E faafetaia ona e ui i le ogaoga o manu’aga, ae o loo mafai ona faia se taotoga ma e iai le faamoemoe e ono toe manuia Iele mai ona manu’aga. Sa ou taumafai ia maua so’u avanoa e oo atu ai i le falemai se’i asia si tama o Iele, ma o le atoa o le masina talu ona iai Iele i le falemai, ae ou asia loa ina ua ou manava i se tasi afiafi.
Sa ou oo atu ma vaaia le tigaina i ona manu’aga, ae o se itu lava na atili ai ona maualuga lenei alii i lo’u mafaufau, aua ina ua tepa mai o o’u savali atu, sa ou vaaia lona foliga ataata mai, ma taumafai e sii a’e i luga lona lima e peiseai o loo talotalo mai.
A o faasolo ma tala, o loo ia faamatala mai le tala atoa o le mea na tupu, sa ou toe fesili ai foi, ‘O a mai la oe?,’ o lana tali lava e tasi lea foi na ou faalogo ai muamua, ‘Ana mafai ona ou faia, semanu ua iai so’u uso masaga!’
Na ia faamatala ia te au, ina ua pau i lalo i le taimi na fana ai o ia e se tasi o alii gaoi, o le mea muamua lava na tau i ai lona mafaufau, e lua lava ana filifiliga e fai, poo lona faavaivai loa ona ua tigaina tele i ona manu’aga, poo le faamalosi ma finau pea ia toe maua se isi ona malosi e faaauau ai ona ola.
O lona faamalosi lena na seesee ane ai i le isi itu ma taumafai e vili lana telefoni i le falemai seia oo ina taunuu atu le laveai.
Na maligi o’u loimata ma ou mafaufau, “Maeu lava se tagata ina a mautinoa i le soifuaga, ma lona lototele, lenei lava ua oo i tuga ogaoga ua lamatia ai lona soifua, ae leai lava faapea e faasea i le ola pe ita i mea ua tutupu ia te ia.
O uiga lelei na o Iele, sa ou ola pea ma a’u, ma ua avea foi o se faamanatu i taimi uma ou te tau faavaivai ai i le olaga. Ae ua avea foi ma a’u tala fiafia e faasoa solo i isi tagata, o loo fai ma latou masani le faitio i le olaga, le feitagofie i isi tagata, ma le ola faanoanoa i le tele o taimi.
