Ua tagi le teineititi ma aioi i le tamaloa avetaxi e fia alu i le aoga, ae na o le ataata o le alii ma fai ane, ‘seiloga lava e te ioe muamua mai e fai se ta uo, ona faatoa toe momoli lea o oe i le aoga.’
Ua le iloa e le teineititi o Sera se isi gaoioiga a fai, aemaise o lea ua saosaoa le alu a le taavale, e le faigofie mo ia ona oso i fafo. Ua tatalo le leoa le teinetiti i le Atua, ma augani i ai e fesoasoani mai ma laveai o ia mai lenei tagata le alofa.
Na taumafai le teineititi e faatoatoa lona mafaufau ma vaai pe iai lava se isi mea e ono toe sao ese ai mai lenei tagata leaga.
Ae na matua oo i le lagi le faafetai a le teine, ina ua afe atu le la taxi i le isi pioga, o loo tumutumu mai ai ni tagata i se taavale o loo lavea, ma o loo tutu foi alii leoleo e poloka le soona vave atu o taavale, a o tau fai le taavale lavea.
O le tumutumu lenei ua le faigofie ai i le alii avetaxi ona faaauau lana alu saoasaoa, ae o ina loa le avanoa na tatala vave ai e Sera le faitotoa ae puna i fafo ma alaga atu i tagata mo sona laveai.
Na laga mai nisi o alii sa tutu i autafa o le auala ma poloka le taavale a le alii avetaxi, a o taumafai e toe liliu faatopetope e alu ese.
Na maua taitaia le alii avetaxi le alofa, ae na toe momoli ane e nisi le teineititi i lona aiga, ma fai ai lana faatoesega tele i ona matua, i le leaga o lona le usitai.
Sa toafimalie le ulugalii e ui i se tiga na lagona, ae na la opo i le la tama ma fai le latou tatalo faafetai i le Atua, ona o le laveai mai o Sera i lenei mea matautia na semanu e tupu ai.
O le aso lava lena, na matua mautinoa ai e Sera, e leai nisi upu e sili atu ona alofa moni nai lo upu mai ona lava matua.
Ma e oo lava i le aso na faaipoipo ai le teine, e lei toe tofotofoina lava e Sera le tulafono a ona matua, ‘ia aua lava nei alu na o ia i se tamatai taavale’.
Ma o taimi uma e talanoa ai Sera e faalaeiau i nisi teineiti talavou ua oo o latou tausaga i le matua lea na tau tupu ai le faalavelave ia te ia, e na te faamatala pea i ai lana tala lenei, ma faamamafa atu i na teineiti, ‘E ese le manuia o le tagata e ola usiusitai i ona matua, aemaise i poloaiga a le Atua.’
