O se galuega e tapuaia, e mautinoa le faataunuuina ma le manuia. O faamoemoega uma e talosia, e tulai mai i ni taunuuga matagofie ma faaosofia ai lagona fiafia ma le faagaeetia, ae maualuga ai le faafetai.
O lagona na sa iai le Aso Toonai, aso 29 o Novema, lea na faataunuu ai le samaina o tatau poo le lagi malofie a le Tofa Lelili‘o Atonio Selesele, ma le susuga ia Levi Lematua.
Ua moni upu o se tasi o fatuga a le atunuu i lenei laei a Samoa, “Sole sole, ia e lototele, o le taaloga e faatamatane.
E ui lava ina tiga tele, ae mulimuli ane ua e fefete.”
Na taitaia le sauniga lotu e le susuga i le faifeau ia Patele Father Michael Endermann. Na maea lea, ona alo atu lea o le susuga ia Tūlouena Laulu Andre Fakalago o ia le tufuga o lenei galuega tele, mo le samaina o le malofie a i laua nei.
Na maea le sauniga, ona alo atu foi lea i le taumafataga ma faaaloaloga masani faa-Samoa. Na faatumulia i aiga, uo ma ē masani, sa molimauina lenei aso matagofie. Malo fai o le faiva!!
Faamatalaga na tuuina mai
