O le vaiaso nei, o le a tatou faitauina nisi o vaega o le soifuaga o le susuga i le faafeagaiga Rev Maligi Evile. E pei ona silafia, e tofia ma valaauina le susuga ia Maligi mo le galuega a le Atua, a o seei pea i lona nofoa ma avea o se tagata faasalalau i luga o leitio atoa ai ma le televise. E le gata sa avea ma faasalalau i le leitio a le atunuu le 2AP i Apia a o lei malaga mai i Niu Sila, ae sa toe faaauau lava lea galuega i le Radio New Zealand i Niu Sila.
Faatomuaga
O le galuega faasalalau i luga o leitio ma televise, o se galuega e tele sona sao ma sona taua mo tagata lautele, ona o manaoga moomia ma le faatupuina o le silafia, e le gata i mea o loo tutupu i totonu o faiga malo ma atunuu, aemaise o ekalesia ma le lio o faalapotopotoga o tagata.
O le galuega faasalalau e mafai ai ona siitia le silafia (awareness) i suiga o le siosiomaga i soo se itu. E le gata i lea, a o se galuega foi e tatau ona faia i le lototele, finau, ma le lē faaituau ae taualuga i le onosai ma le lotomau.
O le isi itu e tatau foi ona iai le atamai ma le poto e faasoasoa ai uiga o le galuega, mai lea taimi i lea taimi.
E iai foi le gagana e tatau ona faaaoga, ma le ituaiga gagana e tatau foi ona aloalo ese ai le tagata faasalalau.
E le gata i lea, ae tatau foi ona vaai le tagata faasalalau i le manaoga o tagata faalogologo, nai lo le fai pea o le mea e loto i ai.
E ao foi ina lelei le faitau tusi ma aua le fefoifoiai le faamatalga (repeatence), atoa ai ma le aua le umi ona tautala leaga e vave ona le fiafia ai le au faafofoga.
Soifua galue ma galuega
Sa muai galue le susuga ia Maligi Evile, o se faiaoga i totonu o le atunuu, ma o lana lea galuega sa tautua ai ina ua mae‘a le soifua aoaoina, ma faauu ai i le aoga faafaiaoga a o ta‘ua o le TTC (Teachers Training College).
O le tausaga e 1959, ma le 1960, sa uluai galue ai o se faiaoga i afioaga o Iva, Palauli ma Gataivai i le motu i Salafai.
O le ofi atu o le susuga ia Maligi i totonu o galuega faasalalau, o se avanoa sa maua a o iai pea ma auauna i totonu o le Matagaluega o Aoga.
Na tofia ma filifilia ina ua faaiuina le tautua a se tasi foi o auauna sa ia faafoeina polokalame a aoga mo tamaiti i luga o le leitio a le 2AP.
