O le vaiaso nei, o le a tatou faitauina nisi o vaega o le soifuaga o le susuga i le faafeagaiga Rev Maligi Evile. E pei ona silafia, e tofia ma valaauina le susuga ia Maligi mo le galuega a le Atua, a o seei pea i lona nofoa ma avea o se tagata faasalalau i luga o leitio atoa ai ma le televise. E le gata sa avea ma faasalalau i le leitio a le atunuu le 2AP i Apia a o lei malaga mai i Niu Sila, ae sa toe faaauau lava lea galuega i le Radio New Zealand i Niu Sila.
Talofa lava, Ia viia le Atua, ua mafai foi ona tatou toe feiloai i luga o tatou tusitusiga masani o le vaiaso.
E talitonu sa manuia lau faitau, aemaise o galuega faifai pea o le vaiaso, i le fesoasoani mai o lo tatou Alii.
Ia ae alo mai loa, o le sosooga lenei o le soifuaga tautua o le susuga i le faafeagaiga ia Maligi Evile, e pei ona sa e faitauina amata mai i le vaiaso talu ai. Sa gata le faasoa mai a le faafeagaiga i le taimi sa toe galue ai o se faiaoga mo le fesoasoani i le polokalame a le malo o Niu Sila sa faataoto mo tagata Pasefika i lena vaitaimi.
A o galue Maligi o se faiaoga e pei ona taua, sa lei malolo ai foi mai le galue ai faavaitaimi mo le leitio a Niu Sila. (Radio NZ) O le solosolo lelei ma le toe faateleina o le taimi mo tagata Pasefika i luga o le leitio lea mai le tausaga 1981, ua toe see mālie ai ma le sā o le auauna mo le galuega faasalalau, sa iu ai loa ina faamavae aloaia mai le galuega faiaoga.
O le 1980 sa toe faaopoopo ai le avanoa o faasalalauga mo tagata Pasefika lava i luga o le leitio a Niu Sila. O se avanoa taua tele, ona ua agai ina amanaia e le malo tagata Pasefika, e ala i lea foi auaunaga.
O le taimi sa toe faaopoopo ane, na faatoa atoa ai le 30 minute, poo le afa itula e faatautaia ai le polokalame mo tagata Pasefika. O se taimi umi tele lea pe a fua i lena vaitaimi, i le sue gata o ni avanoa faapea mai leitio a Niu Sila pei ona taua e Evile.
O nisi sa taua o latou suafa ona sa galulue faatasi ma le susuga ia Evile mo polokalame i lena vaitaimi. O Moana Papalii, Seiuli Leifi, ma le alii Tonga o Sefita Hauli.
O le alii Tonga o Sefita e pei ona taua, o ia sa faauluulu i ai le leitio a tagata Pasefika le 531PI, ma sa faatoa faamavae mai lea tofiga i le tolu tausaga talu ai.
O le tausaga e 1992, na faatoa tapunia ai le avanoa mo tagata Pasefika mai le leitio faasalalau a Niu Sila, ina ua aapa mai le malo ma faatu aloaia le leitio e faapitoa lava mo tagata Pasefika. O le leitio lea sa faatoa amata mai i lea tausaga e oo mai i le taimi nei. O le Radio 531PI e pei ona silafia, sa faavae mai e le faiga malo a le Leipa mai le tausaga e pei ona taua.
O le lelei ma le taua tele o le faagasologa o le faafoeina o polokalame a le Pasefika i lena vaitaimi, sa mafua ai ona aloaia ma pasia loa le faia o se leitio mo tagata Pasefika lava latou, lea ua oo mai ai lava i lenei vaitaimi. O ia suiga sa faia lava a o auauna pea Maligi Evile mo le leitio faavaomalo a Niu Sila, le Radio NZ.
