O se aso o loifofoga o le fiafia na oo i ai le Aso Toonai aso 7 o Tesema, na tuufaatasi ai nisi o ekalesia a le Uniting Church a Kuiniselani ma Ausetalia faapea aiga ma uo, i le molimauina o le faauuga o le tamaitai o Feiloaiga Malia Faye Talatonu lea ua faamaonia o se uluai tamaitai Samoa i totonu o lea foi ekalesia ua ia ausia lea tulaga maualuga ua avea ma faifeau poo Rev Faye Talatonu, i le Minister of The Word.
Ua mae‘a foi ona ia tauaaoina lona faailoga o le Bachelor of Theology ma nisi faailoga ua alagatatau ai lava le tulaga ua faaeaina ai lenei tamaitai.
O se tamaitai agavaa ma talenia e pei ona sa filifilia ai o ia e taitaia le autalavou ma le tele o isi tomai faapitoa. Sa fiafia i fiafiaga o le lalolagi peitai na suia e le Atua ma ua avea ma tagata fou e iai manuia ua ia ‘ae‘ae ai i le taimi nei.
E ui ina tauasa mai ma puapuaga ma faafitauli, motusia foi le la mafutaga i le oti ma si ona tuagane pele e toatasi i le masina o Setema, peitai na ia ta‘ua sa lei faavaivai ai lona filigā ina ia taunuu lana miti e avea o ia ma tamaitai faifeau e tala‘i le finagalo o le Atua.
O nai ona mātua o le afioga ia Papalii Aleki ma Atala Ati mai Faleula ma Lufilufi, o loo maua foi le soifua manuia e si ona tina matua ia Akaka sa faafaileleina o ia i lona tuputupua‘e.
O le masina fou o le a malaga atu ai Faye ma si ona alii ia Molesi ona ua valaauina e tausia le Ekalesia Unting Church i Roma, se vaega o Ausetalia.
O le afioga ia Mulipola Iuma Apelu sa fai ma sui o le auvalaaulia e faaleo se agaga faafetai ona o le matagofie o tapenaga. O le lupe faalele a le aiga mai NZ le susuga ia Rev Faiva Alaelua (galue i le ekalesia Metotisi) sa ia momoli se faafetai ia Samoa na potopoto e tusa ai ma le talaaao atu.
Na faafetaia foi le pulega a le Uncle Sam’s Catering e tusa ma le taumafataga lava saunia ma tapena lelei, le tofa ia Poulava Sam ma le tausi ia Lona Matautia.
