O ni manatu ma ni lagona na tutupu a‘e pea i le matagaluega a le Ekalesia Metotisi a Inala e faapea, atonu o loo i luma le laolao, tatou tālia pea lupe o Mau, auā e tuaoi afā ma maninoa.
E moni lava o se vaa sa fauao ma faupo, o se aso foi na atofaina ma faatōfāla‘ina e feiloai ai le auauna a le Atua ma le lafu mamoe. O le susuga ia Rev Laauli Leiataua, o se lupe faalele a le alalafaga o Manono ma Fasitoo, ma le faletua ia Nasareta Eseta Leiataua mai Letogo, Faleasiu ma Salailua. Na ataata o ta‘ulelei ma tali mai le Atua e faataunuuina lenei fesilafaiga e pei ona iai le Aso Toonai, aso 16 o Oketopa.
E ui ina agi malosi le savili i lea taeao, peitai na faatasia lava tumua ma pule faapea matagaluega taitasi a le Faasinoti, e tusa ai ma le agaifanua ma tu faaaloalo o feiloaiga. Sa taitaia le sauniga lotu e le aao tusitusi o le faasinoti a Kuiniselani, le susuga ia Rev Sa‘iliai Tuma‘ai, o le tausi matagaluega a RedCliffe, ona o loo toesea le afioga i le Sea i fonotaga a taitai o ekalesia o loo usuia i Tutuila Amerika Samoa.
O le tofā ia Manū Sa‘emo sa lauga i le alii taeao ma le usu faaaloalo, na paia ai ma mamalu le aso. O le tofā ia Suāniu Sioeli sa fai ma sui o aiga na lua.
O le maualuga o faaaloaloga ma le taumafataga sa fai ai ma sui o le Matagaluega ma le faasinoti le tofā ia Liuliugatā e tali fuaitau i le mā‘au ma le milomilosia, a o le susuga ia Leiataua sa tulai mai le itu o aiga o le faafeagaiga ma le faletua e faafetaia le aofia na potopoto faapea tausi matagaluega.
Ua osia nei le feagaiga a le susuga ia Rev Laauli ma le faletua faapea le matagaluega a Inala, e lē mamao foi le maota o le faafeagaiga ma le nofoaga o iai le malumalu tapuai.
O le auauna a le Atua sa galulue i le matagaluega a Maugalaki o le faasinoti a Aukilani i Niu Sila, ma ua savalia le 4 o tausaga ae siitia mai loa i Brisbane.
Na iu manuia lea faamoemoe i le faatasi mai o aao agalelei o le Tapaau i le lagi.