Soifuaga Soofatasi ma isi
E fai si toatele o suafa o nisi o tamalii sa taua e Maligi o ni paaga ma uo i le galuega faasalalau, e amata mai i Samoa seia oo mai lava i Niu Sila. O Sofi Pua sa muai amataina le polokalame o le Fofoga Samoa. O Aukilani sa faatautaia e le susuga ia Sofi Pua, a o Ueligitone sa tautua mai ai le faletua ia Sianaua Anae-Osley mai le tausaga e 1960.
O Etisone Heather ma Suafole Iiga, o tamalii sa mauaina avanoa e tolu sa faasalalau a le leitio a le atunuu le 2AP, ma sa galulue faatasi ai lava ma le susuga ia Evile. O i latou foi ia o ni tagata faasalalau muamua. (announcers) a le 2AP i lena vaitaimi, e ese mai i le au fai polokalame sa iai.
O Maiava Muipu, sa galue i totonu o le Matagaluega o Aoga i Samoa, sa iai foi sona sao i le soifua galue o le auauna ia Maligi. O Natia Pātū, o ia sa faatautaia le polokalame a le Matagaluega o Aoga, e faatatau i tamaiti i luga o le leitio a le 2AP. Ina ua faamavae, ona filifilia ai lea o Maligi Evile mo le faaauauina a o lei avea o se tagata faigaluega mo le 2AP. O Lavea Levi ma Fuiono Faaiuaso, sa taua foi ona sa nafa ma le taumafaiga o polokalame sa fiafia ma faananau i ai tagata Samoa.
O Eddie Sterlin ma Sosefina Sefulu Ioane, o nisi foi iloga i le galuega faasalalau e pei ona taua e Maligi.
O le susuga ia Vaiao Eteuati, mulimuli ane e lei mamao tele atu sa avea ma Sea o le ekalesia Metotisi Samoa i Niu Sila, sa tausi nuu foi i le galuega a le Atua.
O ia sa fesoasoani tele i le unaia o Maligi ina ia faaauau pea le galuega taua i luga o le leitio a Niu Sila. O le tausaga e 1992, sa faatoa faamavae ai ma tuua e Maligi le galuega i le leitio a Niu Sila, ina ua valaauina e le Atua mo le galuega faafaifeau.
O Vaimasenuu Niko Apa sa taitaifono i le Fono Faufautua a Samoa i Niu Sila, ma sa avea foi Maligi ma sui o lea fono.
Soifua ofoina mo le Atua
E ui i le tauva o le galuega faasalalau ma le galuega faafaiaoga sa galue ma auauna ai le susuga ia Evile, peitai sa le mafai ai ona aveesea i lona finagalo se isi o manaoga sa soifua ae ma ia. O le mafuaaga lea sa le taga tasi ai le soifua galue, ae sa tautata pea i le moa o le ala, ona o se manaoga sa tuuina e le Atua i lona loto mai le tele o tausaga ua mavae.
O le faasoa mai o le faafeagaiga i le vaega lea o lona soifua, ua le gata ina faaosofia ai lagona, ae ua toe aumai ai ma se isi luitau tele, ua manatu ai e manaia foi le tufa atu.
E lima tausaga sa aoga ai ma suesue le susuga ia Evile i le aoga faafaifeau tuufaatasi a le Metotisi ma le ekalesia Egelani (Anelikana) i St John i Aukilani.
A o iai i le aoga faafaifeau, o le taimi foi lea sa faaauau ai pea le galuega faasalalau. E lei faigofie le soifuaga sailiili ma le aoaoina o le afioga a le Atua, ae sa tau saili foi le tamaoaiga aua le tausia o le aiga ma nuu, aemaise le ekalesia.
O le tausaga e 1979, sa taumafai ai le auauna mo le suega i Malua, mulimuli ane sa faamanuiaina lona taumafai mo le suega, ae sa toe faamalieina foi le fono faatonu ma le pule o Malua i le tautinoga.
Ua faataunuuina mea uma ma tapenaga e tusa ma le manaoga o le ekalesia aoao, mo le ulufale i Malua.
Ae paga lea e lei taunuu ona ulufale, ma o se tulaga sa taliaina ma le augofie, o le a le oo i ai se tusitusiga. E faamalie atu ai i le au faitau, o le a taoto ai pea i le tatou polokalame nei le saunoaga matagofie a le faifeau e uiga i lea tulaga.
