“O taimi uma la e sau ai se tasi ma sasaa mai ia te au sona le malie i se faafitauli ua tupu, e vave ona ou manatu ifo, poo le mea ea o le a ou talia lana faaseā, pe ou te taumafai ia faasino ia te ia se mea lelei e toe foia ai ona lagona le fiafia. Ma e iu ane lava la’u filifiliga, ua ou faasino ia te ia se mea lelei e tata’i i ai lona mafaufau, ona toe fiafia ai foi lea ma toe sologa lelei mea uma.”
Ua ou ata ma ou faapea atu ia Iele, “Ia e le taitai ona faigofie lena mea, a ea?” Ua toe ataata Iele ma faapea mai, “E moni a oe, e le faigofie. Ae manatua o le soifuaga lenei e tumu i le mau filifiliga e ao ona tatou faia. Poo le a lava le mea e tulai mai, a e tagai toto’a lava i ai, soo se mea lava e iai filifiliga e tatau ona fai i ai.
E te filifili pe faapei lau tali atu i se mea. E te filifili poo a ni aafiaga o ou faalogona ona o ni mea e fai mai e isi tagata. E te filifili ai pe e te manao e ita ai, pe fiafia ai. Lona uiga o mea uma lava e pa’u ia te oe, o oe lava e faia le filifiliga i le auala e te manao e te soifua ai.”
Ua alu pea le ma tietiega i le nofoaafi ma ua lei toe faia ni a ma tala seia oo ina taunuu i le nofoaga na ma taufai feosofi ese ai ma agai loa le tagata ia i lona fale faigaluega. Peitai a o faagasolo a’u galuega i lea aso, ua ave lava lo’u mafaufau i tala a le tama o Iele.
E atoa lelei le ono masina ou te lei toe vaai lava pe faalogo i se tala e uiga i le alii lenei o Iele, pau le mea na ou iloa, o loo faigaluega pea Iele i se tasi o faleaiga, lea foi o loo tumutumu pea i ai tagata e fiafia e taumamafa ai.
Peitai, o se tala lava na ou faateia ai, ina ua ou matamata atu i le televise i se tasi o afiafi, ae muamua mai i le amataga o talafou se faalavelave matautia na tupu, ma ou tilotilo atu, ae faaali mai loa le ata o si alii o Iele, lea e faapea o loo tigaina nei i le falemai i ni ona manu’aga na fana ai e nisi o alii talavou na la osofaia le faleaiga i le po na se’i faatoa mavae atu.
Sa maligi o’u loimata i le alofa i lenei alii lelei ae pe faapefea ona faia i ai e se tasi se mea leaga matautia faapea.
Na faasolo mai le tala ma iloa ai, o le taimi ua tapuni le faleaiga i le po, ma a o taumafai Iele e loka le faitotoa, ae osofaia ai loa e nei alii talavou, ma faasiilima ae se’i le pusa tupe sa uu i lona lima.
