Meaalofa sili o le Kerisimasi
Ua latalata mai le faailogaina o le Kirisimasi, ma o se taimi fiafia mo tatou uma ma aiga. O se taimi foi o le feofoofoai o meaalofa, ma e talitonu le ETV Productions, e leai se isi meaalofa sili mo lou aiga i lenei Kirisimasi, nai lo le sauni nei e maua se kopi o le DVD mo le ata lauiloa o le Silamanino i lona Vaega 4 lea o le a tatala mai i tua i le faaiuga o lenei vaiaso.
I se pepa o faamatalaga mai le pulega a le ETV Productions, ua faamaonia mai ai e le tamaitai pule, Afioga Toepo Eliza Tiavaasu‘e Hunt, o lea ua mae‘a nei ona tuufaatasia ma faamae‘aina le Silamanino Part 4, ma ua fuafuaina le Aso Faraile o le vaiaso lenei, aso 13 Tesema, o le a amata ai ona faatau mai i tua lenei ata, o loo nofotatali pea i ai le mamalu o le atunuu i le fia toe sosooina o le tala o loo tulituli mai pea ia Silamanino ma lona aiga.
O le aso lava lea e tasi, 13 Tesema 2013 o le a faatau ai i tua le DVD i Samoa, Niu Sila, Ausetalia ma Amerika Samoa i ona nofoaga masani o loo faatauina ai.
E lua masina na faavave ai le tuufaatasia o lenei galuega tele ona o le naunautaiga lava ia mafai ona faamalie le manaoga ua tulai mai i le maketi o ata faapea, aemaise le naunau o tagata ma tuufesili poo afea e sau ai i tua le Silamanino Part 4.
Ta‘ua i le pepa o faamatalaga, o le aikia na fai ina ia mafai ona ausia le faamae‘aina o le pueina atoa o le ata i totonu o le lua masina, o le taumafai ia muai tapena uma ma sauniuni mea uma, e aofia ai foi ma le muai saili le tulaga o le tau i aso taitasi, ina ia taumafai ai e uanai le tele o ni mea e mafai ona faataunuu i se aso o loo lagilelei ai le tau.
O le isi auala sa faigofie ai ona ausia lenei taumafaiga i se taimi puupuu, ona sa faamautinoa foi ia mafai ona maua mai avanoa o i latou uma o loo iai i le ata i aso e moomia ai mo a latou vaega, ona o le toatele o i latou nei e taufai faigaluega faasoloatoa uma ma e itiiti ni taimi e ono avanoa ai mo le pueina o le ata.
Ta‘ua e le tamaitai pule, lona agaga faafetai i lana vaega o loo galulue i lenei ata tifaga, ona sa mautinoa lo latou taufai galulue mamafa ina ia tino mai lenei galuega i totonu o se taimi puupuu. E oo lava i le tamaitai o loo nafa ma galuega (production office lady), na fanau ai lava lana pepe i le aso mulimuli na pue ai le ata, lea ua faaigoa ai nei lana pepe teine ia Silamanino.
Manatua foi ina ua gata mai lenei tala i le Silamanino Part 3, o lea ua faafuasei ona tuua Silamanino ua leai se toalua, ae ua fesagai ai nei ma le tele o isi luitau fou o le olaga.
O le Silamanino Part 4 o le a faaauau ai ona tatou vaai i le faagasologa mai o le olaga o Silamanino ma si ona aiga ausage ma si ana fanau, lea ua tausi toatasi nei si ana fanau e aunoa ma se toalua. O loo taumafai le tina e nanā ona lagona mafatia i le misia o si ona toalua ae taumafai lava e lototele mo si ana fanau.
O le teineitiiti o Sina ua matuā telē lona aafiaga i le maliu faafuasei o si ona tamā, ae o le tamaitiiti o Sili, o loo taumafai malosi e fesoasoani i si ona tina; peitai o loo matuā malepelepe foi ona faalogona ina ua ia faatoa iloa ane le mea moni e uiga ia te ia ma lona tupuaga moni.
Sa amanaia ma tauia le tautua matavela a Silamanino i si ona tuaa ua pulapula lagoto lona soifua, aemaise lana tautua i lona nuu. Ae mo James ma Moana, e fai lava si tele o mea na tutupu i le toalua lea o loo faaalia i le ata lenei. E lē tatau la ona e misia le saili loa o sau ata o le Part 4.
