O le aoga maualalo a Grey Lynn, (Primary School), o le aoga maualuga a Seddon ua suia nei lona igoa ia Western Spring College, o nisi ia o aoga sa galue ai ma faiaoga ai le auauna.
Sa taumafai malosi le susuga ia Maligi, ma nisi o faiaoga Pasefika i lena foi vaitaimi ina ia faafetaiaia manaoga o le polokalame a le malo, o le malamalama lelei i manaoga o tagata Pasefika, aemaise o tagata Samoa. O le faaleleia atili o fesootaiga ma le mautinoa lelei o tu ma aga faa-Pasefika, sa avea ma manulauti a le malo, na mafua ai ona tapa le fesoasoani mai faiaoga Pasefika i lea lava vaitaimi.
(O le a faaauau atu i le vaiaso a sau le otootoga o le soifua auauna o le Susuga i le Faafeagaiga, Rev Maligi Evile)
A o galue Maligi o se faiaoga e pei ona taua, ae sa galue foi faavaitaimi mo le leitio a Niu Sila (Radio NZ). O le solosolo lelei ma le toe faateleina o le taimi mo tagata Pasefika i luga o le leitio lava a Niu Sila mai le tausaga 1981, ua toe see ai ma le sa o le auauna mo le galuega faasalalau, sa iu ane ai loa ina faamavae aloaia mai le galuega faiaoga.
O le 1980 sa toe faaopoopo ane ai le avanoa o faasalalauga mo tagata Pasefika lava i luga o le leitio a Niu Sila. O se avanoa taua tele ona ua agai ina amanaia tele mai e le malo tagata Pasefika e ala i lea foi auaunaga. O le toe faaopoopo ane o le taimi, faatoa atoa ai le 30 minute poo le afa itula lea, ma sa tau i lena taimi ua telē tele.
Sa faasoa mai ai Maligi ma taua ai lona faafetaia o auaunaga a leitio o loo ua iai i le taimi nei, ona o le lava o le taimi i luga o le ea mo faasalalauga, peitai o lea taimi, sa faigata tele ona o le tele o vaega e fia fesoasoani ai mo tagata Samoa, ae sa utiuti le avanoa ma le taimi sa faamatuu mai e leitio tetele, e pei o le Radio NZ, ae sa faafetaia pea le malo i lena vaitaimi, ona o le maua o sina 30 minute mo tatou.
O nisi sa taua o latou suafa ona sa galulue faatasi ma le susuga ia Maligi Evile, mo polokalame i lena vaitaimi, e aofia ai Moana Papalii, Seiuli Leifi, ma le alii Tonga o Sefita Hauli. O le alii Tonga o Sefita e pei ona taua, o ia sa faauluulu i ai le leitio a tagata Pasefika le 531PI, ma sa faatoa faamavae mai lea tofiga i le tolu tausaga talu ai.
Sa taua foi e Maligi o le tausaga e 1992, na faatoa tapunia ai le avanoa i le leitio faasalalau a Niu Sila, lea sa faaaogaina e tagata Pasefika, ina ua aapa mai le malo ma faatu aloaia le leitio mo tagata Pasefika lava latou, lea lava o loo iai e oo mai i le taimi nei. O le Radio 531PI, sa faavae mai e le faiga malo a le Leipa, mai le tausaga e pei ona taua.
O le lelei ma le taua tele o le faagasologa o le faafoeina o polokalame a le Pasefika i lena vaitaimi, sa mafua ai ona aloaia ma pasia loa le faia o se leitio mo tagata Pasefika lava latou, lea ua oo mai ai lava i lenei vaiataimi. O ia suiga sa faia lava a o auauna pea Maligi Evile mo le leitio faavaomalo a Niu Sila, le Radio New Zealand.
(O le a faamae‘a atu i le vaiaso a sau le otootoga o le soifua auauna o le Susuga i le Faafeagaiga, Rev Maligi Evile)
