I le suafa mamalu o Iesu Keriso, e faatalofa atu ai i le mamalu o le atunuu pele Samoa. E faapitoa foi le faamalo i paaga a le Taiala i vaiaso. O le faamoemoe maualuga ina ia fesoasoani malosi nei aoaoga i le fausiaina o se faavae mautu ma le mausali i o tatou soifua faaleagaga. A mautu ma mausali i le faavaeina o le soifua faaleagaga i le Upu a le Atua, o le a manuia mea uma tatou te faia.
O loo tatou iai pea i le tatou mataupu o loo faagasolo, o le Faaolataga atoatoa. I le vaiaso na tuanai atu nei na tatou aoaoina mai ai, o le Fanaufouina ma le saolotoga mai galuega a le tino, e aofia ai le faamamaina o le loto ma le taliaina o le ola fou mai le Atua. Ua faapea foi ona tatou taliaina ai le natura poo o uiga o le Atua. E ui i le tele o suiga taua ma le matagofie sa tatou aoaoina mai i nisi o lomiga ua tuanai atu, peitai e lei mafai ona malolo ai le fili mai lona tetee atu i le Agaga Paia ma lana galuega o loo faia i o tatou soifua.
O se tasi o vaega taua o le Faaolataga ua saunia e le Atua mo le tagata, o le Faasaolotoina lea o tatou mai le tuinanau o le tino. O le maliu ma le toetu manumalo mai o Iesu Keriso mai le tuugamau ma le oti, ua faapea foi ona Ia faaumatia ai ma le malosi o le tulafono o le agasala o loo galue i totonu o o tatou tagata.
Ua tatau nei ona tuuina atu i le faatuatua i tatou i le Atua aua ua tatou iloa ua uma ona faatauina i tatou i le tau e ala i lona maliu tiga i le satauro, ina ia faaalia le soifua o le Atua i o tatou olaga.
Ua ou manatuaina se tasi o aoaoga a le alii e suafa ia Watchman Nee sa ou faitauina e faapea, “O le manatu lava o le tagata ia, o ia ua agasala pea, ae ua fetalai mai le Atua e ala i lana Tusi Paia e faapea, ua uma ona faasatauroina oe i luga o le satauro o Iesu.” “O le toe fetalaiga lava a Iesu i luga o le satauro ae lei tuuina atu lona ola e faapea, “Ua maea”. O lona uiga, o agasala uma, o mai uma, o vaivaiga uma, o tuinanauga uma o le tino, ma mea uma faapena ua faamagaloina, ua faamamaina, ua tuusaunoaina, ona o le galuega maeaea a Iesu i luga o le satauro. Viia le Atua, o Ia o le Atua fai mea maea, e le o ia o se tagata, aua o le tagata e tele taimi e amata ai se galuega ae le maea, a o le natura lena o lo tatou Atua, o ia o le Atua fai mea atoatoa.
E leai se mea i lenei soifuaga e aunoa ma sona mafuaaga. O tiga ma ma‘i eseese, o se vaega o mala poo le fetuu lea na folafola e le Atua i le tagata ona o le le usiusitai i lana poloaiga. Ae peitai, ua faaolaina i tatou mai le fetuu poo le mala lea na folafola e le Atua talu mai le amataga, i le maliu o Iesu Keriso. (Silasila i le Kalatia 3:13-14; 1 Peteru 2:24; Isaia 53:3-6).
O le uiga o le upu Faaolataga; o le tuusaoloto lea mai le agasala atoa ai ma le faafanoga o le agasala. O se vaega tele o lea faasalaga, o ma‘i. O le upu ‘faaolaina’ e pei ona faaaoga tele i le Tusi Paia, e sau mai le upu ‘SOZO’ ma o lona faaliliuina e aofia ai le saogalemu, faasaoloto, puipui, faamalolo, faasao, faatasi ma le faaatoatoaina.
O le upu lava lea e tasi na faaaogaina e Iesu i le tagata ma‘i lepela; “O lou faatuatua ua e malolo/atoatoa ai.” (Luka 17:19) O le upu foi lea, na faaaogaina e Iesu i le faamaloloina o le tagata na ulutinoina e le agaga leaga. O le Faaolataga ua saunia e Iesu mo le tagata, e aofia ai le faasaolotoina atoatoa, saogalemu faatasi ai ma le malu puipuia.
