Ua amata ona mou mālie atu lagona faaalia, aemaise o le tali o fesili e tele sa tulitulimatai e le toatele o tagatānuu o Niu Sila, ina ua mae‘a ona faailoa le tala o le tupe a le malo i le masina na tea nei. Peitai o loo vevela pea i talanoaga, tusitusiga, ma faasalalauga e uiga i le mataupu e uiga i le vaega tupe sa ta‘ua ma pasia e le malo, o le a tuuina atu mo le Pacific Economic Development Agency.
O loo tele ni fesili o loo fesili ai, o nisi ua oo lava foi i le alii faipule, Sam Lotu Iiga, ua agai i ai mafaufauga ma manatu.
Ua faapea foi ona afea e nisi finagalo le susuga ia Laauli Michael Jones, ma le afioga i le Maopu Tuigamala Vaaiga Tuigamala, ona o loo iai le masalosalo ma le talitonuga lē mautonu, e iai ni auala sa mafua ai ona tuuina aloaia mai e le malo le $4.8 miliona i le kamupani e ona e se tasi foi o tamalii o le atunuu.
Talu ai ona o se taimi muamua lea ua tupu ai se faiga faapea, ina ua ma‘oti mai lava i le tala faatatau o le tupe, se kamupani tuma‘oti e ala i le tuuina i ai o se vaega tupe faapea.
O faiga masani e pei ona talanoa i ai le toatele e faapea, sa tatau i le malo ona fai ni tauofoga ina ia maua ai le avanoa o isi auaunaga e talosagaina ai lea vaega tupe mo le faataunuuina o tautua eseese.
E manatu le toatele o faiga masani ia a soo se malo, e tusa lava poo ai le faigamalo e tulai mai, e ao ina ui ma mulimulitai i lea faagasologa e pei ona manatu i ai le toatele.
I le ma le isi itu, o loo iai foi auaunaga e pulea e se faalapotopotoga o tagata, e ao ina agai i ai se fuafuaga faapea, nai lo le ave i se kamupani e ona e se toatasi.
Ua fesiligia foi le kamupani ua faamatuu i ai le seleni, poo ā auaunaga sa faia mo tagata lautele ua mafua ai ona ave i ai le faatuatuaga o le malo e ala i le seleni ua ta‘ua.
E oo lava foi i le alii faipule o le itumalo o Magele, sa ia matuā teena ma iu ai lava ina fesiligia le Minisita o Tagata Atumotu o le Pasefika i le faaiuga o le vaiaso talu ai, i luma o le fonotaga a le Palemene i Ueligitone, e uiga lava i lea mataupu.
E foliga mai e lē o fiafia pe ioeina e le toatele, ma e taliagata foi le tulaga ua faia e le malo, i le ma lea, e foliga mai foi e agai le lē fiafia o nisi i lē e ona le kamupani.
Ua soona nunumi atu ai lava ma le toatele o tagata e lē o maua se malamalamaga i lea foi mataupu, aemaise ai o le mafuaaga tonu sa mafua ai ona silasila le malo i faamaumauga tusitusia a le Pacific Economic Development Agency, ma ioeina le talosaga sa tuuina atu.
O le popolega o le Samoa Times, ona o se tulaga o le a taitaiseseina ai ma felefele solo ai finagalo o le atunuu i mumugafalo o loo faia nei, poo ai e sa‘o, a o ai foi e sese, a o ai foi e faatonutonu folau.
O le tāpā o se finagalo o le afioga i le pule o le kamupani, e manatu le Samoa Times, e tāua atu nai lo le faaauau pea o felafolafoaiga e aunoa ma sona taunuuga manuia e ono tulai mai, ma atili vevesi ai pea, a o le mataupu e faigofie lava.
Anthony JR JM Pereira (Chief Executive, Pacific EDA)
“E lē tāua poo ā lava mau faamatalaga ua soona fai, ae lē afaina foi ni fesili o loo fesiligia ai le tautua a lenei kamupani, atoa ma lē ona le kamupani mo ana galuega fai, ae o le mea e sili ona tāua, o le fesili ifo o le tagata lava ia, ia te ia. Poo le ā sana mea sa fai, a o le ā foi sana mea ua fai, mo le manuia o tagata Samoa ma tagata lautele.
E lē mafai foi ona matou o e faatino le matou tautua, ona matou omai lea toe folafola ma faalauiloa atu mo le silafia e le atunuu; e lē faapena le faamoemoe o lenei auaunaga.
