E ave pea le faamuamua i le Atua ona o lona alofa ma lona agalelei o loo tausia ai pea i tatou, ua mafai ai foi ona tatou laasia le masina lona ono o lenei tausaga. O lea ua ‘afa le tausaga 2010, e ui lava foi ina lē utuva le malaga lē faatuaoia a le maliu ma le oti i lea aso ma lea aso, ma ua matagitaumuaina ai lo tatou sa, peitai o loo maualuga pea le alofa tunoa o lo tatou Matai, ma o ia lava foi na te taitoaluaina i tatou i taimi o faigata. Faamālō atu Samoa i lau folauga, Talofa lava.
O le vaiaso nei ua aga‘i ai le tatou itulau i se tasi o tamaitai Samoa, e matautia foi faiga a le Atua sa faaaogāina ai le soifua o lea tamaitai. Aemaise ai o lona tauaveina pea o lona mamalu o se tamaitai seia oo mai lava i le taimi na feiloai ai ma le tatou polokalame.
Ou te muai faapoipoi laau tumanu atu ai i le tofa faatupu ma le finagalo faafaleupolu, ia i latou o loo ua matua i ai le tuua o le aiga Sā Aiono, pe afai ae sala se gagana ma se faamatalaga a le auauna ona o le taumafai e mulimulitai pea le finagalo o le tamaitai matua.
O nisi taimi e manino foi lana saunoa mai, peitai o le tele lava o taimi ua ia lē manatua le tele o vaega o lona soifuaga, aemaise lava o suafa o le aiga, atoa ai ma isi vaega i fafo o le lio o le aiga ma le nuu.
Mo le silafia e le aufaitau, o Anuilagi, o loo iai nei i totonu o maota o tagata matutua, ma ua lē mafai ai e lona malosi ona taaofai nisi o tulaga sa fesiligia ai, peitai sa taumafai lava e faafaigofie le feiloaiga ma le tamaitai matua.
E tele vaega tāua sa afea i lana faasoa mai, ma e faafetai foi ona ua feiloai atu i lenei tamaitai matua, a o maua pea le malosi e feiloai ai ma fefaasoaai i lona soifua a o iai i le atunuu.
Anuilagi Lupe Aiono
Aso Fanau: 22 Mati 1925
Nuu: Fasitoouta
Afai e sa‘o lona aso soifua e pei ona faailoa mai, o lona uiga ua pasia nei le 85 o ona tausaga. E pei lava ona muai faamalulu atu muamua, ona e iai lava taimi e fesuisuiai ai le finagalo o le tamaitai ona o le matua o le soifua ua iai, ae iai le lagona e lē tāua lea, a o le auga lava o le maua o le avanoa a o malosi pea.
O Anuilagi Lupe Aiono, sa soifua a‘e lava i totonu o lona nuu, le afioaga o Fasitoouta i Aana i Upolu.
O lona soifuaga atoa lava mai aoaoga sa faavae ma amata i totonu lava o le afioaga e pei ona ta‘ua.
O le taimi foi sa siitia ai le tulaga ma agai ai i le soifua galue i le galuega sa tautua ai i lona aiga ma lona nuu ma le malo o Samoa, sa fofoa lava i totonu o le afioaga.
Ae peitai e tusa ai ma lana molimau, sa ia ta‘ua ai e faapea, sa fanau pe sa soifua mai i lona taimi muamua i le lalolagi, i totonu o le atunuu o Fiti. O ona tuaa sa nonofo i Fiti i le taimi tonu sa soifua mai ai.
O le toeaina sa valaauina i nisi o galuega a le ekalesia EFKS, sa mafua ai ona faanofonuu i lea atunuu mo se vaitaimi umi. E manatua e Anuilagi, na faato‘ā toe foi i Samoa ina ua atoa lona iva tausaga.
O lona tuaa o Aiono Polofaasoasoa na soifua mai ia Aiono Faasisila, e tupuga mai i le fuaifale o Aiono Finai i Fasitoouta lava. O lona tuaa tina, o Tauvela mai le afioaga o Papa i Sataua, e faapea o se aiga taupou mai le afioaga e pei ona ta‘ua.
O le toe foi i Samoa o Anuilagi ma ona tuaa, sa amata ai ona ulufale i le aoga a le afioaga lava i Fasitoouta. Afai foi ae faamaonia lana mau, sa fiafia lava e faaigoa le aoga a le latou nuu e faapea o le Happy Village.
Masalo o se igoa eva lea o le tulagalua a Fasitoouta sa iai i lea vaitaimi, atonu e faamautinoa mai e nisi o le mamalu o le afioaga.