O le finagalo o le Atua, ia ola maloloina le tagata. O le ala foi lea na tuuina ai e le Atua le uluai tagata, i se siosiomiaga matagofie, saogalemu ma le tamaoaiga. O lenei siosiomiaga sa malu puipuia mai le mativa, tiga, ma‘i, mala, ma faanoanoaga masani e pei ona fetaiai pea ma i tatou i nei aso.
Na faapea foi ona folafola e le Atua ia Isaraelu i le vao, ma faamautu ai i le osia o le feagaiga e le Atua ma Isaraelu. “Afai e te matua faalogo i le leo o le Alii lou Atua, ma e fai le amio tonu i ona luma, ma e uai mai ou taliga i ana poloaiga, ma e tausi i ana sauniga uma lava, ou te le tuuina atu ia te oe se tasi o ia ma‘i na ou tuuina atu ia Aikupito; aua o au o le Alii, o le faamaloloina oe.” (Silasila i le Esoto 15:26)
O le faamalologa ua maea faatinoina e Iesu. O le tasi lenei o galuega faaola a Iesu Keriso, o le faamaloloina lea o tagata mai gugu, ma‘i pipili, ma‘i tauaso, ma‘i ulutinoina e temoni, ma‘i mageso, faatasi ai ma le tele o isi ma‘i. E leai se tasi na sau ia Iesu e fia malolo e lei faamaloloina e le Alii.
O le faamalologa na faamau faailogaina i le tau na totogiina e Iesu i luga o le satauro. Na faasaoloto e Iesu Keriso i tatou mai le faafanoga o le tulafono, ina ua avea o Ia ma fetuu mo i tatou. O le a lea fetuu? I le tusi o Teuteronome mataupu e luasefuluvalu, o loo lisiina mai ai le mau faamai na oo i le fanauga a Isaraelu ona o lo latou faalogogata. O ituaiga ma‘i eseese e pei o le ma‘i fulafula, ma‘i vevela, ma‘i mageso, ma‘i papala, ma‘i tauaso, ma‘i fiva, ma‘i mamae, ma‘i polopologā, ma le tele lava o isi ma‘i. Ae peitai, o le tala fiafia mo tagata uma, ona sa tauaveina uma e Iesu nei mala ma ma‘i i luga o le satauro mo i tatou.
Isaia 53:4-5 “E moni, ua na tauave o tatou tiga (ma‘i ma mea tiga) ma na tauave o tatou faanoanoa; a ua tatou manatu o ia ua taia, ua fasia e le Atua, ma ua faatigaina. A ua manua o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou.”
Samoa e, e le gata ina maliu Iesu mo a tatou agasala, ae na Ia tauave o tatou vaivaiga, faanoanoaga, ma‘i, ma mea tiga uma. O lona uiga, o mea e pei ona taua, na ave uma e Iesu i le satauro, e le tatau foi ona tatou toe tauaveina fua. E le mafai foi e Satani ona ia toe tuu mai pe faaee mai mea leaga ma mea tiga ia i tatou ona o lea ua uma ona faaee e le Atua i luga o Iesu. Peitai, afai o loo tatou fiafia pea e ola i le agasala, ona avea lea ma faitotoa e oo mai ai ia tiga ma ma‘i ma puapuaga i lo tatou ola.
Aisea tatou te le filifili ai nei e talia le faaolataga atoatoa a Iesu? Tatou filifili e talia le galuega maeaea na maligi ai lona toto ona o oe ma au. Aisea tatou te tauave ai pea nei tiga, ua uma ona ia tauave o tatou tiga ma mafatiaga i luga o le satauro. O ia lava na fetalai, “Ina o maia ia te au, outou uma e mafatia ma tigaina i avega, o au e malolo ai outou.” Samoa e, o le valaau lena mo i tatou i lenei vaiaso, tatou lafoai mea uma e popole ma atuatuvale ai o tatou loto, aua o Ia o loo manatu mai”.
Manuia tele lenei vaiaso Samoa!
