Talofa e, ia Sera ma lona teine lelei sa amata mai ai, o lenei ua feuai solo e fautuaga faatamaiti a ana uo lona mafaufau lelei sa iai.
Ona manatu ai lea o le teine, a toe tulai mai se isi taimi e moomia ai ona alu i se taxi, o le a ia faia loa, ua le popole foi pe iloa ane e lona tama, leaga o lea ua ia ioe nei, o lona uiga e masalosalo lona tama ia te ia, a o lea lava e fiu e fai atu le teine lelei i ona matua.
O le taeao lea ua fai sina faatimutimu o le aso, ae na misi ai e Sera le pasi muamua mai lona nuu i le taulaga. E oo ane i le mea e masani ona pue ai lana pasi mo le aoga, ua leai uma ni tamaiti, ma ua faasolo foi i le valu le vae o le uati.
Ua popole le teine ona e fai sina mamafa o faasalaga a le aoga pe a tuai soo se tamaitiiti. Ua tasi nei le filifiliga o loo totoe ia Sera, ua tatau ona taofi se taxi e alu ai, aua e mautinoa lona tuai pe afai e toe faatali i le isi malaga a le pasi o le a sosoo mai.
Ua matua feteenai solo mafaufauga o le teine i lea taimi. O lona mafaufau o loo unai mai e taofi loa se taxi, ae i lona loto o loo taofiofi mamau mai lava, ia manatua le faatonuga a si ona tama.
O le lē mautonu o le teine i lea taimi, na tei ai lava ua ea ae i luga, ae fetaui ma le pasi ane o le taxi, talo loa i ai ma le lima o Sera e taofi mai.
Na tu le taxi ona oso loa lea o le teine ma faamolemole atu i le alii avetaxi e momoli o ia i lana aoga.
O le aoga a Sera e tau fai sina mamao ese mai le taulaga, ma e atoa lava le luasefulu minute e alu ai i le pasi, ae o le auala foi e fai ma va i togavao.
Ua agai atu le taxi, ma ua ki faaleotele e le alii avetaxi lana musika tuitui. Na matua pei o le ata faasolo i le mafaufau o Sera upu lapatai a si ona tamā, aua e lei leva lava ona amata le la faiga malaga, ae faalogoina e le teine e ese lava tala a le avetaxi lea ua fai ane ia te ia.
Na sosoo ai lava ma le amata ona ole e le avetaxi le teine mo se faigauo.
Ua fefe Sera, ma ua na o le talotalo ua tuai ona oo le taxi sei alu ese i fafo. ‘Faamolemole lau susuga, e na o le fia momoli lava o au i le aoga le mea lea ou te manao ai, nei tei ua ou tuai ona faasala lea o au.’
Talofa e, i le teineititi usitai! E lei fia faalogo le avetaxi i sana aioiga, aua na matua tuu i luga e le alii le leo o le musika, tuutuu atu ai ma le vae o le driver. Ma nai lo le afe i le auala e agai i le aoga, ae ua tuutuu loa i luga o le aega le taavale a le teine ma le avetaxi.