E leai se isi malosi na ia gaoi ese le manaoga o le auauna sa naunau pea i ai. E ui ina ua le taunuu lana malaga i le laumua i Malua, peitai e lei gata ai lona saili ma le taumafai pea i auala e faataunuu ai le manaoga. Taua e Maligi, o le soifua saili, e tapuni mai le isi faitotoa, ae tatala mai e le Atua le isi faitotoa.
O le faitotoa na matala mai, o le aoga i St John e pei ona taua. Sa faauuina mai le aoga i St John, ma toe faaauau ai pea ona galue o se tagata lotu i le ekalesia sa galulue ai, le EFKS i Grey Lynn, i le taitaiga a le toeaina ia Siaosi Ieriko.
O le tausaga e 1988, sa faatoai ai le manaoga o le ekalesia EFKS i Kiniselani (Kingsland) i le susuga ia Maligi Evile ma le faletua, ina ia avea ma o latou faifeau.
O le taimi lea ua mae‘a foi ona fofogaina le faamavae o le susuga ia Samuelu, sa tauavea le galuega i lea foi vaitaimi i Kiniselani lava.
Sa taliaina e Maligi ma le faletua le manaoga o le ekalesia i Kiniselani, ma sa faafiafiaina foi le ekalesia, ma faataunuu ai le osiga feagaiga i le tausaga lava lea. A o galulue pea mo le taimi muamua sa tausi nuu ai, ma o le tausaga foi lea e 1990, na faauu ai ma faamaonia uma ai tofiga i le faafeagai ai ma le galuega a le Atua.
E faanofonuu Maligi ma le faletua i Kiniselani, ae lei faamavae lava ma le galuega faasalalau i le Radio New Zealand. O le naunau o le auauna ina ia faafaigofie ma fesoasoani i le galuega fai a le aulotu i le tulaga tau seleni, sa manatu ai e faaauau pea ona faigaluega. Ae ui lava foi i lea naunautaiga, peitai sa fautuaina malosi e toeaiina o le ekalesia aoao, ina ia tuua tiute o le leitio ae alo mo le galuega e pei ona valaauina ai, mo le tausia o le ekalesia.
Sa talia e le auauna le fautuaga mai taitai o le ekalesia aoao, ma o le 1992, na faamavae aloaia ai loa, ma tuua le galuega faasalalau sa tauave mai e lenei auauna i tausaga e tele o lona soifua galue.
O le soifua ofoina mo le Atua ma lana galuega, ua ama ai le silasila i tofiga sa galue ai, ae matau i le isi valaauina e sili atu, e pei ona tofia ai mo le leoleoina o le lafu mamaoe a le Atua.
Soifua taaalo ma taaloga, atoa ma faafiafiaga
O Maligi Evile o se tasi foi o sui faavae o le faalapotopotoga o le SALAIA, na uluai fuafuaina le polokalame o tufaga faailoga, Samoa Sports Awards. O le toeaina manumalo ua maliu, Leuatea Sio, o le afioga ia Papaliitele Peter Taouma, Toolepai Lui Tautolo, Leao Siitia, ma isi, o nisi ia o sui faavae o lea faalapotopotoga.
O le uluai taaloga foi faavaomalo a le Pasefika, First South Pacific Games sa faia i Samoa, sa tatalaina e le susuga ia Evile, a o iai pea i le galuega faasalalau.
Taui
O loo tauaaoina foi e oo mai i le taimi nei e le susuga ia Maligi Evile, se pine taualoa mai le Tupu Tamaitai o le Malo Tele o Peretania. O se tulaga sa faatinoina e tauia ai lana galuega tāua sa faia mo tagata Samoa ma le Pasefika e ala i le galuega faasalalau i le Radio New Zealand.
O le tausaga lava lea e 1992, sa tauaao ai lea faamanuiaga mo le auauna i Ueligitone.