E ese foi le auala e faatino ai a matou galuega, a o le mea sili ona tāua, o le silasila mai o le Atua, o loo faamaoni i tautoga sa mafua ai ona faavae le galuega mo aso uma ma le lumanai.
E lē apoina foi le gasu ma le lapisi e pei ona faalogologo i ai ua lāgā e nisi foi o uso a auauna, na pau lava le tulaga maualuga i le taimi nei, ma o loo ave foi i ai le faamuamua ma silasila totoa iai, o le tilivaina o le matou auaunaga, ma lona faataunuuina, aemaise ia o gatasi ma le faamoemoe na mafua ai ona aumai le faatuatuaga a le malo ia matou, atoa ma le seleni e pei ona vevesi ai.
E telē se taimi sa fai ai a matou suesuega ma sailiiliga i le mea tonu e ao ina tuu i ai le matou talosaga.
O manaoga o loo feagai ma le toatele o tamafanau, ma tupulaga talavou e matutui ma tugā, a o le isi vaega sili ona taumafai i ai, o le faia o a‘oa‘oga e aveesea ai le toatele mai le mafaufau e agai i le penefiti, ma le olaga lē faigaluega.
E toatele foi aiga na matou fesoasoani i ai i le tulaga o le ave i ai o taumafa, ae pei ona ou ta‘ua muamua, e lē mafai ona matou omai ma faailoa na auaunaga i tagata lautele.
Tatou te galulue faatasi ma punouai e fai se mea lelei ma mea sili mo le soifua o tagata lautele, aemaise lava le tupulaga laiti ma fanau, auā o le lumanai lea o aiga ma le atunuu. Ae soia tatou te fetaua‘i ma vaavaai masae ma le toē mai o papalagi ia tatou ma tatou mea e fai.
O le toatele o papalagi o loo faamālō ma faafetaia le tulaga sa taumafai i ai, ae ua solomua lava i Samoa le toe faatūtū mai o lafoga ma faamatalaga e faaleaga ai le autū ma le ata manuia mo a taeao ua mae‘a ona fuafuaina e le PEDA.
Ou te malamalama lelei i le mafuaaga e foliga mai ua fate‘ia ai nisi ma foliga mai ua masalomia ni faiga lē talafeagai ua fai. E lē o solitulafono foi le auala sa uia e lenei kamupani.
Aisea la e te‘i ai le tofa ma le faautautaga ia i latou o loo fesiligia pea. Omai tatou tutufaatasi, ae soia ia le taumafai e tuu i lalo isi ma taumafaiga lelei ma le aogā o loo taumafai e fai; e lē maua ai se tatou ‘ai mo le lumanai.
Ae manaia pe a tuu mai le avanoa se‘i faatino ai le matou galuega, ona faamasino lea ma fai i ai finagalo. O le tupe foi e pei ona ta‘ua e faamatuu mai, e lē o se tupe tele pe a fua i le umi e faagaioi ai galuega e pei ona fuafuaina.
E tele la matou galuega sa fai, e fai ma faamaoniga o le tali mai a le Malo. Ia ae se‘i amata sia mea ua maua mai; a lelei lava ona faasoasoa ma faaaogā, ona toe vaai lea i se isi mea e telē atu.”
O le saunoaga malamalama lea a le susuga i le alii faatonusili o le Pacific Economic Development Agency, Anthony JR, JM Pereira, i se talanoga ma le Samoa Times i le Aso Tofi o le vaiaso na tea nei.
O loo iai le fuafuaga mamao a le afioga i le alii pule ma le kamupani, ina ia faagasolo ma faataunuu faiga sa tuuina i totonu o le talosaga mo se taimi lata mai.
O le tele o aiga ma tagata taitoatasi e lē o silafia, a o loo feagai ma manaoga faapitoa ma isi vaega vaivai o le soifuaga, o loo naunau ina ia faia i ai se faiga mo ni suiga manuia. O le itu lea o loo faamamafa tele ma silasila totoa i ai Pereira ma le auaunaga, o vaega e lē o mafai ona oo ma faatino i ai fesoasoani a le Malo ma isi foi auaunaga.
O le saunoaga a Pereira na ia ta‘ua ai, e tasi lava le auga ma le faamoemoe o le kamupani i le taimi nei, o le faataunuu lea ma tiliva a latou tautoga sa tusitusia ma tuuina atu i le Malo.
O le mafuaaga tonu lea sa mafua ai ona piki e le Palemia ma le Minisita o Tupe a Niu Sila, le Pacific Economic Development Agency, mo le faataunuuina o manaoga moomia o loo feagai ma tagata Pasefika i totonu o le atunuu.
