E toatele nisi o le atunuu o loo aumau i Ausetalia nei ma Niu Sila e lē o silafia e eseese ituaiga fatu koko Samoa o loo gaosia ai le maoi o tagata o loo faatauina nei i Samoa faapea i atunuu mamao.
O se mataupu lea e pele i le agaga o se tasi o faipisinisi i Ausetalia na soifua ma galue mai i faatoaga koko a lona aiga i Levi, Saleimoa faapea i Fasitootai le susuga lea ia Richard David. O loo auina tuusao mai Samoa e le susuga Richard David le koko malū, koko pauta ma le koko i atigipusa laiti. O se matafaioi a nai tuaa na vaai totoa i ai lenei alii ma fesoasoani foi i lona totoina ma faamagoina mo le auina i fafo. Sa tele se afaina i le tuanai o afa tetele ia Ofa ma Valelia aemaise isi matagi e pei o Eveni ma ua pa‘ū maualalo ai foi le aofai o koko auina mai fafo mo tupe maua a Samoa e faatusa atu i aso ua tea.
“O le eseesega tele e faatusa i le 1962 lea na tutoatasi ai Samoa e lima afe tone (5.000 tonnes) o le koko Samoa na auina atu mo atunuu, e faatusa atu i nei vaitau,” o se sailiiliga lea a Richard David.
“O le koko Samoa moni lava e lelei e faaigoaina o le ‘Trinitario’ faapea le Criollo, o fatu koko mai le ituaiga lea e manogi toe lololo i le tofo.”
O le isi ituaiga lea e oona lona tofo e faaigoaina o le ‘Almanado’ e lausilafia uma o le koko Solomona.
O le tele o lenei fatu koko Solomona e taugofie ma e taatele ona auina mai Fiti ma faapau ma faamalu i Ausetalia nei ma faatau i le tau o le koko samoa moni.
“O le silafia e nai o tatou tagata o le koko Samoa moni e faatau ai ma fesoasoani ai i nai faifaatoaga i Samoa e ala i le toe faatauina mai ai o isi koko ae o le lagolagoina o le koko Fiti ma Solomona o le a manuia ai pea latou.”
Ua amata nei faatalanoaga i luga o le FM89.3 i Sini e faalauiloa ai lea faamaumauga faapea le kamupani vaa o le MOLIDA Shipping o le a galulue ma le RIMADA’s lea e faauluulu ia Richard.
