O lo‘u faalogo pea lava pea i nei tala matagofie e uiga i le alii supavaisa o Iele, na ou mafaufau ai foi a’u, ou te fia iloatino lava le moni o nei lipoti ua ou faalogo soo i ai.
O lea i se tasi aso na ma saofafai faatasi ai ma Iele i totonu o se nofoaafi e agai atu i le galuega i le aai, i se faleaiga lea ua faigaluega ai nei, ma o lea foi ua amata sue avanoa atu i ai nisi o alii ma tamaitai sa latou faigaluega faatasi i ni faleaiga i taimi ua tuanai.
“Malo Iele,” o la’u fia nice atu lea i le alii. “Ua aave mai tala o le avea o oe o se supavaisa lelei i lau aufaigaluega.” Sa ataata Iele ma faafetai mai i a’u upu amata.
Ona ou fesili tuusa’o loa lea i ai, “E fai sina ou paso ia te oe! E faapefea ona avea pea oe ma tagata fiafia ma mautinoa i taimi uma lava? E mautinoa e tatau ona iai ni taimi e te ita ai i se isi poo nisi foi. Ae faapefea ona e le oo i lea tulaga?” Fai mai si tali a Iele, “E te iloa oe Misi, o taeao uma lava a o o‘u lei usu mai i le galuega, ou te nofo a’e loa i luga i lo’u moega, ona ou tautalatala lava lea o a’u ia te au lava, ‘Iele, e lua lava au filifiliga i le aso lenei. Poo lou filifili e te itaita gofie i lenei aso pe a tulai mai ni faaletonu i le galuega, poo lou filifili ia e onosai ma loto fiafia pea.’ Ona ou faapea ifo lea, e leai, e sili ona ou filifili ia ou loto fiafia pea.
O lea la, o taimi uma lava e tulai mai ai se mea le lelei i le galuega poo nisi foi ua avea ma faafitauli i le galuega poo fea lava, e muamua ona ou manatu, pe ou te manao ia avea a’u o se tagata ua afaina i lea mea ona ou le fiafia ai lea, poo lo’u manao ia avea le mea ua tupu, ma mea ou te aoaoina mai ai se lesona aoga.
