O le tauloto lea a le toeaina o Pale i lona afafine i afiafi uma pe a fai le latou afiafi faaleaiga, ‘ia aua, aua, lava nei e alu na o oe i se tamai taavale (taxi)’.
O le mea ua tupu ua amata ona fai ma ulaga le taulogologo a si toeaina. Talu ai ua iloa uma e tamaiti ma teineiti o le vasega a Sera le tulafono a le tama o le teine, ua amuamu ai nisi ma ula i si teine, ‘lona uiga e oo mai lava lou oti e te le saofai na o oe i se taxi.’
A o faagasolo aoga a Sera, na lelei lana tulagalua seia oo ina au ane i se kolisi maualuga i le taulaga, ma ua amata foi ona lua pasi e pue e le teine i taeao uma ma aoauli e agai ai i lana aoga ma toe foi ane i le fale.
O nisi taimi e toetoe lava a tuai Sera i le aoga, ma e tofotofoina ai lava pe taofi se taxi e alu ai ina nei tuai, ae ona o le mamafa i lona mafaufau o le tulafono a lona tama, e usitai ai lava ma faatalitali pea sei sau se pasi.
I le vasega a Sera i le kolisi, e masani ona faalogo le teine i talanoaga a nisi o teineiti, e tau ai lava le feoai i taxi, a le o le o faatasi, pe alu lava na o le teineititi ia i lana taxi.
Ma i le faalogo a Sera, o se mea manaia tele, ma ua atili paso ai lona mafaufau, ae aisea lava e soona inaina ai lona tama e faasa lona alu toatasi i se taxi, a o lea e saoloto ma fiafia ai isi teineiti.
Na iu lava ina fesili Sera i se tasi o ana uo i le aoga, poo a ni mea e tutupu i se teineititi pe a alu toatasi na o ia i se taxi. Na ata lana uo ma faapea ane, ‘se tuu ia mea old fashion na, a ou matua! O le a le mea a le taxi e fai fua ia te oe ia? Se mau teineiti e o na o latou i taxi pe a tuua le aoga. Lona uiga e le talitonuina oe e lou tama.’
E lei fiafia Sera i lea tala a lana uo faapea, ‘e le talitonuina o ia e lona tama.’ O le mea ua tupu, ua uma nei le usitai o Sera, ae pei ua faasaga lona ita i lona tama, ona o lea e leai ma sana mea sese o faia, ae foliga na te le talitonuina o ia.
‘Tafefe, se aso ai lava o lea e talie mai tamaiti ia te au, lona uiga e tasi le mate uma a tamaiti e iai se mea matautia na ou faia, fua i le matua faasa o au e lou tama ona ou alu i se taxi.’
