Na faatumulia se tasi o malu o fiafiaga i le pitonuu o Sunshine i le aai o Melepone, i le afiafi o le Aso Toonai na mavae atu, i aiga, uo, aumea mamae ma sui o Ekalesia eseese, aemaise o le aufaigaluega totofi a le Atua, e patipatia ma sii faatasi le viiga i le Tapaau sili, ona o le faamoemoe sa fau ao fau po, pe tua mani a, a o lea ua fesilafai i manū, ae lē o ni peau lagalaga, le laau o le soifua ua asoa nei ina ua tinipao le uto i faiva o tapalega.
E ui ona e lei faigofie, ae viia oe le Atua o taleni, ina ua iu manuia le taumafaiga vaivai, ia maualuga ai sou viiga, pe a faamalieina le faafofogaaga a Samoa. O le susuga ia Levale e mai le afioaga o Lepa, ma si ana manamea ia Ane mai afioaga o Faleaseela ma Magiagi.
Na faaalia so la agaga mitamita ma le faafetai, ona o le paia ma le mamalu o le atunuu na afifio atu e maimoaina ma molimauina le tatalaina o la uluai taumafaiga, o si o la tamā faifeau le susuga i le faafeagaiga ia Tautai Taealii na saunoaina le afioga folafola a le Atua, ma faapaiaina ai le CD ma ona laasaga faatino, a o le fofoga o le afiafi na nafa ma le susuga ia Fitua‘i.
O le faafetai faapitoa o le afiafi na ave i le susuga i le alii pule o le JJ Recording le susuga ia Faatasi Sanerivi, lea na gapatia ma le galuega tele ma le fita. Na atili faamalieina le sila maimoa a le valaaulia ina ua alo i le taumafataga tele, a o faagasolo faafiafiaga eseese o le afiafi. O sē ua fiafia inā pese ia, mai lava i mauga tetele e oo i mauga tamatama, na pepese ma vivii ma le fiafia, ina ua tofu CD tagata uma, ta‘ape ai le fili alii ma le viiga o le Atua.
