O le uluai taimi lea sa oo ai le soifua galue o Maligi ma ua avea ai le galuega o le faia o le polokalame a tamaiti i le leitio, o se luitau fou i lona soifua galue.
O le tausaga e 1963, sa faasalalauina ai ni avanoa faigaluega a le leitio a le atunuu ma sa manaomia ai se au faasalalau (announcers).
O Maligi Evile le isi sa talosaga mo ia avanoa. Mulimuli ane sa faamanuiaina lana talosaga ma o le tausaga foi lea na suia ai loa lana galuega, mai le faiaoga i le avea ma faasalalau i luga o leitio.
O le 1963 e oo mai i le 1965, sa galue ai mo le leitio faasalalau a le atunuu le 2AP. Sa taua foi e Evile, nisi o tamā o le atunuu sa iai i lea vaitaimi e pei o le tofa ia Lavea Levi, ma le afioga ia Fuiono Faaiuaso, a o pulea le leitio e le susuga ia Jimmy Moore.
O le tausaga e 1968 sa malaga mai ai i Niu Sila, ma galue ai i nisi o galuega mo le tausia o le aiga.
O se tala fiafia ina ua faalauiloa faalauaitele nisi o suiga ma manaoga o le faiga malo a Niu Sila i lena vaitaimi, a o tulai mai le malo a le Leipa i le taitaiina o le atunuu.
O suiga sa faalauiloa e pei ona saunoa i ai Maligi Evile, o le taumafai lea o le malo o Niu Sila, ina ia fesootai lelei ma tagata Pasefika e aofia ai ma tagata Samoa, ma ia malamalama foi i uiga ma manaoga o loo iai.
O le faataua e Niu Sila o fesootaiga ma tagata Pasefika, sa manaomia ai ni faiaoga mai le Pasefika, e faaulufale i totonu o le Matagaluega o Aoga ina ia toe aoaoina, ona pau lea o le auala sa manatu le malo e faigofie ai ona fesootai ma faafeiloaia le manaoga sa iai.
O le autu tonu lea sa amata ai loa ona faagaioi lea faiga o le aumaia o faiaoga Pasefika i totonu o aoga, ma taumafai e tiliva ai ma faalogologo ai foi i manaoga mai tagata lautele.
O le tausaga e 1975, sa amata ai ona faatino lea faamoemoe o le malo o Niu Sila, ma o le tausaga foi lea, sa filifilia ai le susuga ia Maligi Evile, o se tasi o faiaoga o lea polokalame.
