Ua taumafai ona savali atu si teine i le laina umi lea ua tutu mai ai tagata o loo faasolo i totonu o le potu, ae o loo tutu atu foi lona aiga ma talotalo atu pea i ai, manu o latalata mai Luama ia i latou ma toe lagona mai ni a latou tala o fai atu.
O le mea lea ua tupu, ua tu lava le tagata ia ma tagi. Ua na o le tutu o nai teine o le aulotu o Tausala ma Pua lea e tele ina nonofo i le fale o le faifeau ma lona toalua, o loo fetagisi foi laua aua e ua matua misia lava le teineititi i ona uiga faaaloalo ma le agatamalii.
E manatua lelei e Tausala ma Pua aso uma e tuua ane ai i tua Luama pe a o ona matua aumai latou te Aso Sa, e le taitai lava faapea o ia o le afafine o le faifeau, ona sau ai lea fia teine palagi. Ae na ona taunuu lava, sui loa i sona matua ofu faifeau, ae laa ane i le mea o fai ai ni galuega a nai teine ia o le aulotu.
O loo tutu lava foi si tama ia o Lotuma ma maligiligi lemu nai ana ia meataugata, pe a mafaufau atu, o lenei ua toe o se afa itula mou ese atu Luama mai lana vaai, ae ua matua leva ona nonofo faatasi ma pepese ma Luama i le falesa, ae le vave ona faailoa lona manao i le teineititi, ae o lea e foliga e faigofie lava Luama, e le o se tamaitai e faailoga tagata. Lona uiga o le tagi a Lotuma, e o faatasi le tagi faanoanoa, ma le tagi atigu i lona ia lava faavalevalea. O ona autafa o loo tu le fomua ai si alii aoao.
Ua le o iloa atu se susu o ona mata, ae o foliga ua mumu ulaula e manino mai lava le tagata ua matua mumu aasa lagona i le faanoanoa ma le mafatia. O loo tu ai i ona tala ane si teine o Pina, ai lava ona o le faaaloalo i le susuga i le alii faiaoga, aemaise e pei o lea ua le atoa nei le latou pea tolu sa masani ona feoai ai i nisi aso.
Ua faasolo pea Luama i le laina seia oo ina ua uma ona siaki e le teine o le ofisa o le tiute lana tusifolau ma ua faasino ane foi i ai le pito o le fale e agai i ai e faatali ai le valaau ane a le tagata o le vaalele mo le agai loa i le vaa. Na uma loa ona siaki uma pepa a Luama, toe faatopetope mai lava lea tu i le faitotoa ma talotalo mai i lona aiga, ona faatoa savali ai loa i totonu o le potu faatalitali.
