“Vivii lo‘u loto i le Alii. Olioli foi lo‘u agaga i le Atua lo‘u Faaola”
O le pese lea ma le Ioe a le Tina Paia o Maria na toe vivii ma alalaga faafetai ai i le Atua, tina ma tamaitai, tamā ma alii sa a‘otauina e Tamaitaisa, talu mai le faatoa toa‘i taunuu i Samoa i le tausaga 1864.
E lē o po se lilo ua fai i lagi le folauga a le toatele, a o suli nei o loo soifua mai i lenei vaitau, i Samoa ma soo se atunuu o le lalolagi, o i latou nei o le a molimauina lenei faamoemoe tāua.
O le Taulaga Paia o le Misasa na osia e le Afioga Patele Falaniko Stowers, i le malumalu o ‘Our Lady of the Assumption’ i Onehunga, i le itula o le valu i le taeao matagofie, 30 Novema 2013. I lea sauniga, sa faailo aloaia ai le amataga o tapenapenaga o le faamoemoe o SMSM EX-PUPILS, AUCKLAND, NZ. mo le faatinoina o le Iupeli 150 i le masina o Iuni 1 – 8, 2014.
Sa faapea foi ona faatino i Samoa i le Aso Toonai lava lea, 30 o Novema le latou foi faailo (launch), ia ma o le agaga lena o le faamoemoe, ia amata faatasi mafutaga i le aso 30 Novema ona tapena lava lea o le mafutaga ia a SMSM EX-PUPILS, Aukilani mo le faamoemoe i Samoa i le tausaga fou.
E ui ina fai i lagi le folauga a le toatele o tuaa sa a‘otauina e Tamaitaisa, ae e faatumulia le loto i le faafetai i le Atua ona ua toe o se aga taunuu le faamamaluina o le Iupeli 150 SMSM EX-PUPILS i Samoa, ae o loo soifua le toatele o molimau o le foai ola ma le faatuatua o Tamaitaisa SMSM na tuua aiga pele ma atunuu mo le ofoina o o latou soifua auauna i le aoaoina o alo ma fanau a Samoa, o tatou tuaa, mātua, o i tatou ma tupulaga fai mai.
I le amata mai o le Auaunaga a Tamaitaisa Talai o le Ituaiga o Maria, sa latou galulue i afioaga nei i Samoa: Falealupo, Safotu ma Safotulafai, Leulumoega, Leauvaa, Mulivai Safata, Falefa, Lotofaga, Aleipata, Moamoa, Savalalo ma Vaimoso, Tokelau, Leone ma Lepua i Tutuila, faapea foi Honolulu.
E tāua tele lenei toe faamanatu mai o afioaga sa galulue ai le Ituaiga. Ua a‘e ai foi se tofa i Tamaitaisa ma le pulega o le suafa fou lea ua faaigoa ai mafutaga o SMSM EX-PUPILS – IUPELI 150 TAUSAGA. Ua matuā talafeagai lea e aofia ai soo se tina, tama, na aoga i soo se aoga a SMSM i atunuu ma afioaga o ta‘ua i luga.
Ne‘i tuufesili le mamalu ma le paia o Samoa poo le ā le faamalamalamaga o le SMSM (Soeurs Missionaires de la Societe` de Marie – Missionary Sisters of the Society of Mary), o lona amataga ma lona talafaasolopito o Tamaitai e toasefulu ma le tasi na malaga mai Falani i Europa mo galuega faamisionare i le atu Pasefika. O loo lagomau nei se tasi o latou ia i Aleipata, e suafa ia Soeur Marie de la Misericorde. Na mae‘a le Misasa ona potopoto lea o le mafutaga i le St Mary’s Hall, Onehunga mo le malu o le taeao, ma feiloai fiafia ai le toatele ua leva ona lē mafuta. Sa faataunuu ai foi ma le resitalaina o suafa o i latou na aooga i soo se aoga SMSM.
O lenei Resitala e faaauau pea seia oo atu i le masina o Iuni 2014. Ua tapena mai foi i Samoa le pine aloaia o le Iupeli 150, e resitala ai lou suafa i le $50.00 ona maua lea o lea pine faamanatu.
E tatala le avanoa i soo se isi na aoga i soo se aoga o le SMSM e auai mai ai i le tatou mafutaga i Aukilani nei, e maua atili ai foi se isi malamalamaaga i le faagasologa o a tatou taumafaiga mo le faamoemoe.
Faamanuia le Atua ia Samoa o loo alaala ma papaaao i Niu Sila nei, aemaise o alii ma tamaitai SMSM Ex-Pupils. Faamolemole, faafesootai soo se tasi o i matou mo ni isi faamatalaga.
Sister Pelenatete Peni SMSM – 0212043022
Afamasaga Agnes Rasmussen – 02102678228
Cathy Mika – 0211618457
Tuifaasisina Sia Maiava – 02102514659
Gretel Toleafoa – 027257264
Ma le faaaloalo lava,
KOMITI FAAFOE – SMSM EX-PUPILS, Auckland, NZ
