ae e faamanatu ai foi ia te oe ma au le toasa o le Atua e pei ona iai le taimi o le lolo i ona po o Noa.
E pei ona faailoa mai e Peteru o le lalolagi tuai i ia ona po na faaliloina i le vai ma toe amataina e le Atua ina ua mavae le lolo. Peitai o le lalolagi nei o loo tatou iai o le a faaliloina ma faaumatiaina e le afi e pei ona tatou aoaoina i nai vaiaso ua tuanai.
Aua latou te mananao e lilo lenei mea ia te i latou, sa i le lagi talu anamua, atoa ma le lalolagi, na faia mai i totonu o le vai e ala foi i le vai ona o le afioga a le Atua. O le mea foi lea sa faaumatia ai le lalolagi tuai ina ua lofia i le vai. Ao le lagi ma le lalolagi i ona po nei ua tuu mo le afi ona o lea lava afioga; ua taofia ai foi mo le aso e faamasino ai ma fano ai tagata faalematau”. 2 Peteru 3:5-7.
E le gata ua faateia Ioane i le leai o se sami i le lalolagi fou ae ua toe faateia nei o ia ina ua vaaia le aai paia poo le Ierusalema fou ua alu ifo mai le Atua i le lagi. (21:2)
O lenei aai e faamatalaina faapea “ua sauia e pei o se faatoanofotane ua teuteuina mo lana tane”. O le nofoaga lenei na fetalai Iesu o le ia alu e saunia e pei ona ia faailoa i ona soo i le Ioane 14:1-2.
O se nofoaga matautia lona matagofie e pei o le faamatalaga a le Ioane. Ona faalogoina lea o le leo mai le lagi o le leo lava o Keriso ua fetalai mai e faapea “Faauta ua iai le afioaga o le Atua faatasi ma tagata. E mau foi o ia ma i latou, e fai foi i latou mona nuu, e ia te i latou le Atua lava”. (21:3)
O le folafolaga lenei a le Atua i ona tagata. O le a ia mau ma i latou e faavavau, faavavau lava. O se mafutaga e faavavau faatasi ma le Atua e iai le alofa. E le toe iai se tagi aua o le a soloisea e le Atua o loimata uma lava. E le toe iai se oti pe faanoanoa, poo se aue, poo se puapuaga, aua o nei mea uma ua mavae atu ia.
O se lagona faageeetia e pei o le upu o le Tusi, o le a soloisea e le Atua o loimata uma. O le ia aapa mai ma soloisea faanoanoaga uma.
Ona faatonuina loa lea o Ioane e le Atua ina ia tusi mea nei i lalo. “Faauta ou te faia mea fou uma lava”. E le finagalo le Atua e misi e Ioane se mea tasi o ana saunoaga “aua o upu nei e moni ma faamaoni”, o le saunoaga lea a le Atua. (5)
O le a se vaaiga lea tatou te tulimataia i le lalolagi fou poo le Ierusalema fou lea o le a iai. O le a leai se sami, o lona uiga o mea ola uma na ola i le sami o le a le toe iai. Ae afai o le a faia e le Atua o mea fou uma o lona uiga o le a iai nisi o mea ola ma laau o isi ituaiga tatou te lei vaaia muamua o le a faia e le Atua faatatau mo le lalolagi fou o le a iai.
Pe e toe faia foi e le Atua o mea ola na iai muamua i le lalolagi peitai ua le toe feola ae na o ponaivi ua tatou taofia i falemataaga.
E atili ai ona iai le naunautaiga ma le fia momoo inā oo maia lea aso pe faapei le lagi fou ua saunia mo i tatou e le Atua.
O ia tatou te iloa ai le uiga loloto o le Atua e pei ona tatou alagaina pea o ia o le Atua e leai sona gataaga e leai foi sona amataga. O ia na iai i le amataga i le taimi na fausia ai le lagi ma le lalolagi. O Ia foi o le a iai i le tami e faaumatia ai ma le taimi e toe faia ai le isi lagi ma le lalolagi fou.
I le fuaiupu e 6 o loo fetalai tuusao ai o ia iā Ioane e faapea “O au o le Alefa ma le Omeka. O le amataga ma le gataaaga”.
I le Tusi o Amataga, le Tusi o Kenese o loo vaaia ai le fausiaina o le lalolagi ma le lagi fou, lea ua faaigoaina nei o le lagi ma le lalolagi tuai ina ua uma ona susunuina.
I le Tusi o Faaaliga o loo taualuga ai le Tusi Paia o loo faailoa ai le faaumatiaina o lea lagi ma lea lalolagi.
O le fausiaina o le lagi ma le lalolagi fou e pei o se fale na fuaina ma tipiina i Niu Sila ae ave e faapipii i Samoa e pei o le tele o fale o loo fai nei.
E faapea se ata o le lagi ma le lalolagi. O loo saunia i le nofoaga i le lagi ae e iai le taimi e aumaia ai i le lalolagi nei.
Lea la ua tatou taunuu mai i le faaiuga o le lalolagi tuai ae o le amataga o le lalolagi ma le lagi fou ae o le Atua lava e toatasi.
O mea uma ua mafaia i le pule tu tasi a le Atua Silisili Ese. O ia lea e mafaia mea uma.
O le lagi ma le lalolagi fou ua saunia e le Atua mo i latou e alolofa ia te ia. O i latou ua tuuina atu o latou ola mo ia.
O se faaiuga e faia e tagata uma ina ia avea Keriso ma Alii ma Faaola i o tatou loto ma ola mo ia i aso uma.
O le avea ma Kerisiano e le o se galuega e faia i le Aso Sa. Peitai o le soifuaga o aso uma.
Filifili i lou loto e ola mo Keriso i le taimi nei.
Ia faamanuia le Atua ia te oe.
